កំពង់ធំៈ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ធំ ដឹកនាំក្រុមការងារចុះចែកកូនកង្កែប ២២ ២៤០ ក្បាល និងកង្កែបមេពូជ ៩ គូ ដល់ពលរដ្ឋ ៥៩ គ្រួសារ នៅឃុំម្សារក្រង ស្រុកស្ទោង នៅព្រឹកថ្ងៃទី ៤ ខែតុលានេះ។
ហ្វេសប៊ុក មន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ធំ នៅព្រឹកថ្ងៃទី ៤ ខែតុលានេះ បានឱ្យដឹងថា លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ និង ជាប្រធានអនុកម្មវិធីផ្សព្វផ្សាយ បច្ចេកទេសកសិកម្មថ្មី ដែលធន់នឹងការប្រែប្រួលអាកាសធាតុ (ASPIRE ) ខេត្តកំពង់ធំ បានដឹកនាំក្រុមការងារ អនុកម្មវិធី និងមន្ត្រីជំនាញ ចុះចែកទុនសហវិនិយោគធាតុចូលគាំទ្រដោយកម្មវិធី ASPIRE។
ក្នុងហ្វេសប៊ុកដដែលបញ្ជាក់ថា លោកប្រធានមន្ទីរកសិកម្មបាននាំយកកូនកង្កែបជាង ២ ម៉ឺនក្បាលទៅចែកពលរដ្ឋ ៥៩ គ្រួសារ។ កូនកង្កែប ២២ ២៤០ ក្បាល កង្កែបមេពូជ ៩ គូ ដល់ បណ្ដុំអាជីវកម្មចិញ្ចឹមកង្កែប ចំនួន ៥៩ គ្រូសារ នៅឃុំ ម្សារក្រង ស្រុកស្ទោង ដោយ មានការចូលរួមសហការពីអាជ្ញាធរស្រុក ឃុំ ភូមិ»។
នៅថ្ងៃដដែលនេះ លោកប្រធានមន្ទីរកសិកម្មក៏ បានចុះពិនិត្យ តាមដាន វឌ្ឍនភាព កសិករ គំរូ ជាសមាជិកបណ្ដុំអាជីវកម្មចិញ្ចឹមត្រី ឈ្មោះ ហ៊ាង កាក់ហុង ក្រោយទទួលបានធាតុចូលពីកម្មវិធីកន្លងមក ដើម្បីស្វែងយល់បន្ថែមពីបញ្ហាប្រឈមនានា តម្រូវការបន្ថែម និងជំរុញណែនាំបន្ថែម នៅឃុំចំណារក្រោម ស្រុកស្ទោងផងដែរ៕