.jpg)
លោក គួច ចំរើន អភិបាលខេត្តព្រះសីហនុ។ រូបថត រដ្ឋបាលខេត្តព្រះសីហនុ
លោក គួច ចំរើន អភិបាលខេត្តព្រះសីហនុបានស្នើឱ្យថ្នាក់ដឹកនាំមន្ទីរ អង្គភាពនានាជុំវិញខេត្ត អភិបាលក្រុង ស្រុក និងប្រធានអង្គភាព ស្ថាប័នដែលបោះទីតាំងក្នុងខេត្ត ត្រូវអនុវត្តនូវវិធានការសុខាភិបាលមួយចំនួនចំពោះអ្នកដំណើរ និងប្រជាពលរដ្ឋមកពីក្រៅប្រទេសចូលមកកាន់ភូមិសាស្ត្រខេត្តនេះ ដើម្បីចូលរួមទប់ស្កាត់ការឆ្លងរាលដាលនៃជំងឺកូវីដ ១៩ ដោយសារស្ថានភាពនៃការឆ្លងរាលដាលនៃជំងឺកូវីដ ១៩ ពិសេសមេរោគបំប្លែងខ្លួនថ្មីប្រភេទដែលតា (Delta)។
លោកបានលើកឡើងបែបនេះក្នុងសេចក្តីណែនាំ ចុះថ្ងៃទី ០១ ខែតុលា នេះ ស្តីការពង្រឹងការអនុវត្តវិធានការសុខាភិបាលចំពោះអ្នកដំណើរ និងប្រជាពលរដ្ឋមកពីក្រៅប្រទេស ចូលមកកាន់ភូមិសាស្ត្រខេត្តព្រះសីហនុ ក្នុងគោលបំណងទប់ស្កាត់ការឆ្លងរាលដាលនៃមេរោគដ៏កាចសាហាវនេះបន្ថែមទៀត ដើម្បីឈានទៅបើកឡើងវិញនូវសេដ្ឋកិច្ច សង្គម។
លោក គួច ចំរើន បានណែនាំថា៖ «មន្ទីរ អង្គភាព និងស្ថាប័នពាក់ព័ន្ធ បន្តល្បាតត្រួតពិនិត្យចរាចរណ៍ចេញ ចូលឆ្លងកាត់ព្រំដែនចូលមកភូមិសាស្ត្រខេត្តព្រះសីហនុទាំងតាមផ្លូវគោក និងតាមផ្លូវទឹកជាប្រចាំ។ ក្នុងករណីមានអ្នកដំណើរ ឬប្រជាពលរដ្ឋមកពីក្រៅប្រទេសចូលមកភូមិសាស្ត្រខេត្ត ឬមូលដ្ឋានក្រុង ស្រុក ជាបឋមត្រូវអនុវត្តវិធានការសុខាភិបាលជាចាំបាច់ រួមមានការយកវត្ថុសំណាក ដើម្បីវិភាគរកមេរោគកូវីដ ១៩ និងការដាក់ឱ្យធ្វើចត្តាឡីស័កនៅទីតាំងដែលរដ្ឋបាលខេត្តបានរៀបចំ មុននឹងបន្តនីតិវិធីផ្សេងទៀត»។
លោកថា ចំពោះអ្នកដំណើរដែលចូលមកតាមអាកាសយានដ្ឋានអន្តរជាតិខេត្តព្រះសីហនុ ត្រូវបន្តអនុវត្តវិធានការសុខាភិបាលជាធរមាន តាមរយៈប្រព័ន្ធការងារ និងកិច្ចសហការដ៏ល្អរវាងអាកាសយានដ្ឋានអន្តរជាតិខេត្តជាមួយរដ្ឋបាល ខេត្តព្រះសីហនុ៕
វីដេអូ៖
