មន្ត្រីបច្ចេកទេសនៃអាជ្ញាធរជាតិព្រះវិហារ និងអ្នកជំនាញការរបស់គណៈកម្មាធិការបេតិកភណ្ឌពិភពលោក ចុះត្រួតពិនិត្យប្រាសាទមួយចំនួនក្នុងរមណីយដ្ឋានប្រាសាទកោះកេរ ដើម្បីធ្វើការវាយតម្លៃមុននឹងសម្រេចដាក់បញ្ចូលជាបេតិកភណ្ឌពិភពលោក នៅខែកក្កដា ឆ្នាំ ២០២២ ខាងមុខ។
កាលពីថ្ងៃទី ៣ ខែតុលា ឆ្នាំ ២០២១ មន្ត្រីបច្ចេកទេសនៃអាជ្ញាធរជាតិព្រះវិហារ និងអ្នកជំនាញការបានចុះត្រួតពិនិត្យប្រាសាទមួយចំនួន ដូចជា ត្រពាំងអង្គខ្នា ប្រាសាទក្ទម្ព ប្រាសាទដំរី ប្រាសាទស្រឡៅ ប្រាសាទក្រចាប់ ប្រាសាទបន្ទាយពីរជាន់ ប្រាសាទប្រាង្គ ប្រាសាទតាម៉ែន រហាល ប្រាសាទចិន និងប្រាសាទប្រាំ។ ប្រាសាទទាំងនេះ គឺស្ថិតក្នុងចំណោមប្រាសាទប្រមាណជា ៥០ ប្រាសាទ ដែលមានក្នុងរមណីយដ្ឋានប្រាសាទកោះកេរ។
លោក គង់ ពុទ្ធិកា អគ្គនាយកអាជ្ញាធរជាតិព្រះវិហារ ជាអ្នកដឹកនាំការស្រាវជ្រាវលើលក្ខណសម្បត្តិនៃប្រាសាទកោះកេរបានប្រាប់ភ្នំពេញប៉ុស្តិ៍នៅថ្ងៃទី ៤ តុលា ថា ការចុះពិនិត្យនេះ គឺធ្វើឡើងដើម្បីវាយតម្លៃជាចុងក្រោយរបស់អ្នកជំនាញការ ក្រោយបានប្រជុំដើម្បីពិភាក្សាពីផែនការទេសចរណ៍ក្នុងរមណីយដ្ឋានប្រាសាទកោះកេរមុនបញ្ចូលជាបេតិកភណ្ឌពិភពលោក។
លោកបន្តថា៖ «ការចុះពិនិត្យនេះ គឺមិនមែនចុះបញ្ចីតែប្រាសាទណាមួយទេ គឺយើងនឹងពិនិត្យលើការចុះបញ្ចីជាតំបន់ ដែលយើងបែងចែកជា ៣ តំបន់ គឺតំបន់ស្នូល តំបន់ត្រនាប់ និងតំបន់រណប ដែលកម្ពុជា បានស្នើទៅគណៈកម្មាធិការបេតិកភណ្ឌពិភពលោក កាលពីឆ្នាំ ២០២០»។
លោកបន្តថា៖ «ការចុះពិនិត្យរបស់អ្នកជំនាញការនេះ គឺដើម្បីវាយតម្លៃលើតំបន់ទាំង ៣ នេះ ដើម្បីគណៈកម្មាធិការបេតិកភណ្ឌពិភពលោក ពិចារណាថា គួរចុះ ឬមិនគួរចុះបញ្ជីរមណីដ្ឋានកោះកេរនេះ ជាសម្បត្តិបេតិកភណ្ឌពិភពលោក។ អីចឹង បន្ទាប់ពីយើងបានដាក់ឯកសារនេះហើយ គេត្រូវបញ្ចូនអ្នកជំនាញការមកពិនិត្យ និងផ្តល់យោបល់មកឱ្យគណៈកម្មាធិការនេះវិញ»។
បើតាម លោក គង់ ពុទ្ធិកា ការសម្រេចជាលើកចុងក្រោយរបស់គណៈកម្មាធិការបេតិកភណ្ឌពិភពលោក ថានឹងទទួលស្គាល់រមណីយដ្ឋានប្រាសាទកោះកេរនេះ ជាសម្បត្តិបេតិកភណ្ឌពិភពលោកឬយ៉ាងណានោះ នឹងធ្វើឡើង នៅក្នុងកិច្ចប្រជុំរបស់ខ្លួន ដែលនឹងធ្វើឡើងនៅក្នុងខែកក្កដា ឆ្នាំ ២០២២។
លោកបន្ថែមថា ដោយក្រុមជំនាញការនឹងធ្វើការសម្រេចដោយសំអាងទៅលើភ័ស្ដុតាងសំខាន់ៗចំនួន ៣ ធំ ដូចជា គុណតម្លៃនៃប្រាសាទ ការចូលរួមរបស់សហគមន៍ និងសមិទ្ធភាពនៃការគ្រប់គ្រងរបស់កម្ពុជា លើរមណីយដ្ឋានប្រាសាទកោះកេរនេះ។
តាមអាជ្ញាធរជាតិនេះបានឱ្យដឹងថា ប្រាសាទកោះកេរស្ថិតនៅក្នុងភូមិស្រយ៉ង់ជើង ឃុំស្រយ៉ង់ ស្រុកគូលែនខេត្តព្រះវិហារចម្ងាយប្រមាណ ៧២ គីឡូម៉ែត្រពីខេត្តសៀមរាប ប្រសិនបើធ្វើដំណើរតាមបណ្តោយផ្លូវ ២១១ និង ៤៩ គីឡូម៉ែត្រពីទីរួមខេត្តព្រះវិហារ៕