.jpg)
លោក ប៉ែន កុសល អភិបាលខេត្តឧត្តមានជ័យ នាពេលកន្លងមក។ រូបថត រដ្ឋបាលខេត្ត
ឧត្តរមានជ័យ៖ អាជ្ញាធរខេត្តឧត្ដរមានជ័យសម្រេចស្ដីពីការបន្តអនុវត្តវិធានការរដ្ឋបាលជាបណ្តោះអាសន្ន ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ ក្នុងភូមិសាស្ត្រខេត្តឧត្តរមានជ័យរហូតដល់ ថ្ងៃទី ១៧ ខែតុលា ឆ្នាំ ២០២១។
តាមសេចក្តីសម្រេចដែលចុះហត្ថលេខាដោយ លោក ប៉ែន កុសល អភិបាលខេត្តឧត្តមានជ័យកាលពីថ្ងៃទី ២ ខែតុលា ឆ្នាំ ២០២១ នេះឱ្យដឹងថា ហាមដាច់ខាតនូវរាល់ការលក់ចែកចាយស្រា ស្រាបៀរ រួមនឹងភេសជ្ជៈដែលមានជាតិអាល់កុល (បណ្តាលឱ្យស្រវឹង) ក្នុងភូមិសាស្ត្រខេត្តឧត្តរមានជ័យក្នុងថិរវេលាកំណត់ដូចមានចែងក្នុងសេចក្តីសម្រេចនេះជាកំហិត។
សេចក្តីសម្រេចនេះបន្តថា រាល់ការបម្រើសេវាកម្មរបស់តូបអាហារ អាហារដ្ឋាន ភោជនីយដ្ឋាន ភេសជ្ជដ្ឋាន និងភោជនីយដ្ឋាន នៅតាមសណ្ឋាគារ។ល។ ត្រូវតែគោរពឱ្យខាងតែបាននូវវិធានការអនាម័យ ដូចជាការរៀបចំជែល/អាល់កុល បាញ់សម្លាប់មេរោគ និងការរក្សាតម្លាតសុវត្ថិភាពបុគ្គលជាដើម ។ល។ ស្របតាមការណែនាំ និងវិធានសុខាភិបាលក្នុងការបម្រើសេវាកម្មរបស់ខ្លួន ពិសេសលើកទឹកចិត្តអតិថិជនក្នុងការប្រើជម្រើសសេវាកម្មបែបវេចខ្ចប់ និងហាមការបម្រើសេវាគ្រឿងស្រវឹងគ្រប់ប្រភេទជាដាច់ខាត។
សេចក្តីសម្រេចនេះបញ្ជាក់ទៀតថា ហាមឃាត់ជាបណ្តោះអាសន្នការធ្វើសកម្មភាព មុខរបរ និងអាជីវកម្មក្លិបកម្សាន្តគ្រប់ប្រភេទ និងសកម្មភាពមុខរបរអាជីវកម្មដែលនឹងបង្កឱ្យមានស្ថានភាពប្រឈមដែលកំណត់របស់អាជ្ញាធរ អនុលោមតាមតម្រូវការចាំបាច់ក្នុងការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ ១៩។
ចំពោះរាល់សកម្មភាពការងារ មុខរបរ និងអាជីវកម្មដែលមិនត្រូវបានហាមឃាត់ ត្រូវអនុវត្តវិធានការសុវត្ថិភាពផ្នែកសុខាភិបាលឱ្យបានម៉ឺងម៉ាត់ ជាអាទិ៍ ការរៀបចំជែលអាល់កុលបាញ់សម្លាប់មេរោគ ការវាស់កម្តៅ ការប្រើប្រាស់ប្រព័ន្ធ QR Coxe “ទប់ស្កាត់កូវីដ“ (Stop Covid) និងការរក្សាគម្លាតសុវត្ថិភាពបុគ្គល ជាដើម ។ល។ ពិសេសត្រូវប្រកាន់ខ្ជាប់ជានិច្ចនូវវិធានការ “៣ការពារ និង ៣កុំ។
លោក ឌី រ៉ាដូ អ្នកនាំពាក្យរដ្ឋបាលខេត្តឧត្តរមានជ័យនៅថ្ងៃទី ៣ ខែតុលា ឆ្នាំ ២០២១ នេះ ពន្យល់ថា សេចក្តីសម្រេចនេះ គឺជាវិធានការណ៍ដ៏មានប្រសិទ្ធភាពក្នុងការទប់ស្កាត់ការរីករាលដាលនៃជំងឺកូវីដ ១៩ នៅក្នុងមូលដ្ឋានខេត្តឧត្តរមានជ័យ។
លោកបន្តថា បើទោះបីប្រជាពលរដ្ឋនៅក្នុងខេត្តទទួលបានចាក់វ៉ាក់សាំងប្រឆាំងនឹងជំងឺកូវីដ ១៩ ស្ទើរតែគ្រប់គ្នាក៏ដោយ ក៏រដ្ឋបាលខេត្តអំពាវនាវឱ្យអនុវត្ត ៣កុំ ៣ការពារ ឱ្យបានខ្ជាប់ខ្ជួន ដើម្បីទប់ស្កាត់នូវជំងឺកូវីដ ១៩ មិនឱ្យមានការឆ្លងរីករាលដាលបន្តទៀតនៅក្នុងមូលដ្ឋានខេត្ត។
លោកថ្លែងថា៖ «ការឆ្លងនូវជំងឺកូវីដ ១៩ នៅក្នុងខេត្តមានការថយចុះច្រើន ប៉ុន្តែវិធានការណ៍នៅតែបន្តអនុវត្តដដែល ព្រោះជំងឺកូវីដ ១៩ មិនទៅណាឆ្ងាយពីខ្លួនយើងនៅឡើយទេ»។
បើតាមលោក ឌី រ៉ាដូ បច្ចុប្បន្ននេះ ប្រជាពលរដ្ឋដែលកំពុងសម្រាកព្យាបាលជំងឺកូវីដ ១៩ មានជិត ២០០០ នាក់ កំពុងធ្វើចត្តាឡីស័កចំនួនជាង ១ ០០០ នាក់ និងអ្នកដែលត្រូវបានព្យាបាលជាសះស្បើយ ហើយត្រឡប់ទៅលំនៅឋានវិញមានចំនួនជាង ៥ ០០០នាក់ ៕
