អត្រានៃការចាក់វ៉ាក់សាំងកូវីដ ១៩ ក្នុងប្រទេសកម្ពុជា សម្រាប់ប្រជាពលរដ្ឋដែលមានអាយុចាប់ពី ១៨ ឆ្នាំឡើង សម្រេចបានចំនួនជាង ៩,៩ លាននាក់ហើយ ឬស្មើនឹង ៩៩,១១% ធៀបជាមួយចំនួនប្រជាជនគោលដៅ ១០ លាននាក់ ដែលប្រមុខរាជរដ្ឋាភិបាលរំពឹងថា នឹងសម្រេចមុនផែនការកំណត់នៅក្នុងខែតុលានេះ។ នេះបើយោងតាមសេចក្តីប្រកាសរបស់គណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស គិតត្រឹមថ្ងៃទី ០២ ខែ តុលា ឆ្នាំ ២០២១។
របាយការណ៍ដដែលបានឱ្យដឹងថាសម្រាប់ការចាក់វ៉ាក់សាំងលើក្រុមមនុស្សអាយុពី ១២ ឆ្នាំ ទៅក្រោម ១៨ ឆ្នាំ បានចំនួនជាង ១,៧ លាននាក់ហើយ ដែលស្មើនឹង ៨៩,៦១% ធៀបជាមួយចំនួនប្រជាជនគោលដៅ ជិត២ លាននាក់ ខណៈដែលកុមារអាយុពី ០៦ ឆ្នាំ ដល់ក្រោម ១២ ឆ្នាំ ចាក់វ៉ាក់សាំងបានចំនួនជាង ១,៧ លាននាក់ ឬស្មើនឹង ៩២,៣២% ធៀបជាមួយនឹងប្រជាជនគោលដៅជាង ១,៨ លាននាក់។
ប្រភពដដែលបានបញ្ជាក់ថា៖ «សម្រាប់លទ្ធផលចាក់វ៉ាក់សាំងធៀបនឹងប្រជាជនសរុបចំនួន ១៦ លាននាក់នៅទូទាំងប្រទេសកម្ពុជា បានចាក់វ៉ាក់សាំងទៅដល់ពលរដ្ឋរបស់ខ្លួនបានជាង ១៣ លាននាក់ហើយ ដែលស្មើនឹង ៨៣,៩១%»។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស ធ្លាប់បានលើកឡើងថា ជាធម្មតាកាលណាអ្នករត់ខិតជិតមកដល់គោលដៅ គឺអ្នករត់ហត់ ហើយខំប្រឹងដើម្បីបានទៅដល់គោលដៅកំណត់។
លោកស្រីថា៖ «តាមការសង្កេតរបស់យើង ឥឡូវអ្នករត់មិនហត់ទេ គឺកំពុងតែប្រឹងដើម្បីធ្វើយ៉ាងម៉េចឱ្យទៅដល់គោលដៅ ប៉ុន្តែរឿងមួយទៀតគឺនៅពេលដែលយើងខិតជិតមកដល់គោលដៅកំណត់ មានន័យថា បងប្អូនពលរដ្ឋដែលបានចាក់វ៉ាក់សាំងគឺសឹងតែគ្រប់គ្នាហើយ នៅតែចំនួនរប៉េសរប៉ោះប៉ុណ្ណោះ ដែលអ្នកនៅសល់គឺនៅដាច់ស្រយាល»។
លោកស្រី ឱ វណ្ណឌីន បានបន្ថែមថា លោកស្រីរំពឹងថា ការចាក់វ៉ាក់សាំងដល់ក្រុមអាយុ ១៨ ឆ្នាំឡើង នឹងសម្រេចបានតាមគោលដៅកំណត់ចំនួន ១០ លាននាក់នៅក្នុងខែតុលានេះ៕