ភ្នំពេញៈ គ្រោះថ្នាក់ចរាចរណ៍ផ្លូវគោកទូទាំងប្រទេសសម្រាប់ថ្ងៃទី ២ តុលា បានកើតឡើងចំនួន ៨ ករណី បណ្ដាលឱ្យស្លាប់ចំនួន ៣ នាក់ និង ៨ នាក់ទៀតរងរបួស ក្នុងនោះរបួសធ្ងន់ ៥ នាក់ និងរបួសស្រាល ៣ នាក់ ដែលគ្រោះថ្នាក់នេះរាប់បញ្ចូលទាំង ១ ករណី ដែលបានកើតឡើងនៅផ្លូវជាតិលេខ ៤ ចន្លោះគីឡូម៉ែត្រលេខ ៧៤-៧៥ ក្នុងភូមិចេក ឃុំអូរ ស្រុកភ្នំស្រួច ខេត្តកំពង់ស្ពឺផងដែរ។
យោងតាមរបាយការណ៍របស់នាយកដ្ឋាននគរបាលចរាចរណ៍ និងសណ្តាប់សាធារណៈនៃអគ្គស្នងការដ្ឋាននគរបាលជាតិបានឱ្យដឹងថា គ្រោះថ្នាក់ចរាចរណ៍ផ្លូវគោកទូទាំងប្រទេសនៅថ្ងៃទី ២ ខែ តុលា ឆ្នាំ ២០២១ បណ្តាលឱ្យមនុស្សស្លាប់ចំនួន ៣ នាក់ (ស្រី ១ នាក់) របួសធ្ងន់ ៥ នាក់ និងរបួសស្រាល ៣ នាក់ (ស្រី ១ នាក់)។
តាមទិន្នន័យគ្រោះថ្នាក់ចរាចរណ៍ផ្លូវគោកទូទាំងប្រទេសនេះបញ្ជាក់ថា គ្រោះថ្នាក់ដែលបង្កឱ្យមានមនុស្សស្លាប់ និងរបួសចំនួន ១១ នាក់នេះ កើតឡើងដោយសារការប៉ះទង្គិចគ្នា បើកបរមិនគោរពសិទ្ធិ និងមិនប្រកាន់ស្ដាំ។
តាមរបាយការណ៍ដដែលចំពោះករណីគ្រោះថ្នាក់ចរាចរណ៍នៅថ្ងៃទី ២ ខែតុលា កាលពីម៉ោង ៥ និង ៤០ នាទីព្រឹក នៅលើផ្លូវជាតិលេខ ៤ ចន្លោះគីឡូម៉ែត្រលេខ ៧៤-៧៥ ក្នុងភូមិចេក ឃុំអូរ ស្រុកភ្នំស្រួច ខេត្តកំពង់ស្ពឺគឺកើតឡើងរវាងរថយន្ត ២ គ្រឿង បុកគ្នាបណ្តាលឱ្យមនុស្ស ៣ នាក់រងរបួសធ្ងន់។
របាយការណ៍នេះបានឱ្យដឹងថា រថយន្តទី ១ ម៉ាក Hyundai ពណ៌ស ពាក់ស្លាកលេខកោះកុង 3A-0782 បើកបរដោយឈ្មោះ សំ សុវណ្ណារ៉ុង ភេទប្រុស អាយុ ២៤ ឆ្នាំ រស់នៅភូមិចាំយាម ឃុំបាក់ខ្លង ស្រុកមណ្ឌលសីមា ខេត្តកោះកុង ដែលមានអ្នករួមដំណើរជាមួយ ឈ្មោះ ម៉ៅ ភេទប្រុស អាយុ ៣៥ ឆ្នាំ រស់នៅភូមិឃុំជាមួយគ្នាបានធ្វើដំណើរក្នុងទិសដៅពីកើតទៅលិច។
លុះមកដល់ចំណុចខាងលើបានបុកជាមួយរថយន្ត ១ គ្រឿងទៀត ម៉ាក Hyundai ពណ៌ខៀវ ពាក់ស្លាកលេខភ្នំពេញ 3J-0551 បើកបរដោយជនមិនទាន់ស្គាល់អត្តសញ្ញាណម្នាក់ដែលកំពុងបើកបរ
បញ្ច្រាសទិសគ្នាបណ្ដាលរបួសធ្ងន់ទាំង ៣ នាក់ និងបានបញ្ជូនទៅមន្ទីរពេទ្យទាំងអស់គ្នា។ នេះបើតាមរបាយការណ៍ដដែល។
បច្ចុប្បន្នរថយន្តទាំង ២ គ្រឿង ត្រូវបានសមត្ថកិច្ចអូសយកទៅរក្សាទុកនៅប៉ុស្តិ៍នគរបាលរដ្ឋបាលអូរនៃអធិការដ្ឋាននគរបាលស្រុកភ្នំស្រួច ដើម្បីដោះស្រាយតាមនីតិវិធី។ នេះបើតាមការបញ្ជាក់ក្នុងរបាយការណ៍៕