.jpg)
នគរបាលស្រុកគិរីវង់ ចុះកាប់និងដុតបំផ្លាញដំណាំកញ្ឆាដែលលួចដាំខុសច្បាប់នៅចំណុចដុបដាដំរីលេង ស្ថិតក្នុងភូមិសាស្ត្រ ឃុំព្រះបាទជាន់ជុំ ស្រុកគិរីវង់ កាលពីថ្ងៃទី ០២ តុលា ២០២១។ រូបថត Police
ខេត្តតាកែវៈ កម្លាំងនគរបាលនៃស្នងការដ្ឋាននគរបាលស្រុកគិរីវង់ បន្តចុះទៅកាប់ដុតបំផ្លាញដំណាំកញ្ឆាដែលជនខិលខូចលួចដាំខុសច្បាប់បានចំនួន ៤ ទីតាំង និងអាងស្តុកទឹកចំនួន ៣ អាង នៅចំណុចដុបដាដំរីលេង ស្ថិតក្នុងភូមិសាស្ត្រ ឃុំព្រះបាទជាន់ជុំ ស្រុកគិរីវង់។ លោក យុគ សារ៉ាត អធិការនគរបាលស្រុកគិរីវង់ ថ្លែងប្រាប់ភ្នំពេញប៉ុស្ដិ៍នៅថ្ងៃទី៣ ខែតុលានេះ។
លោក យុគ សារ៉ាត បានថ្លែងថា ការបន្តចុះកាប់ដុតបំផ្លាញដំណាំកញ្ឆាដែលជនខិលខូចលួចដាំខុសច្បាប់នេះ គឺអនុវត្តន៍តាមការណែនាំ និងបទបញ្ជាដឹកនាំ របស់លោក សុខ សំណាង ស្នងការ នៃស្នងការដ្ឋាននគរបាលខេត្តតាកែវ ក្នុងការបន្តសកម្មភាពរបស់កងកម្លាំងនគរបាលខេត្ដ ចុះជាប្រចាំក្នុងការ បង្ការទប់ស្កាត់បង្ក្រាបបទល្មើសដំណាំកញ្ឆាខុសច្បាប់ឱ្យដូចភ្លៀងរលឹម និងជាពិសេសអនុវត្តន៍គោលនយោបាយភូមិ ឃុំ មានសុវត្ថិភាព។
លោកបានឱ្យដឹងថា នៅថ្ងៃទី២ ខែតុលា ឆ្នាំ២០២១ លោកបានដឹកនាំកម្លាំងជំនាញអធិការដ្ឋាននគរបាលស្រុក សហការជាមួយកម្លាំងប៉ុស្តិ៍នគរបាលរដ្ឋបាលទាំង ១២ ប៉ុស្តិ៍ ឡើងលើភ្នំស្វែងរុករក និងកាប់ដុតបំផ្លាញដំណាំកញ្ឆាដែលលួចដាំខុសច្បាប់បានចំនួន ៤ ទីតាំង អាងស្តុកទឹកចំនួន ៤ អាង នៅចំណុចដុបដាដំរីលេង ស្ថិតក្នុងភូមិសាស្ត្រ ឃុំព្រះបាទជាន់ជុំ ស្រុកគិរីវង់ ដែលមានផ្ទៃដីដាំដុះប្រមាណ ៤៣៧ ម៉ែត្រការ៉េ។
លោក យុគ សារ៉ាត បញ្ជាក់ថា៖«បច្ចុប្បន្ន កម្លាំងជំនាញកំពុងស្រាវជ្រាវស្វែងរកម្ចាស់ទីតាំងជាអ្នកដាំដំណាំកញ្ឆាខាងលើ ដើម្បីយកមកផ្តន្ទាទោសតាមផ្លូវច្បាប់ផងដែរ»។
លោក លី សាវេត អ្នកនាំពាក្យរដ្ឋបាលខេត្ដតាកែវ បានឱ្យដឹងថា សកម្មភាពជនខិលខូចលួចដាំកញ្ជា តែងតែកើតមានឡើង ពី ៣ ទៅ ៤ លើកក្នុង ១ ឆ្នាំៗ នៅក្នុងភូមិសាស្ដ្រខេត្ដតាកែវ។ ជនខិលខូចលួចដាំកញ្ឆានេះ នៅតាមទីតាំងចន្លោះភ្នំ ព្រោះអំណោយផលចំពោះការលូតលាស់។ ហើយភូមិសាស្ដ្រដែលជនខិលខូចលួចដាំនេះ បង្កផលលំបាកដល់សមត្ថកិច្ចក្នុងការស្វែងរក និងបង្ក្រាប។
លោកថ្លែងថា៖«អ្នកដាំដំណាំកញ្ឆា ភាគច្រើនជាពលរដ្ឋក្រីក្រ ពួកគាត់លួចដាំ ដើម្បីយកទៅធ្វើជាកញ្ឆាក្រៀម រួចលក់បន្តទៅឱ្យឈ្នួញ។ ក្រោយបង្ក្រាបបាន សមត្ថកិច្ចយើងបានឱ្យពលរដ្ឋធ្វើកិច្ចសន្យាបញ្ឈប់សកម្មភាព។ យើងមិនបានដាក់ទោសទណ្ឌធ្ងន់ធ្ងរដល់ពួកគាត់ទេ ព្រោះមិនមែនជាការប្រព្រឹត្តទ្រង់ទ្រាយធំ»។
លោក សាវេត បានឱ្យដឹងថា មូលហេតុដែលពលរដ្ឋបន្តលួចដាំដំណាំកញ្ឆានេះ ដោយសារយកទៅលក់ឱ្យឈ្មួញបានតម្លៃថ្លៃ ដូច្នេះទើបពួកគាត់ ប្រថុយដាំ ទោះបីជាសមត្ថកិច្ចចុះទៅបង្ក្រាប និងឱ្យធ្វើកិច្ចសន្យាជាបន្តបន្ទាប់ក៏ដោយ៕
