.jpg)
លោក អ៊ុំ រាត្រី អភិបាលខេត្តបន្ទាយមានជ័យ យកអំណោយចែកជូនប្រជាពលរដ្ឋរងគ្រោះដោយសារទឹកជំនន់ កាលពីថ្ងៃទី ២ តុលា។ រូបថត រដ្ឋបាលខេត្ត
អាជ្ញាធរខេត្តបន្ទាយមានជ័យបានឱ្យដឹងថា ទឹកជំនន់នៅក្នុងខេត្តនេះ ចាប់ផ្ដើមស្រកចុះជាបណ្តើរៗហើយ បន្ទាប់ពីគ្មានភ្លៀងធ្លាក់ ហើយការបង្ហូរទឹកពីប្រទេសថៃ ក៏បានថយចុះ ខណៈពលរដ្ឋមួយចំនួនបានវិលត្រឡប់ទៅកាន់លំនៅឋានវិញ។
លោក អ៊ុំ រាត្រី អភិបាលខេត្តបន្ទាយមានជ័យបានប្រកាសកាលពីថ្ងៃទី ៣ តុលាថា៖ «នៅទីនេះស្ថានភាពអាកាសធាតុល្អប៉ុន្មាន ៤ ទៅ ៥ ថ្ងៃនេះ មានភ្លៀងខ្លះដែរ គ្រាន់មានស្រុកខ្លះភ្លៀងតិចតួចហើយទឹកក៏ស្រកអស់ច្រើនពីខាងលើនៅតែស្រុកមង្គលបុរី និងក្រុងសិរីសោភ័ណទេ»។
យ៉ាងណាលោក អ៊ុំ រាត្រី បានអះអាងថា បើទោះជាក្រុង និងស្រុកទាំង ២ នេះ មានលក្ខណៈស្រកយឺត ក៏ប៉ុន្តែចំពោះស្ទឹងសិរីសោភ័ណ្ឌ និងស្ទឹងមង្គលបុរីគឺបានស្រកចុះជាបណ្តើរៗ ចន្លោះពី ២ ទៅ ៣ ហ៊ុនផងដែរ។
លោកបានបន្តថា៖ «សម្រាប់ប្រជាពលរដ្ឋដែលបានរកទីទួលសុវត្ថិភាពមិនទាន់មានការកើនឡើងទៀតទេ ហើយនៅប៉ោយប៉ែតប្រជាពលរដ្ឋដែលបានផ្លាស់ទីមកទីទួលសុវត្ថិភាពក៏បានវិលប្រឡប់វិញមួយចំនួនដែលមានជាង ១០០ គ្រួសារ»៕
វីដេអូ៖
