The Phnom Penh Post Search

Search form

Logo of Phnom Penh Post newspaper Phnom Penh Post - គម្រោង USAID ព្រៃឡង់​បៃតង កំពុង​ធ្វើការ​ជាមួយ​ប្រជាសហគមន៍ និង​ភាគី​ពាក់ព័ន្ធ ដើម្បី​ការពារសត្វ​ស្មោញ ក៏ដូចជា​សត្វដែល​រងគ្រោះ​ជិត​ផុតពូជ




គម្រោង USAID ព្រៃឡង់​បៃតង កំពុង​ធ្វើការ​ជាមួយ​ប្រជាសហគមន៍ និង​ភាគី​ពាក់ព័ន្ធ ដើម្បី​ការពារសត្វ​ស្មោញ ក៏ដូចជា​សត្វដែល​រងគ្រោះ​ជិត​ផុតពូជ

Content image - Phnom Penh Post
ស្មោញ គឺជាបក្សីមួយប្រភេទ ដែលមានលក្ខណះពិសេស ដែលអាចហែល និងមុជទឹក មើលទៅដូចជាសត្វពស់។ រូបថត USAID Greening Prey Lang

គម្រោង USAID ព្រៃឡង់​បៃតង កំពុង​ធ្វើការ​ជាមួយ​ប្រជាសហគមន៍ និង​ភាគី​ពាក់ព័ន្ធ ដើម្បី​ការពារសត្វ​ស្មោញ ក៏ដូចជា​សត្វដែល​រងគ្រោះ​ជិត​ផុតពូជ

ភ្នំពេញៈ គម្រោង USAID ព្រៃឡង់​បៃតង កំពុង​ធ្វើការ​ជាមួយ​ប្រជា​សហគមន៍ និង​ភាគី​ពាក់ព័ន្ធ​ទាំងអស់ ដើម្បី​ការពារ សត្វ​ស្មោញ ក៏ដូចជា​សត្វ ដែល​រងគ្រោះ​ជិត​ផុត​ពូជ​ទាំងអស់ ដែល​ស្ថិតនៅក្នុង​តំបន់​ទេសភាព​ព្រៃឡង់​ និង​តំបន់​ជុំវិញ។

ហ្វេសប៊ុក USAID Greening Prey Lang ព្រៃឡង់​បៃតង នៅ​ថ្ងៃទី ៣ ខែតុលា​នេះ បានឱ្យ​ដឹងថា ស្មោញ គឺជា​បក្សី​មួយ​ប្រភេទ ដែល​មាន​លក្ខណពិសេស ដែល​អាច​ហែល និង​មុជទឹក​មើល​ទៅ​ដូចជា​សត្វ​ពស់។ វា​រស់​នៅ​​តាម​តំបន់ បឹង វាលភក់ និង​ទន្លេធំ។ សត្វ​នេះ​គេ​សង្កេតឃើញថា មាន​វត្តមាន​ពេញ​មួយឆ្នាំ និង​មាន​បន្ទាយ​ពងកូន​ដ៏ធំ​នៅ​តំបន់​ព្រែកទាល់ បឹង​ទន្លេសាប និង​តំបន់​តូច​មួយចំនួន​នៅ​ភាគ​ខាងជើង​នៃ​ប្រទេស​កម្ពុជា។

លើ​ហ្វេសប៊ុក ព្រៃឡង់​បៃតង​សរសេរ​ថា៖ «បក្សី​នេះ​មាន​កវែង​ដូច​ពស់ ចំពុះ​របស់​វា​ស្រួច​ដូច​ដាវ សម្បុរ​ពណ៌​ខ្មៅ កន្ទុយ​វែង ឆូត​សវែងៗ​នៅ​ផ្នែក​ខ្នង»។

គម្រោង​ព្រៃឡង់​បៃតង បានឱ្យដឹង​ទៀតថា ប្រភេទ​សត្វ​ស្លាប​សំខាន់ៗ​នៅក្នុង​តំបន់​ទេសភាព​ព្រៃឡង់​ និង​តំបន់​ជុំវិញ ត្រូវបាន​គំរាមកំហែង​ដោយ​ការបរបាញ់ និង​ការបាត់បង់​ទីជម្រក។ សត្វ​ស្លាប​ដែល​ដាក់​ពង​នៅលើ​ដី​ងាយ​រងគ្រោះ​ដោយ​សត្វ​សាហាវ​ដូចជា​ឆ្កែ មនុស្ស​ និង​សត្វព្រៃ​ដទៃទៀត ខណៈ​ដែល​សត្វ​ដែលមាន​សម្បុក​នៅលើ​ដើមឈើ​ងាយ​នឹង​រងគ្រោះ​ដោយ​ការកាប់​ឈើ ការបរបាញ់​និង​ការទន្ទ្រាន​យក​ដីព្រៃ​ សម្រាប់​ធ្វើ​កសិកម្ម​ ឬ​តាំង​ទីលំនៅ។

គម្រោង​ព្រៃឡង់​បៃតង​បាន​ដាក់​អ្នកការពារ​សម្បុក​បក្សី ដើម្បី​ការពារ​ពី​ការគំរាមកំហែង​ទាំងនេះ​ទៅលើ​សត្វ​ទាំងនោះ។ ក្នុង​រដូវ​បន្ត​ពូជ​ឆ្នាំមុន​ក្នុង​ចន្លោះ​ខែ​មិថុនា​ឆ្នាំ ២០២០ ដល់​ខែឧសភា​ឆ្នាំ ២០២១ សម្បុក​សត្វ​សរុប​ចំនួន ១២៧ សម្បុក និង​កូន​សត្វ​ចំនួន ២៣២ ដែល​សុទ្ធ​ជា​ប្រភេទ​សត្វ​កម្រ​ត្រូវបាន​ការពារ ក្រោម​កម្មវិធី​ការពារ​សម្បុក​សត្វ​ស្លាប​នៅ​ខេត្តព្រះវិហារ​ដែល​គាំទ្រ​ដោយ​គម្រោង​ USAID ព្រៃឡង់​បៃតង។

គម្រោង​ព្រៃឡង់​បៃតង​បញ្ជាក់ថា៖ «កម្មវិធី​បាន​ជ្រើសរើស​អ្នកការពារ​សម្បុក​បក្សី​សរុប​ចំនួន ៥៤ នាក់ ដើម្បី​ធ្វើជា​អ្នកការពារ​សម្បុក​បក្សី និង​កូន​របស់​ពួក​វា​ពី​ការគំរាមកំហែង។ ប្រភេទ​សត្វ​ដែល​ត្រូវបាន​ការពារ​នៅក្នុង​ឆ្នាំ​នោះ រួមមាន​សត្វ​ត្រយ៉ងយក្ស ត្រយ៉ង​ចង្កំកស សត្វ​ក្រៀល ត្រដក់​តូច កុក​ពាក់​អំបោះ សត្វ​ដំបងគ្រញូង សត្វ​ពពូលទឹក ទាព្រៃ​ស្លាបស និង សត្វ​ត្មាតភ្លើង»។

គម្រោង​បាន​ផ្តល់​ប្រាក់ឧបត្ថម្ភ​ដល់​អ្នកការពារ​សម្បុក​សត្វ​ជា​ប្រាក់​ប្រចាំថ្ងៃ។ អាស្រ័យ​លើ​ប្រភេទ​បក្សី​រយៈពេល​នៃ​ការការពារ​អាច​រហូត​ទៅដល់​បី​ខែ ដោយ​ចាប់ផ្តើម​ពី​ការរុករក​សម្បុក​ពង និង​បញ្ចប់​នៅពេលដែល​កូន​របស់​ពួកវា​ញាស់​បាន​ជោគជ័យ។

ការសិក្សា​ជាច្រើន​បាន​បង្ហាញថា​កម្មវិធី​ការពារ​សម្បុក​បក្សី​មាន​ប្រសិទ្ធភាព​ខ្ពស់។ តាមរយៈ​ការចូលរួម​ពី​សហគមន៍ កម្មវិធី​នេះ​មិន​ត្រឹមតែ​ធ្វើឱ្យ​ប្រសើរឡើង​នូវ​ការអភិរក្ស​ជីវៈចម្រុះ​ និង​សុខភាព​ប្រព័ន្ធ​អេកូឡូស៊ី​ប៉ុណ្ណោះ​ទេ ប៉ុន្តែ​វា​ក៏​ជួយ​លើកកម្ពស់​ជីវភាព​សហគមន៍​ និង​ពង្រឹង​អភិបាលកិច្ច​ប្រកប​ដោយ​ប្រសិទ្ធភាព​ផងដែរ៕

អត្ថបទគួរចាប់អារម្មណ៍