.jpg)
បន្ទប់ទឹកសាធារណៈ ដែលដាក់ដំណើរការឱ្យប្រើប្រាស់ក្នុងខេត្តព្រះសីហនុ។ រូបថត រដ្ឋបាលខេត្ត
ព្រះសីហនុ៖ នៅថ្ងៃនេះ រដ្ឋបាលខេត្តព្រះសីហនុ បើកឱ្យដំណើរការជាបណ្តោះអាសន្ននូវបន្ទប់ទឹកសាធារណៈចំនួន ៦ នៅតាមបណ្តោយឆ្នេរ អូរឈើទាល និងឆ្នេរអូរត្រេះ ដើម្បីបម្រើដល់ភ្ញៀវទេសចរជាតិ និងអន្តរជាតិ ក្នុងអំឡុងពេលបុណ្យភ្ជុំបិណ្ឌខាងមុខនេះ។
លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ ប្រាប់ ភ្នំពេញ ប៉ុស្តិ៍ នៅថ្ងៃទី ៣ ខែតុលា ឆ្នាំ ២០២១ នេះ ឱ្យដឹងថា រដ្ឋបាលខេត្តព្រះសីហនុបានសាងសង់បន្ទប់ទឹកសាធារណៈ សរុបទាំងអស់មានចំនួន ៩ ប៉ុន្តែ សាងសង់ដែលមានការបំពាក់សម្ភាររួចរាល់ មានចំនួន ៦។
លោកបន្តថា ដោលឡែក បន្ទប់ទឹក ២ ក្នុងចំណោម បន្ទប់ទឹក ៣ ទៀត កំពុងបំពាក់សម្ភារនិង ១ ទៀត មានបញ្ហាប្រព័ន្ធបង្ហូរទឹក។
លោកថ្លែងថា៖ «ដូច្នេះ រដ្ឋបាលខេត្ត ក៏សម្រេចដាក់ឱ្យដំណើរការបន្ទប់ទឹកចំនួន ៦ នេះសិន ដើម្បីត្រៀមទទួលភ្ញៀវទេសចរជាតិ និងអន្តរជាតិដែលនឹងមកលេងកម្សាន្ត នៅក្នុងឱកាសបុណ្យភ្ញុំបិណ្ឌខាងមុខ»។
លោកបញ្ជាក់ទៀតថា ប្រជាពលរដ្ឋក៏ដូចជាភ្ញៀវទេសចរជាតិ និងអន្តរជាតិ អាចប្រើប្រាស់បន្ទប់ទឹកសាធារណៈនេះ ដោយមិនគិតថ្លៃ ប៉ុន្តែ លោកបានស្នើសុំឱ្យប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិ ចូលរួមថែរក្សាអនាម័យ ឱ្យបានស្អាត ដើម្បីភាពស្រស់ស្អាតនៅក្នុងតំបន់ឆ្នេរសមុទ្រ និងភាពថ្លៃថ្នូររបស់កម្ពុជា។
លោក គួច ចំរើន អភិបាលខេត្តព្រះសីហនុ បានសរសេរនៅលើគណនីហ្វេសប៊ុករបស់លោកកាលពីថ្ងៃទី ២ ខែ តុលា ឆ្នាំ ២០២១ ថា «នៅថ្ងៃទី ៣ ខែ តុលា ឆ្នាំ ២០២១ បើកឱ្យដំណើរការជាបណ្តោះអាសន្ន បន្ទប់ទឹកសាធារណៈនៅតាមបណ្តោយឆ្នេរ អូរឈើទាល ឆ្នេរអូត្រេះ ចំនួន ៦។ រីករាយផង ៣ ការពារ ៣ កុំផង»។
លោក តាំង សុចិត្រក្រឹស្នា ប្រធានមន្ទីរទេសចរណ៍ខេត្តព្រះសីហនុ ថ្លែងឱ្យដឹងដែរថា ការដាក់ឱ្យដំណើការនូវបន្ទប់ទឹកនេះ វានឹងចូលរួមចំណែកលើកកម្ពស់មុខមាត់ខេត្តព្រះសីហនុ ជាពិសេសទាក់ទាញភ្ញៀវទេសចរជាតិ និងអន្តរជាតិឱ្យមកលេងកម្សាន្តនៅក្នុងខេត្តជាប់មាត់សមុទ្រនេះឱ្យបានកាន់តែច្រើន។
លោកថ្លែងបន្តថា៖ «បន្ទប់ទឹក វាសំខាន់ណាស់ បើភ្ញៀវទេសចរមកលេង ហើយមិនមានបន្ទប់ទឹកសម្រាប់គាត់ ម៉េចកើត។ បើមិនដូច្នេះទេវានឹងប៉ះពាល់ដល់បរិស្ថាន និងអនាម័យមិនខានឡើយ»៕
