.jpg)
លោក អ៊ុន ចាន់ដា អភិបាលខេត្តកំពង់ចាម ចុះត្រួតពិនិត្យមន្ទីរពេទ្យសម្រាប់ព្យាបាលអ្នកជំងឺកូវីដ ១៩ កម្រិតស្រាល និងប្រភេទបំប្លែងខ្លួនថ្មីដែលតា កាលពីព្រឹកមិញ។ រូបថត រដ្ឋបាលខេត្ត
រដ្ឋបាលខេត្តកំពង់ចាម កំពុងរៀបចំជួសជុលឃ្លាំងពាណិជ្ជកម្មមួយកន្លែងដែលស្ថិតនៅភូមិត្រពាំងចារ ឃុំក្រឡា ស្រុកកំពង់សៀម ធ្វើជាមន្ទីរពេទ្យសម្រាប់ព្យាបាលអ្នកជំងឺកូវីដ ១៩ កម្រិតស្រាល និងជំងឺកូវីដ ១៩ បំប្លែងខ្លួនថ្មីប្រភេទដែលតា (Delta)។
ក្នុងពេលចុះពិនិត្យវឌ្ឍនភាពនៃការជួសជុលឃ្លាំងនេះនាព្រឹកថ្ងៃទី ០១ ខែតុលា លោក អ៊ុន ចាន់ដា អភិបាលខេត្តកំពង់ចាម បានជំរុញឱ្យក្រុមការងារបច្ចេកទេសធ្វើយ៉ាងណាពន្លឿនការងារនេះឱ្យរួចរាល់ឆាប់រហ័ស ដើម្បីផ្ទេរអ្នកជំងឺពីវិទ្យាល័យសីហនុ មកព្យាបាលនៅមន្ទីរពេទ្យនេះវិញ ក្រោយបុណ្យភ្ជុំបិណ្ឌខាងមុខ រីឯវិទ្យាល័យសីហនុ នឹងត្រូវរៀបចំបាញ់ថ្នាំសម្លាប់មេរោគ ប្រគល់ឱ្យសិស្សចូលរៀនវិញ។
លោកបានបញ្ជាក់ថា រដ្ឋបាលខេត្តបានរៀបចំជួសជុលឃ្លាំងពាណិជ្ជកម្ម ចំនួន ០៣ អគារ ដោយរៀបចំជាមន្ទីរេពទ្យសម្រាប់ព្យាបាលជំងឺកូវីដ ១៩ កម្រិតស្រាល ចំនួន ០២ អគារ និងមួយអគារទៀត សម្រាប់រៀបចំជាបន្ទប់សង្គ្រោះបន្ទាន់ និងអ្នកជំងឺបំប្លែងខ្លួនថ្មីប្រភេទដែលតា។
លោក អ៊ុន ចាន់ដា ថា៖ «មកដល់ពេលនេះ ការជួសជុល និងកែលម្អ បានស្ទើរតែ ១០០% ហើយ ចំណែកកិច្ចការសេសសល់ គឺខាងជាងកំពុងតែរៀបចំបង្ហើយ»។
គួររំឭកផងដែរថា កន្លងទៅនេះ រដ្ឋបាលខេត្តកំពង់ចាម បានរៀបចំឃ្លាំងពាណិជ្ជកម្ម ៣ ទីតាំង សម្រាប់ធ្វើជាកន្លែងចត្តាឡីស័ក និងមន្ទីរពេទ្យព្យាបាលជំងឺកូវីដ ១៩ កម្រិតស្រាល ដើម្បីប្រគល់សាលារៀនដែលបានយកមកធ្វើជាមណ្ឌលចត្តាឡីស័ក និងកន្លែងព្យាបាលកម្រិតស្រាល ជូនក្រសួងអប់រំ យុវជន និងកីឡា រៀបចំបើកសាលារៀនឡើងវិញ។
ទីតាំងទី១ ជាឃ្លាំងនៃមន្ទីរពាណិជ្ជកម្មខេត្តកំពង់ចាម ក្នុងក្រុងកំពង់ចាម ធ្វើជាមណ្ឌលចត្តាឡីស័ក ដែលអាចដាក់ប្រជាពលរដ្ឋក្នុងរង្វង់ពី ៨០០ ទៅ ១ ០០០ នាក់។ ទីតាំងទី២ ជាឃ្លាំងនៅក្នុងស្រុកកងមាស ធ្វើជាមណ្ឌលចត្តាឡីស័ក អាចដាក់ប្រជាពលរដ្ឋចន្លោះពី ៨០០ ទៅ ១ ០០០ នាក់ផងដែរ ចំណែកទីតាំងទី៣ គឺជាឃ្លាំងស្ថិតក្នុងស្រុកកំពង់សៀម ដែលត្រូវបានរៀបចំសម្រាប់ព្យាបាលអ្នកជំងឺកូវីដ ១៩ កម្រិតស្រាល ដែលអាចផ្ទុកអ្នកជំងឺបានក្នុងរង្វង់ជិត ១ ០០០ នាក់ផងដែរ៕
