ភ្នំពេញៈ វិស័យឯកជន និងសាធារណៈកាលពីថ្ងៃទី ៣០ ខែកញ្ញា ឆ្នាំ ២០២១ បានដាក់ឱ្យប្រើប្រាស់វីដេអូចំណេះដឹងហិរញ្ញវត្ថុ និងមគ្គុទ្ទេសក៍ហិរញ្ញវត្ថុ” ក្រោមជំនួយពី ទីភ្នាក់ងារជំនួយអាមេរិក USAID ដើម្បីដំណោះស្រាយដល់សហគ្រិនស្រី្តឱ្យមានលទ្ធភាពទទួលបានហិរញ្ញវត្ថុ។
តាមរយៈសេចក្តីប្រកាសព័ត៌មានចេញផ្សាយនៅថ្ងៃទី ៣ ខែតុលា ឆ្នាំ ២០២១ លោកស្រី ជា សិរី អគ្គនាយកបច្ចេកទេសធនាគារជាតិនៃកម្ពុជាបានលើកឡើងថា វីដេអូ ចំណេះដឹងផ្នែកហិរញ្ញវត្ថុ និងមគ្គុទ្ទេសក៍ហិរញ្ញវត្ថុនេះនឹងផ្តល់ជាមាគ៌ាដល់សាធារណជនទូទៅ អ្នកប្រើប្រាស់សេវាហិរញ្ញវត្ថុ ជាពិសេសសហគ្រិនស្ត្រីវ័យក្មេងឱ្យយល់ដឹងពីដំណើរការពេញលេញ ការទទួលបាន និងប្រើប្រាស់សេវាហិរញ្ញវត្ថុប្រកបដោយគុណភាព ប្រសិទ្ធភាព និងភាពវៃឆ្លាត។
លោកស្រី សាប៊ីន ឃៅគឹស ប្រធានអង្គការផេកកម្ពុជា និងជាប្រធានគ្រប់គ្រងគម្រោងសហគ្រិននារីសកម្មបានឱ្យដឹងដែរថា មគ្គុទ្ទេសក៍ហិរញ្ញវត្ថុ វីដេអូចំណេះដឹងហិរញ្ញវត្ថុ និងផលិតផលហិរញ្ញប្បទានទាំងនេះមានគោលបំណងដោះស្រាយបញ្ហាជាច្រើនជុំវិញការទទួលបានហិរញ្ញវត្ថុសម្រាប់សហគ្រិនស្ត្រីវ័យក្មេង។
លោកស្រីបន្តថា វិធីសាស្ត្រដោះស្រាយដោយបង្កើនចំណេះដឹង ការយល់ដឹង ក៏ដូចជាការផ្តល់លទ្ធភាពទទួលបានហិរញ្ញវត្ថុយ៉ាងពិតប្រាកដអាចជាវិធីសាស្ត្រត្រឹមត្រូវក្នុងការផ្ដល់ឱ្យស្ត្រីនូវលទ្ធភាពទទួលបានហិរញ្ញវត្ថុ។
លោកស្រីថ្លែងថា៖ «យើងនឹងធ្វើឱ្យសម្ភារទាំងនេះអាចប្រើប្រាស់បានសម្រាប់ដៃគូដែលធ្វើការផ្នែកហិរញ្ញវត្ថុ និងអង្គភាពពាក់ព័ន្ធដទៃទៀត»។
បើតាមលោកស្រី សាប៊ីន ឃៅគឹស អ្នកចូលរួមជាង ២០០ នាក់ដែលតំណាងឱ្យភាគីពាក់ព័ន្ធសំខាន់ៗក្នុងព្រឹត្តិការណ៍នេះរួមមានស្ថានទូតអាមេរិក ធនាគារជាតិនៃកម្ពុជា សមាគមធនាគារនៅកម្ពុជា សមាគមមីក្រូហិរញ្ញវត្ថុកម្ពុជា ក្រុមហ៊ុនវីង ក្រុមហ៊ុនប៊ូសខេភីថល ក្រុមហ៊ុន ស៊ី-អ៊ីនវេសមិន និងក្រុមសន្សំប្រាក់នារី ក៏ដូចជាដៃគូអភិវឌ្ឍន៍ អង្គការក្រៅរដ្ឋាភិបាល ស្ថាប័នហិរញ្ញវត្ថុ វិទ្យាស្ថានអប់រំ ស្ថាប័នរដ្ឋ និងសហគ្រិនស្ត្រីវ័យក្មេង។
លោក ម៉ានូ រ៉ាចាន់ អគ្គនាយកនៃក្រុមហ៊ុនវីងថ្លែងថា ស្ត្រីដើរតួនាទីយ៉ាងសំខាន់នៅក្នុងសេដ្ឋកិច្ចកម្ពុជា។ ពួកគេគ្រប់គ្រងអាជីវកម្មខ្នាតតូច ហើយជាធម្មតាទទួលខុសត្រូវចំពោះលំហូរ សាច់ប្រាក់សម្រាប់គ្រួសាររៀងៗខ្លួនទៀតផង។ ចំណេះដឹងផ្នែកហិរញ្ញវត្ថុគឺជាឧបករណ៍ដ៏សំខាន់សម្រាប់សហគ្រិនស្ត្រី ព្រោះវាផ្តល់ឱ្យពួកគេនូវចំណេះដឹងដ៏សំខាន់ដែលអនុញ្ញាតឱ្យពួកគេគ្រប់គ្រងថវិការបស់ពួកគេប្រកបដោយប្រសិទ្ធភាព និងប្រសិទ្ធផល"។
លោកបន្តថា មគ្គុទ្ទេសក៍ហិរញ្ញវត្ថុ ជាផែនទី ជួយសហគ្រិនស្ត្រីវ័យក្មេង ក្នុងការសម្រេចចិត្តដ៏មានប្រសិទ្ធភាពមុននឹងធ្វើការសន្និដ្ឋានថា តើពួកគេត្រូវការហិរញ្ញវត្ថុ និងកំណត់ប្រភេទនៃហិរញ្ញវត្ថុសមស្របនឹងលក្ខខណ្ឌរបស់ពួកគាត់រួមមាន ទំហំអាជីវកម្ម កម្រិតនៃការអភិវឌ្ឍ ទំហំលទ្ធភាពទទួលបានហិរញ្ញប្បទាន ការផ្លាស់ប្តូរបរិយាកាស និងលទ្ធភាពទទួលបានចំណេះដឹងហិរញ្ញវត្ថុជាដើម។ មគ្គុទ្ទេសក៍ហិរញ្ញវត្ថុនេះក៏បានភ្ជាប់នឹងតំណផ្សេងៗដែលអង្គការផ្សេងទៀតបានផលិតពាក់ព័ន្ធនឹងប្រធានបទនេះ។
លោកស្រី ស៊ីលា ប៊យ សហស្ថាបនិក និងនាយិកាប្រចាំក្រុមហ៊ុនស៊ីម៉ិនវេសមិនបានថ្លែងថា គម្រោងនេះពិតជាបង្ហាញកិច្ចសហការរវាងវិស័យសាធារណៈ និងឯកជនដោយផ្តោតលើសហគ្រិនស្ត្រីវ័យក្មេង និងសំឡេងរបស់ពួកគាត់។
លោកស្រីបញ្ជាក់ថា៖ «យើងមានមោទនភាព និងរីករាយដែលបានចូលរួមចំណែករហូតមកដល់ពេលនេះ ហើយទន្ទឹងរង់ចាំមើលធនធានទាំងនេះជួយស្ត្រីក្នុងការសម្រេចចិត្តពីហិរញ្ញវត្ថុ ដោយមានព័ត៌មានច្បាស់លាស់នាពេលអនាគត» ។
លោកស្រី បន្តថា វីដេអូចំណេះដឹងហិរញ្ញវត្ថុ ៩ វគ្គនឹងលើកកម្ពស់ការយល់ដឹង និងបង្កើនចំណេះដឹងទាក់ទងនឹងមូលដ្ឋានគ្រឹះហិរញ្ញវត្ថុដល់សហគ្រិនស្ត្រីវ័យក្មេងដើម្បីពង្រឹងអាជីវកម្មរបស់ពួកគាត់។ អ្នកចូលរួមបានដឹងព័ត៌មានអំពីបញ្ហា លទ្ធភាពទទួលបានហិរញ្ញវត្ថុ និងជម្រើសហិរញ្ញប្បទានប្រកបដោយសុវត្ថិភាព ដើម្បីឱ្យសហគ្រិនស្ត្រីវ័យក្មេងពង្រីកអាជីវកម្មរបស់ពួកគាត់។
លោក គា បូរាណ ប្រធានក្រុមប្រឹក្សាភិបាលនៃសមាគមមីក្រូហិរញ្ញវត្ថុកម្ពុជា និងជាតំណាងសមាគមធនាគារនៅកម្ពុជាបានថ្លែងដែរថា ខ្សែវីដេអូទាំង ៩ អមជាមួយមគ្គុទ្ទេសក៍ហិរញ្ញវត្ថុ ពិតជាមានភាពចាំបាច់ណាស់ក្នុងការជួយដល់សហគ្រិនកម្ពុជាពិសេសស្ត្រីឱ្យមានសមត្ថភាពក្នុងការគ្រប់គ្រងហិរញ្ញវត្ថុអាជីវកម្ម និងផ្ទាល់ខ្លួនផងដែរ ពិសេសក្នុងបរិបទនៃផលប៉ះពាល់ដោយជំងឺកូវីដ ១៩។
លោកបានបន្តថា ការរៀបចំហិរញ្ញវត្ថុបានល្អក៏នឹងផ្តល់ភាពងាយស្រួលដល់សហគ្រិនក្នុងការទទួលបាននូវសេវាហិរញ្ញវត្ថុ នៅពេលដែលពួកគាត់មានបំណងចង់ពង្រីក អាជីវកម្ម ដើម្បីឱ្យកាន់តែរីកចម្រើន៕