.jpg)
លោក ទៀ សីហា អភិបាលខេត្តសៀមរាប ថ្លែងនាពេលកន្លងមក។ រូបថត រដ្ឋបាលខេត្ត
អភិបាលខេត្តសៀមរាប លោក ទៀ សីហា បានប្រកាសថានឹងចាត់វិធានការទៅតាមច្បាប់ និងវិធានការរដ្ឋបាលដោយមិនលើកលែង ចំពោះបុគ្គលណាដែលល្មើសនឹងវិធានការនានាដែលរដ្ឋបាលខេត្តបានដាក់ចេញ បើទោះបីជាខេត្តលែងមានដាក់កំណត់នូវតំបន់ក្រហម និងតំបន់លឿងទុំក៏ដោយ ដោយសារស្ថានភាពនៃការរាតត្បាតនៃជំងឺកូវីដ ១៩ មិនទាន់បានបញ្ចប់នៅឡើយ។
លោកបានថ្លែងដូចនេះ កាលពីថ្ងៃទី ០១ ខែតុលា ក្នុងពេលប្រគល់យានយន្តជូនម្ចាស់ដើមវិញ បន្ទាប់ពីត្រូវបានកម្លាំងសមត្ថកិច្ចចម្រុះឃាត់ទុក ដោយសារតែម្ចាស់យានយន្តទាំងនោះ បានប្រព្រឹត្តល្មើសនឹងបម្រាម ហាមការធ្វើដំណើរក្នុងពេលដែលក្រុងសៀមរាបត្រូវបិទខ្ទប់ ដាក់ជាតំបន់ក្រហម និងជាតំបន់លឿង រយៈពេល ២ សប្តាហ៍កន្លងទៅ។
យានយន្តដែលត្រូវបានប្រគល់ជូនម្ចាស់វិញមាន ម៉ូតូចំនួន ១៦៦ គ្រឿង , រថយន្តចំនួន ៤ គ្រឿង និងម៉ូតូសណ្តោងរ៉ឺម៉កចំនួន ២ គ្រឿង។
លោកបានថ្លែងថា៖ «ពេលនេះយើងមិនមានការផាកពិន័យ ឬដាក់ទោសទណ្ឌទេ ប៉ុន្តែទៅពេលខាងមុខយើងនឹងរឹតបន្តឹងច្បាប់ឱ្យកាន់តែតឹងរ៉ឹងជាងនេះទៀត ប៉ុន្តែលែងមានការបិទខ្ទប់ហើយ។ បើបងប្អូនមានការល្មើសពីវិធានការរដ្ឋបាល គឺខ្ញុំនឹងចាត់វិធានការឱ្យកាន់តែតឹងរ៉ឹងជាងមុន ចាប់ផាកពិន័យ រួមទាំងការមិនពាក់ម៉ាស់ និងការជួបជុំផឹកស៊ីមនុស្សច្រើន គឺខ្ញុំចាប់ទាំងអស់»។
លោក ទៀ សីហា បានបញ្ជាក់ថា លោកនាយករដ្ឋមន្ត្រី ហ៊ុន សែន ឈប់ឱ្យមានការកំណត់ជាតំបន់ក្រហម ឬបិទខ្ទប់តំបន់ផ្សេងៗហើយ ដោយសារលោកយល់ច្បាស់ពីផលលំបាករបស់ប្រជាពលរដ្ឋ ប៉ុន្តែបងប្អូនត្រូវតែរក្សា ការពារសុខភាព មិនត្រូវឱ្យឆ្លងវីរុសកូវីដ ១៩ ឡើយ។
ចាប់ពីថ្ងៃទី ០១ ខែតុលាដែរ អាជ្ញាធរខេត្តសៀមរាបបានធ្វើការចុះពិនិត្យនៅតាមហាងលក់ដូរ ភោជនីយដ្ឋាន ឬសេវាកម្មផ្សេងៗដោយត្រូវរៀបចំការដាក់គម្លាតនៅក្នុងទីធ្លារបស់ខ្លួន ដោយត្រូវការពារទាំងអស់គ្នា។
លោក ទៀ សីហា ថា ៖ «សម្រាប់ម្ចាស់ហាងមានការលក់ដូរ ភោជនីយដ្ឋាន ឬសេវាផ្សេងៗ សុំឱ្យផ្អាកជាបណ្តោះអាសន្នសិន ដោយទុកឱ្យក្រុមការងាររបស់យើងធ្វើការពិនិត្យជាមុនសិន ហើយប្រសិនបើមិនទាន់មានការអនុញ្ញាតឱ្យបើកទេ ខ្ញុំសុំអធ្យាស្រ័យ សុំកុំទាន់អាលបើកហាងរបស់ខ្លួនអី ហើយខ្ញុំសុំឱ្យមានការលក់ដូចជាការវេចខ្ចប់ កុំហូប ឬប្រើសេវានៅក្នុងហាងរបស់ខ្លួនអី»។
លោកបានបន្តថា៖ «ទោះបីជាយើងលែងមានតំប់បិទខ្ទប់ក៏ដោយ តែហានិភ័យក៏នៅតែមាន មិនមែនមានន័យថាស្ថានភាពរបស់យើងមានការធូរស្រាលនោះឡើយ។ មួយវិញទៀត យើងលែងមានការធ្វើតេស្តបងប្អូនហើយ គឺបើបងប្អូនមានការសង្ស័យថាខ្លួនឆ្លងគឺត្រូវធ្វើការទាក់ទងទៅអាជ្ញាធរ ឬទៅតាមទីតាំងដែលយើងមានរៀបចំសម្រាប់ធ្វើតេស្ត»។
លោក ទៀ សីហា បានសរសេរលើបណ្តាញសង្គមហ្វេសប៊ុករបស់លោកកាលពីថ្ងៃទី ៣០ ខែកញ្ញា ថា រដ្ឋបាលខេត្តធ្វើយ៉ាងណាឱ្យខេត្តសៀមរាប ត្រឡប់មករកភាពដើមវិញ ដោយមានភ្ញៀវទេសចរជាតិ និងអន្តរជាតិ មកកម្សាន្តយ៉ាងកុះករ ក្នុងតំបន់ដែលអាចឱ្យប្រជាពលរដ្ឋមានការងារធ្វើឡើងវិញ និងអាចរកប្រាក់ចំណូល អាចទ្រទ្រង់នូវតម្រូវការជីវភាពឡើងវិញ។
លោកថា៖ «តែជាការសោកស្តាយណាស់ដែលកន្លងមក មានបងប្អូនប្រជាពលរដ្ឋមួយចំនួនតូច ដែលមិនអនុវត្តតាមការណែនាំរបស់រាជរដ្ឋាភិបាល របស់ក្រសួងសុខាភិបាល របស់អាជ្ញាធរខេត្ត ព្រមទាំងមានសកម្មភាព ប្រហែស ព្រហើន ឆ្លៀតឱកាសចំណេញ សប្បាយតែមួយគ្រា ធ្វើឱ្យមានការឆ្លងនៃជំងឺនេះកាន់តែច្រើនឡើងៗ ដោយមិនបានគិតពីផលប្រយោជន៍រួម មិនបានគិតពីផលប៉ះពាល់ដល់អ្នកដទៃ។ ខ្ញុំនឹងស្នើទៅសម្តេចនាយករដ្ឋមន្ត្រី ដាក់តំបន់ក្រហមឡើងវិញ នាពេលដែលបងប្អូនប្រជាពលរដ្ឋមួយចំនួនតូចបន្តបំពាន មិនអនុវត្តតាមវិធានការសុខាភិបាល ៣ការពារ ៣កុំ បណ្តាលឱ្យឆ្លងក្នុងសហគមន៍ធ្ងន់ធ្ងរម្តងទៀត»៕
វីដេអូ៖
