.jpg)
ជនសង្ស័យត្រូវបាននគរបាលបញ្ជូនទៅតុលាការខេត្តបាត់ដំបងថ្ងៃនេះ ពាក់ព័ន្ធករណីរំលោភសេពសន្ថវៈក្មួយស្រីសាច់ថ្លៃ។ រូបថត ប៉ូលិស
នគរបាលប្រឆាំងការជួញដូរមនុស្សខេត្តបាត់ដំបង បញ្ជូនបុរសម្នាក់ទៅតុលាការខេត្តនៅថ្ងៃនេះ ពាក់ព័ន្ធការរំលោភសេពសន្ថវៈក្មួយស្រីសាច់ថ្លៃម្នាក់ នៅឃុំអូរតាគីស្រុកថ្មគោលខេត្តបាត់ដំបង។
លោកស្រី រស់ ជីវី ស្នងការរងទទួលផែននគរបាលប្រឆាំងការជួញដូរមនុស្ស និងការពារអនីតិជនខេត្តប្រាប់ ភ្នំពេញ ប៉ុស្តិ៍ នៅថ្ងៃទី ៣ តុលានេះថា ជនសង្ស័យឈ្មោះ ត្រា ថាវ អាយុ ៤៣ ឆ្នាំ ត្រូវបានសមត្ថកិច្ចរបស់លោកស្រីកសាងសំណុំរឿងបញ្ជូនទៅសាលាដំបូងខេត្តបាត់ដំបង នៅថ្ងៃទី ៣ តុលា។
លោកស្រីថា៖ «រឿងនេះ យើងបានសួរចម្លើយជនសង្ស័យរួចហើយ ហើយយើងបញ្ជូនគាត់ទៅតុលាការនៅថ្ងៃនេះ (ថ្ងៃទី ៣ តុលា)»។
លោក ឈួយ ទិត្យសុភា នាយនគរបាលប៉ុស្តិ៍ឃុំអូរតាគីឱ្យដឹងនៅថ្ងៃទី ៣ តុលាថា ក្មេងរងគ្រោះឈ្មោះ ម.ស អាយុ ១៣ ឆ្នាំ រស់នៅក្នុងឃុំអូរតា គីស្រុកថ្មគោលជាមួយជនសង្ស័យដែរ។
លោកប្រាប់ថា ការឃាត់ខ្លួនជនសង្ស័យគឺធ្វើតាមបណ្ដឹងរបស់ស្ត្រីម្នាក់អាយុ ៦៥ ឆ្នាំ ជាយាយបង្កើតរបស់ក្មេងរងគ្រោះកាលពីថ្ងៃទី ៣០ កញ្ញា ឆ្នាំ ២០២១ ដោយឪពុកម្តាយរបស់គេទៅធ្វើការនៅខេត្តឆ្ងាយ។ នៅក្នុងពាក្យបណ្តឹងបានចោទថាឈ្មោះ ត្រា ថាវ ភេទប្រុស (ត្រូវជាកូនប្រសារ) អាយុ ៤៣ ឆ្នាំ បានចាប់រំលោភចៅស្រីរបស់គាត់កាលពីវេលាម៉ោងប្រហែល ១០ យប់ ថ្ងៃទី ២៨ កញ្ញា ក្នុងបរិវេណដីឡូត៍នៃផ្ទះរបស់គាត់។
លោក ទិត្យសុភា បន្តថា ក្រោយទទួលបានពាក្យបណ្តឹងមកលោកបានរាយការណ៍ទៅលោកសេងលុចអធិការនគរបាលស្រុកថ្មគោលហើយលោកបានចាត់កម្លាំងចុះឃាត់ខ្លួនជនសង្ស័យនៅថ្ងៃទី ១ ខែ តុលា ឆ្នាំ ២០២១។
លោកបន្ថែមថា៖ «ជនសង្ស័យបានទទួលស្គាល់អំពីការប្រព្រឹត្តរបស់គាត់មែន។ គាត់ជាប្តីចុងរបស់មីងក្មេងរងគ្រោះផង»៕
