មន្ត្រីអគ្គនាយដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ហៅកាត់ ក.ប.ប. រកឃើញដេប៉ូប្រេងឥន្ធនៈចំនួន ៨ ទីតាំងបន្ថែមទៀតក្នុងចំណោម ១៤ ទីតាំង នៅខេត្តសៀមរាប និងខេត្តកំពង់ចាមបានល្មើសនឹងច្បាប់។
អគ្គនាយកដ្ឋាន ក.ប.ប. បានឱ្យដឹងនៅថ្ងៃទី ២ តុលាថា ក្នុងចំណោមស្ថានីយ និងដេប៉ូប្រេងឥន្ធនៈចំនួន ១៤ ទីតាំង នៅក្នុងខេត្តសៀមរាប និងខេត្តកំពង់ចាមដែលមន្ត្រី ក.ប.ប. បានត្រួតពិនិត្យគឺមាន ៨ទីតាំង ហើយដែលត្រូវបានរកឃើញថា មិនអនុលោមទៅតាមច្បាប់។
អគ្គនាយកដ្ឋានក.ប.ប.បានបញ្ជាក់ថា៖ «ការចុះត្រួតពិនិត្យនេះបានធ្វើឡើងនាថ្ងៃទី ២ ខែ តុលា ឆ្នាំ ២០២១ ដេប៉ូដែលប្រព្រឹត្តល្មើសទាំងនោះ ត្រូវបានមន្ត្រីជំនាញធ្វើការពិន័យ និងណែនាំឱ្យកែតម្រូវ»។
លោក ផាន អូន អគ្គនាយកនៃអគ្គនាយកដ្ឋាន ក.ប.ប. បានប្រាប់ ភ្នំពេញ ប៉ុស្តិ៍ នៅថ្ងៃទី ៣ តុលាថា ក្នុងឱកាសពិធីកាន់បិណ្ឌនិងភ្ជុំបិណ្ឌខាងមុខនេះ មន្ត្រីអគ្គនាយកដ្ឋាននៅទូទាំងប្រទេសនឹងនៅតែបន្តចុះត្រួតពពិនិត្យរាល់ទីតាំងស្ថានីយ និងដេប៉ូប្រេងឥន្ធនៈដដែល ដើម្បីចៀសវាងជនខិលខូចឆ្លៀតយកឱកាសនេះ កេញចំណេញលើអ្នកប្រើប្រាស់។
សូមជម្រាបថា ក្នុងរយៈពេលមួយខែនៃខែកញ្ញា មន្ត្រី ក.ប.ប. បានចុះត្រួតពិនិត្យស្ថានីយ/ដេប៉ូបប្រេងទូទាំងប្រទេសជិត ៥០០ ទីតាំង ដោយក្នុងនោះបានរកឃើញស្ថានីយ/ដេប៉ូប្រេងចំនួន ២២៤ ស្ថានីយ/ដេប៉ូផងដែលមានភាពមិនអនុលោមតាមច្បាប់ ហើយធ្វើការពិន័យតាមគោលការច្បាប់៕