កាកបាទក្រហមកម្ពុជា បានផ្តល់អំណោយមនុស្សធម៌ ជាស្បៀង សម្ភារ ថវិកា ជូនដល់គ្រួសាររងគ្រោះ និងងាយរងគ្រោះ សរុបប្រមាណ ជិត ៧ ម៉ឺនគ្រួសារ ក្នុងរយៈពេល ៩ ខែឆ្នាំ ២០២១ នេះ ដែលក្នុងនោះមានមនុស្សវ័យចាស់ ចំនួនជាង ៣៥% បានទទួលអំណោយមនុស្សធម៌នេះ ដើម្បីជួយកាត់បន្ថយការលំបាកផ្នែកជីវភាព ក៏ដូចជាគាំទ្រផ្នែកសេវាសុខុមាលភាពសង្គម សុខភាពផ្លូវកាយនិងផ្លូវចិត្ត ពិសេសក្នុងដំណាក់កាលនៃការរីករាលដាលជំងឺកូវីដ ១៩។
កាកបាទក្រហមកម្ពុជាបានលើកឡើងដូចនេះ នៅក្នុងទិវាមនុស្សចាស់កម្ពុជា និងមនុស្សចាស់អន្តរជាតិ ថ្ងៃទី ១ ខែតុលា ឆ្នាំ ២០២១ ដោយនៅក្នុងថ្ងៃនេះដែរ លោកស្រី ប៊ុន រ៉ានី ហ៊ុនសែន ជាប្រធាន និងជាស្ថាប័នមនុស្សធម៌នាំមុខគេនៅកម្ពុជាបានបង្ហាញពីការគាំទ្រ និងប្តេជ្ញាបង្កើនសកម្មភាពឧបត្ថម្ភគាំទ្រផ្នែកជំនួយមនុស្សធម៌នេះកាន់តែខ្លាំងឡើង។
ក្នុងឱកាសនេះដែរ លោកស្រី ពុំ ចន្ទីនី អគ្គលេខាធិការ កាកបាទក្រហមកម្ពុជា បានលើកទឹកចិត្ត និងថ្លែងអំណរគុណដល់មនុស្សចាស់ដែលជាមន្ត្រីជំនាន់មុន ដែលបានខិតខំប្រឹងប្រែងបំពេញការងារមនុស្សធម៌តាំងពីបាតដៃទទេ និងពឹងផ្អែកជំនួយពីអន្តរជាតិ តែឥឡូវនេះ កម្ពុជាអាចជួយដល់ប្រជាពលរដ្ឋដោយខ្លួនឯងបានដោយមិនពឹងផ្អែកជំនួយពីអន្តរជាតិទៀតទេ។
លោកស្រីបានថ្លែងថា៖ «សូមឱ្យមន្ត្រីជំនាន់ក្រោយៗ ខិតខំបំពេញការងាររបស់ខ្លួន ដោយយកគំរូតាម ថ្នាក់ដឹកនាំ និងមន្ត្រីជំនាន់មុន ដែលបានបន្សល់ទុកនូវស្នាដៃ និងបទពិសោធន៍ការងារជាច្រើន ដើម្បីបន្តជួយដល់ប្រជាពលរដ្ឋរងគ្រោះ និងងាយរងគ្រោះ ឱ្យមានប្រសិទ្ធភាព ប្រសើរជាងមុន និងទាន់ពេលវេលា»។
ជាមួយគ្នានេះដែរ លោក ហេង សំរិន ប្រធានរដ្ឋសភាជាតិក៏បានចូលរួមអបអរសាទរ ទិវាមនុស្សចាស់ និងទិវាមនុស្សចាស់អន្តរជាតិផងដែរ ដោយលោកបានលើកឡើងថា ទិវានេះរៀបចំធ្វើឡើងក្នុងគោលបំណងលើកកម្ពស់ គាំពារសុខុមាលភាពមនុស្សចាស់ នៅក្នុងសង្គមជាតិយើងឱ្យកាន់តែប្រសើរឡើង។
លោក ហេង សំរិន បានសរសេរលើបណ្តាញសង្គមហ្វេសប៊ុករបស់លោកថា៖ «នៅក្នុងសង្គមខ្មែរ យើងមានវប្បធម៌ប្រពៃណីតាំងពីយូរលង់មកហើយក្នុងការគោរព ប្រណិបត្តិ និងផ្តល់តម្លៃចំពោះមនុស្សចាស់ ដែលជាមាតាបិតា សាស្ត្រាចារ្យ បុព្វការីជននៅគ្រប់មជ្ឈដ្ឋានទាំងក្នុងគ្រួសារ និងសង្គមជាតិទាំងមូល»។
ទិវាមនុស្សចាស់ឆ្នាំនេះប្រារព្ធឡើងនៅចំពេលដែលប្រទេសកម្ពុជា កំពុងរៀបចំពិធីបុណ្យភ្ជុំបិណ្ឌ ដែលជាបុណ្យប្រពៃណីជាតិដ៏ធំប្រចាំឆ្នាំ ក្នុងគោលបំណងតបស្នងសងគុណចំពោះមាតាបិតា បុព្វការីជន ទោះអស់លោកបានទទួលមរណកាលក្តីនៅមានជន្មាយុក្តី។
ប្រធានរដ្ឋសភាជាតិរូបនេះ បានលើកឡើងថា រដ្ឋសភាបានតាក់តែង និងអនុម័តច្បាប់ ដែលជាបទដ្ឋានគតិយុត្តសំខាន់ៗជាច្រើននៅក្នុងការគាំពារ លើកកម្ពស់គុណតម្លៃមនុស្សចាស់នៅក្នុងសង្គមជាតិ។ ដោយឡែករាជរដ្ឋាភិបាលក៏បានដាក់ចេញនូវគោលនយោបាយ និងកម្មវិធីសំខាន់នានាដើម្បីគាំពារ និងលើកកម្ពស់ដល់មនុស្សចាស់។
លោក ហេង សំរិន បានបញ្ជាក់ថា៖ «គណៈកម្មាធិការជាតិកម្ពុជា ដើម្បីមនុស្សចាស់ ដែលជាយន្តការសម្រាប់អនុវត្តគោលនយោបាយជាតិស្តីពីមនុស្សចាស់ឆ្នាំ ២០១៧-២០៣០ និងកម្មវិធីផ្សេងៗសម្រាប់ជួយលើកកម្ពស់សុខុមាលភាពមនុស្សចាស់របស់រាជរដ្ឋាភិបាល បានដាក់ចេញដើម្បីធ្វើឱ្យប្រាកដថា សុខុមាលភាព និងតម្រូវការនានារបស់មនុស្សចាស់នឹងបានឆ្លើយតបដោះស្រាយកាន់តែល្អប្រសើរជាលំដាប់»។
លោកបានធ្វើការអំពាវនាវដល់ជនរួមជាតិ ចូលរួមធ្វើបុណ្យ ដាក់ទាន ជួយទំនុកបម្រុង និងថែរក្សាជនចាស់ជរា ដែលគ្មានទីពឹងឱ្យបានល្អទាំងផ្លូវកាយនិងផ្លូវចិត្ត និងចូលរួមបណ្តុះស្មារតីប្រកបដោយគុណធម៌ដ៏មានតម្លៃនេះ ដល់កូនចៅជំនាន់ក្រោយៗ ចូលរួមប្រតិបត្តិជារហូតទៅ៕