ភ្នំពេញៈ កងកម្លាំងមួកខៀវកម្ពុជាជិត ៣០០ នាក់ បានធ្វើមាតុភូមិនិវត្តន៍មកកម្ពុជាវិញ ក្រោយបញ្ចប់បេសកកម្មក្រោមឆត្រអង្គការសហប្រជាជាតិរយៈពេល ១ ឆ្នាំ ក្នុងតំបន់ MINUSMA នៃប្រទេសម៉ាលីប្រកបដោយជោគជ័យ។ នេះបើតាមលោក សែម សុវណ្ណនី អនុប្រធានគណៈកម្មាធិការជាតិ និងជាអគ្គនាយកមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាម នាព្រឹកថ្ងៃទី ៤ ខែ ធ្នូ ឆ្នាំ ២០២១ នេះ។
ថ្លែងនៅក្នុងពិធីទទួលស្វាគមន៍ការត្រឡប់មកដល់នៃកងកម្លាំងមួកខៀវកម្ពុជាទាំង ២៩៨ នាក់ នៅព្រលានយន្តហោះអន្តរជាតិភ្នំពេញ លោក សុវណ្ណនី បានលើកឡើងថា ដើម្បីធានាថា គ្មានកងទ័ពមួកខៀវណាម្នាក់មានវិជ្ជមានជំងឺកូវីដ ១៩ ក្រោយបញ្ចប់បេសកកម្មនៅប្រទេសម៉ាលី កងកម្លាំងទាំងអស់នឹងត្រូវបញ្ជូនទៅធ្វើចត្តាឡីស័កតាមវិធានសុខាភិបាលរយៈពេល ២១ ថ្ងៃ នៅសាលាហ្វឹកហ្វឺនកងកម្លាំងរក្សាសន្តិភាពពហុជាតិ ក្នុងខេត្តកំពង់ស្ពឺ និងតម្រូវឱ្យធ្វើចត្តាឡីស័កនៅផ្ទះរៀងៗខ្លួនរយៈពេល ១៤ ថ្ងៃបន្ថែមទៀត។
លោកបានបញ្ជាក់ថា៖ «ការបញ្ជូនកងកម្លាំងទាំង ២ ក្រុម [ក្រុមកម្ទេចគ្រឿងផ្ទុះលេខ ៨៨២ និងក្រុមកងវិស្វកម្មព្រលានយន្តហោះលេខ ៩៧២] ទាំង ២៩៨ នាក់ ទៅធ្វើចត្តាឡីស័កតាមវិធាន
សុខាភិបាលនេះ គឺដើម្បីស្វែងរកជំងឺកូវីដ ១៩ បើទោះបីជាកងទ័ពរបស់យើង បានធ្វើតេស្តនៅប្រទេសដែលបំពេញបេសកកម្មរកមិនឃើញមានវិជ្ជមានជំងឺកូវីដ ១៩ ក៏ដោយ ដែលនេះគឺជាការយកចិត្តទុកដាក់យ៉ាងធំធេងពីសុខភាពពីសំណាក់ថ្នាក់ដឹកនាំ»។
បើតាមលោក សុវណ្ណនី ក្នុងចំណោមកងកម្លាំងមួកខៀវទាំង ២៩៨ នាក់នោះ មាន ២៥ នាក់ជាស្ត្រី។ ជាមួយគ្នានេះ លោកបានលើកយកការផ្តាំផ្ញើ និងសេចក្ដីនឹករឭក ពីសំណាក់លោកនាយករដ្ឋមន្ត្រី ហ៊ុន សែន, ថ្នាក់ដឹកនាំក្រសួងការពារជាតិ, ក្រសួងការបរទេស និងសហប្រតិបត្តិការអន្តរជាតិដល់កងកម្លាំងដែលទើបបញ្ចប់បេសកកម្មស្វែងរកសន្តិភាពទាំងអស់ផងដែរ ចំពោះការលះបង់គ្រប់បែបយ៉ាងដើម្បីលើកស្ទួយកិត្តិយសកម្ពុជានៅលើឆាកអន្តរជាតិ។
គិតចាប់តាំងពីឆ្នាំ ២០០៦ រហូតមកទល់ពេលនេះ កម្ពុជាបានបញ្ជូនកងកម្លាំងរក្សាសន្តិភាព ជាង ៧ ពាន់នាក់ទៅបំពេញបេសកកម្ម មនុស្សធម៌ ក្រោមឆត្រអង្គការសហប្រជាជាតិ នៅក្នុងប្រទេសចំនួន ៩ រួមមាន៖ ស៊ូដង់ ស៊ូដង់ខាងត្បូង, ឆាដ, លីបង់, ស៊ីរី, ម៉ាលី, អាហ្វ្រិកកណ្តាល សាយប្រឺស និងយ៉េមែន។
ដោយឡែកបច្ចុប្បន្នកម្ពុជាមានកម្លាំងកងទ័ពមួកខៀវជិត ៨០០ នាក់ ក្នុងនោះមាននារីជិត ៨០ នាក់ បាននិងកំពុងបំពេញបេសកកម្មរក្សាសន្តិភាពក្រោមឆត្រអង្គការសហប្រជាជាតិនៅប្រទេសលីបង់ ស៊ូដង់ ស៊ូដង់ខាងត្បូង ម៉ាលី និងសាធារណរដ្ឋអាហ្វ្រិកកណ្តាល៕