ភ្នំពេញៈ រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ ប្រកាសបើករដូវនេសាទសម្រាប់ការនេសាទក្នុងដែននេសាទទឹកសាប តាមបណ្ដារាជធានី-ខេត្ដ សម្រាប់រដូវបើកនេសាទ ឆ្នាំ ២០២១-២០២២ ក្នុងនោះខេត្ដមួយចំនួននឹងបើកនេសាទចាប់ពីថ្ងៃទី ១ ខែតុលា ដល់ថ្ងៃទី ៣១ ខែឧសភា និងមួយចំនួនទៀត ចាប់ពីថ្ងៃទី ១ ខែវិច្ឆិកា ដល់ថ្ងៃទី ៣០ ខែមិថុនាឆ្នាំក្រោយ។
រដ្ឋបាលជលផលបានជូនដំណឹងដល់សាធារណជន និងអ្នកនេសាទទាំងអស់ថា រដូវបើកនេសាទសម្រាប់ការនេសាទនៅក្នុងដែននេសាទទឹកសាប ត្រូវបានកំណត់ គឺចាប់ពីថ្ងៃទី ១ ខែតុលា ឆ្នាំ ២០២១ ដល់ថ្ងៃទី ៣១ ខែឧសភា ឆ្នាំ ២០២២ ចំពោះដែននេសាទទឹកសាប រួមមាន ខេត្តកំពង់ឆ្នាំង ពោធិ៍សាត់ បាត់ដំបង ប៉ៃលិន បន្ទាយមានជ័យ សៀមរាប ឧត្តរមានជ័យ ព្រះវិហារ រតនគិរី មណ្ឌលគិរី ក្រចេះ ត្បូងឃ្មុំ កំពង់ចាម កំពង់ធំ និងមួយផ្នែកនៃរាជធានីភ្នំពេញ និងខេត្តកណ្តាល ដែលស្ថិតនៅខាងជើងខ្សែស្របទន្លេចតុមុខ។ ដោយឡែក ខេត្តស្ទឹងត្រែង ចាប់ពីថ្ងៃទី ១ ខែតុលានេះ រហូតដល់ថ្ងៃទី ៣០ ខែមេសា ឆ្នាំ ២០២២។
ចំណែកការបើករដូវនេសាទនៅខេត្តព្រៃវែង ស្វាយរៀង តាកែវ កំពង់ស្ពឺ និង មួយផ្នែកនៃរាជធានីភ្នំពេញ និងខេត្តកណ្តាល ដែលស្ថិតនៅខាងត្បូងខ្សែស្របទន្លេចតុមុខ គឺចាប់ពីថ្ងៃទី ១ ខែវិច្ឆិកា ដល់ថ្ងៃទី ៣០ ខែមិថុនា ឆ្នាំ ២០២២។
រដ្ឋបាលជលផលបញ្ជាក់ថា៖ «នៅក្នុងរយៈពេលបើកនេសាទនេះ អ្នកនេសាទទាំងអស់ត្រូវប្រើឧបករណ៍នេសាទដែលអនុញ្ញាតឱ្យធ្វើ នេសាទក្នុងដែននេសាទទឹកសាប ស្របតាមច្បាប់ស្តីពីជលផល និងលិខិតបទដ្ឋានគតិយុត្តជាធរមាន»។
បើតាមរដ្ឋបាលជលផល ចំពោះអ្នកនេសាទដែលមានបំណងធ្វើនេសាទដោយប្រើប្រាស់ឧបករណ៍ «ម៉ាញ់» នៅដងទន្លេមេគង្គ និង ដងទន្លេសាប ក្នុងទីតាំងដែលរាជរដ្ឋាភិបាលបានអនុញ្ញាតត្រូវអញ្ជើញមកទំនាក់ទំនងសុំលិខិតអនុញ្ញាតពីមន្ទីរកសិកម្ម រុក្ខាប្រមាញ់ និងនេសាទរាជធានី ខេត្តពាក់ព័ន្ធ ដើម្បីទទួលការណែនាំពីសមត្ថកិច្ចជំនាញជលផលអំពីបច្ចេកទេស និង បទបញ្ជានានា ដែលពាក់ព័ន្ធដល់ការធ្វើនេសាទ៕
វីដេអូ៖