នាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាននៃអាជ្ញាធរជាតិអប្សរាចុះកាត់ក្រី និងដកហូតដើមចំនួន ១៦ ដើម ដែលជាដើមឈើមានហានិភ័យខ្ពស់ និងបាំងទេសភាពនៅបរិវេណប្រាសាទក្រវ៉ាន់ដើម្បីចៀសវាងគ្រោះថ្នាក់ប៉ះពាល់ដល់អាយុជីវិត។
ការចុះបំពេញសកម្មភាពនេះបានធ្វើឡើងនៅចុងសប្តាហ៍នេះ បន្ទាប់ក្រុមការងារនាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន រួមជាមួយផ្នែកពាក់ព័ន្ធបានចុះពិនិត្យ និងអនុវត្តវិធានការបន្ទាន់ចំពោះដើមឈើចំនួន ១៦ ដើម ដែលមានហានិភ័យខ្ពស់ នៅបរិវេណប្រាសាទក្រវ៉ាន់។
នាយកដ្ឋានគ្រប់គ្រងព្រៃឈើបានបញ្ជាក់ថា៖ «ការងារធ្វើឡើង ដើម្បីធានាសុវត្ថិភាពជូនភ្ញៀវទេសចរ ចៀសវាងគ្រោះថ្នាក់ប៉ះពាល់ដល់អាយុជីវិត និងបង្កលក្ខណៈងាយស្រួលសម្រាប់ការទស្សនាទេសភាព ជុំវិញប្រាសាទក្រវ៉ាន់ផង»។
បើតាមនាយកដ្ឋាននេះដើមឈើដែលបានកាត់ដកហូតរួមមាន ដើមអំពិលងាប់ ១ ដើម និងពុទ្រា ៣ ដើម (ផ្កាមានក្លិនស្អុយ)។ ចំណែកឯដើមឈើដែលបានកាត់ក្រីមែក ១២ ដើម រួមមាន ឈើទាល ១០ ដើម អង្កាញ់ ១ ដើម និងត្រាងអោបចំបក់ ១ ដើម ដែលមានមែកសាខាច្រើន ដុះក្បែរប្រាសាទ និងផ្លូវចូលប្រាសាទ ត្រូវបានកាត់ក្រី ៣៧ មែកចេញ ដើម្បីសម្រាលតួដើម ចៀសវាងដួលរលំមកលើប្រាសាទ និងភ្ញៀវទេសចរ។
សូមជម្រាបថាប្រាសាទក្រវ៉ាន់មានទីតាំងស្ថិតនៅខាងកើតប្រាសាទអង្គរវត្ត និងខាងត្បូងប្រាសាទបន្ទាយក្តី ត្រូវបានកសាងនៅឆ្នាំ ៩២១ ក្នុងរាជព្រះបាទហស៌វរ្ម័នទី១ ឧទ្ទិសដល់ព្រះវិស្ណុ (ព្រះនារាយណ៍) ក្នុងព្រហ្មញ្ញសាសនា។
អាជ្ញាធរជាតិអប្សរាបានអះអាងថាភ្ញៀវទេសចរតែងតែលង់នឹងសម្រស់ដ៏ស្រស់ត្រកាល ព្រមទាំងផ្ដិតយករូបភាពស្អាតៗរបស់ប្រាសាទក្រវ៉ាន់ ដែលមានវ័យចំណាស់ក្នុងចំណោមប្រាង្គប្រាសាទបុរាណនានា ខណៈដែលប្រាសាទសង់ពីឥដ្ឋនេះ មានតួប៉មប្រាំដែលបែរមុខទៅទិសខាងកើត និងមានចម្លាក់នៅលើឥដ្ឋមានលក្ខណៈល្អឥតខ្ចោះ ដោយរំលេចនូវរូបភាព និងក្បូរក្បាច់ចម្លាក់ច្បាស់ៗគួរឱ្យចង់គយគន់។ ទោះបីជាប្រាសាទនេះមានលក្ខណៈតូច ប៉ុន្តែចម្លាក់ឥដ្ឋទាំងនោះនៅមានលក្ខណៈល្អឥតខ្ចោះ និងជាទីគាប់ចិត្តសម្រាប់ភ្ញៀវទេសចរ។ នេះបើតាមការអះអាងរបស់ស្ថាប័ននេះ៕