.jpg)
កាស៊ីណូដឺសេនជូរី។ រូបថត ហ្វេសប៊ុក
ព្រះសីហនុ៖ រដ្ឋបាលខេត្តព្រះសីហនុនឹងធ្វើការស្រាវជ្រាវលើករណីចោទប្រកាន់ថា មានការបង្ខាំង និងបង្ខំបុគ្គលិកប្រមាណជា ៤០០ នាក់ ធ្វើការនៅកាស៊ីណូដឺសេនជូរីស្ថិតនៅភូមិ ៥ សង្កាត់លេខ ៤ ក្រុងព្រះសីហនុ ក្រោយពីមានភាពចម្រូងចម្រាសនៅក្នុងការឆ្លងជំងឺកូវីដ ១៩ នៅកាស៊ីណូនោះ។
សេចក្តីប្រកាសព័ត៌មានរបស់សាលាខេត្តចុះថ្ងៃទី ៣០ ខែកញ្ញា បានសរសេរថា៖ «ចំពោះការលើកឡើងថា មានការបង្ខាំង និងបង្ខំបុគ្គលិកឱ្យធ្វើការនៅក្នុងកាស៊ីណូខាងលើដោយគ្មានការព្រមព្រៀង រដ្ឋបាលខេត្តនឹងធ្វើការស៊ើបអង្កេតឱ្យបានលម្អិតបំផុត។ ករណីរកឃើញមានប្រព្រឹត្តបទល្មើស នោះរដ្ឋបាលខេត្តនឹងចាត់ការទៅតាមផ្លូវច្បាប់ដោយគ្មានការលើកលែងឡើយ»។
រដ្ឋបាលខេត្តព្រះសីហនុកាលពីថ្ងៃទី ២៧ ខែកញ្ញា បានប្រកាសថា នឹងចាត់វិធានការរដ្ឋបាល និងច្បាប់ចំពោះម្ចាស់អគារសណ្ឋាគារ និងកាស៊ីណូ ដែលមានការពាក់ព័ន្ធទាំងដោយប្រយោល និងដោយផ្ទាល់ក្ដីទៅលើការបង្ខាំង និងការបង្ខំឱ្យមនុស្សធ្វើការ ក៏ដូចជាការជួញដូរតាមរូបភាពទទួលមនុស្សឆ្លងដែនដោយខុសច្បាប់ឱ្យធ្វើការ។
បន្ទាប់ពីមានការផ្ទះជំងឺកូវីដ ១៩ នៅកាស៊ីណូ ខោនហ្វេសប៊ុកឈ្មោះ Doung Chan Sreypov បានធ្វើការ Live រិះគន់អាជ្ញាធរកាលពីថ្ងៃទី ៣០ ខែកញ្ញា។ រដ្ឋបាលខេត្តព្រះសីហនុនៅថ្ងៃដដែលនោះក៏បានចេញសេចក្តីប្រកាសព័ត៌មានមួយ ដើម្បីឆ្លើយតបទៅនឹងការ Live នេះ។
សេចក្តីប្រកាសបានឱ្យដឹងថានៅថ្ងៃទី ២៥ ខែកញ្ញា ឆ្នាំ ២០២១ កន្លងមក ក្រុមឆ្លើយតបបន្ទាន់នៃមន្ទីរសុខាភិបាលខេត្ត បានយកវត្ថុសំណាកពីបុគ្គលិកបម្រើការនៅកាស៊ីណូ ដឺសេនជូរី និង អគារស្នាក់នៅបុគ្គលិកកាស៊ីណូ ដីសេនជូរី។
ជាលទ្ធផល គឺបានរកឃើញអ្នកវិជ្ជមានកូវីដ ១៩ ជាច្រើននាក់។ ដោយពិនិត្យឃើញថាទីតាំងនោះ អគារធំទូលាយ និងមានកន្លែងស្នាក់នៅសមរម្យ រដ្ឋបាលខេត្ត បានចេញសេចក្តីសម្រេចមួយនៅថ្ងៃទី ២៦ ខែកញ្ញា ដើម្បីដាក់កាស៊ីណូនោះ និងអគារស្នាក់នៅបុគ្គលិកកាស៊ីណូជាកន្លែងធ្វើចត្តាឡីស័ក ជាកន្លែងព្យាបាលអ្នកជំងឺកូវីដ ១៩ និងជាកន្លែងធ្វើចត្តាឡីស័កបន្តចំពោះអ្នកដែលបានព្យាបាលជាសះស្បើយ ទទួលបានលទ្ធផលតេស្តអវិជ្ជមានវីរុសកូវីដ ១៩ ចំនួន ២ លើក។ ជាមួយគ្នានោះ រដ្ឋបាលខេត្តក៏បានផ្តល់ជម្រើសសម្រាប់អ្នកជំងឺ ថាតើចង់ទៅព្យាបាលនៅមន្ទីរពេទ្យ ឬស្នាក់នៅព្យាបាលក្នុងទីតាំងខាងលើផងដែរ។
សាលាខេត្តបានបញ្ជាក់ថា៖ «ចំពោះអ្នកជំងឺកូវីដ ១៩ ដែលស្នាក់នៅព្យាបាលនៅទីតាំងខាងលើ គឺត្រូវបានក្រុមគ្រូពេទ្យនៃមន្ទីរសុខាភិបាលខេត្តចុះត្រួតពិនិត្យព្យាបាលយ៉ាងយកចិត្តទុកដាក់ និងតាមដានសុខភាពអ្នកជំងឺជាប្រចាំ ព្រមទាំងបានបង្កើតគ្រុបតេឡេក្រាម (ទប់ស្កាត់ COVID19) ដើម្បីផ្ដល់ភាពងាយស្រួលក្នុងការទំនាក់ទំនងរវាងអ្នកជំងឺ និងក្រុមគ្រូពេទ្យ។ ចំពោះ អាហារហូបចុកគឺបានផ្តល់ជូន ០៤ ពេលក្នុងមួយថ្ងៃពីម្ចាស់កាស៊ីណូរបស់ខ្លួនផងដែរ»។
សាលាខេត្តបានបន្តថា កាលពីថ្ងៃទី ២៧ ខែកញ្ញា ក្រុមគ្រូពេទ្យក៏បានចុះទៅពិនិត្យសុខភាពអ្នកជំងឺទាំងអស់ ហើយឃើញថាមិនមានបញ្ហាអ្វីគួរកត់សម្គាល់នោះទេ និងបានផ្ដល់ថ្នាំសម្រាប់រយៈពេល ០៣ ថ្ងៃ និងបានណែនាំបន្ថែម ក្នុងករណីមានអាការៈមិនស្រួលខ្លួនសូមទំនាក់ទំនងមកក្រុមគ្រូពេទ្យ។ លើសពីនោះ នៅថ្ងៃទី ២៩ ខែកញ្ញា ម៉ោងប្រមាណ ០៩ និង ២១ នាទី មានអ្នកផ្ញើសារចូលក្នុងគ្រុបតេឡេក្រាមខាងលើ ដោយបានប្រាប់ថាមានអ្នកជំងឺម្នាក់ឈ្មោះ ហៀន ស្រីនិច ភេទស្រី អាយុ ២៨ ឆ្នាំ មានអាការៈក្អួត។
ពេលនោះក្រុមគ្រូពេទ្យក៏បានមកពិនិត្យ និងផ្តល់ថ្នាំជូន ព្រមទាំងទំនាក់ទំនងសួរនាំ ដើម្បីតាមដានអាការៈជំងឺរបស់គាត់។ លុះដល់ម៉ោង ០៦ ព្រឹកថ្ងៃទី ៣០ ខែកញ្ញា ឆ្នាំ ២០២១ អ្នកជំងឺដដែលមានអាការៈមិនធូរ ស្រាល និងបាត់បង់ជាតិទឹកជាច្រើន ហើយត្រូវបានរថយន្តសង្គ្រោះដឹកទៅកាន់មន្ទីរពេទ្យ។ ប៉ុន្តែបានជាងកន្លះម៉ោងក៏បានស្លាប់បាត់បង់ជីវិតតែម្តង។ បើតាមការបញ្ជាក់របស់ក្រុមគ្រូពេទ្យជំនាញគឺដោយសារគាត់ពុលអាហារ ដែលបណ្តាលឱ្យក្អួត និង បាត់បង់ជាតិទឹកច្រើនពេក។
សេចក្តីប្រកាសបានសរសេរថា៖ «អាខោនហ្វេសប៊ុកឈ្មោះ Doung Chan Sreypov បានធ្វើការ Live ផ្ទាល់ដោយមានគ្នាចំនួន ០៥ នាក់ បានចោទប្រកាន់មកលើអាជ្ញាធរខេត្តថា ពួកខ្លួនបានធ្វើតេស្តមានវិជ្ជមានកូវីដ ១៩ តែមិនត្រូវបានគេបញ្ជូនទៅព្យាបាលឡើយ ដែលផ្ទុយស្រឡះពីការពិតជាក់ស្ដែងគឺ ពួកគាត់ទាំងអស់គ្នាត្រូវបានព្យាបាលយ៉ាងយកចិត្តទុកដាក់ពីសំណាក់ក្រុមគ្រូពេទ្យរបស់យើង...»។
ក្រៅពីនោះ អាជ្ញាធរខេត្ត និងក្រុមគ្រូពេទ្យបានទៅអញ្ជើញពួកគាត់ដើម្បីយកទៅព្យាបាលនៅមន្ទីរពេទ្យ តែពួកគាត់មិនចុះពីលើអគារនោះទេ រហូតដល់ម៉ោង ០៧ និង ២៧ នាទីយប់ទើបគាត់ចុះមកជួបក្រុមការងារ ហើយបានបដិសេធមិនព្រមទៅព្យាបាលនៅមន្ទីរពេទ្យនោះទេ គឺសុំស្នាក់នៅ និងព្យាបាលនៅទីតាំង កន្លែងធ្វើការរបស់គាត់ដដែល។
បុគ្គលិកនៅកាស៊ីនោះកាលពីថ្ងៃទី ៣០ កញ្ញា បានអះអាងថា កាស៊ីណូនោះមានថៅកែជាជនជាតិចិន។ កាស៊ីណូនោះមានបុគ្គលិកទាំងខ្មែរ និងចិនប្រមាណជា ៤០០ នាក់ ដែលអ្នកខ្លះមានវិជ្ជមានកូវីដ ១៩៕
វីដេអូ៖
