.jpg)
លោក ប្រាក់ សុខុន រដ្ឋមន្ត្រីក្រសួងការបរទេស ក្នុងជំនួបជាមួយលោក Christian Berger ឯកអគ្គរដ្ឋទូតអាល្លឺម៉ង់ប្រចាំកម្ពុជា កាលពីឆ្នាំ ២០១៩។ រូបថត ក្រសួងការបរទេស
ភ្នំពេញៈ លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងលោក ហ៊ុន ម៉ានី សមាជិករដ្ឋសភាកម្ពុជា បានផ្ញើសារជូន លោក Christian Berger ឯកអគ្គរដ្ឋទូតអាល្លឺម៉ង់ប្រចាំកម្ពុជាក្នុងឱកាសប្រារព្ធទិវាឯកភាពជាតិអាល្លឺម៉ង់លើកទី៣១។
នៅក្នុងលិខិតកាលពីថ្ងៃទី ២ ខែតុលា ឆ្នាំ ២០២១ លោក ប្រាក់ សុខុន បានសរសេរថា ក្នុងឱកាសនក្ខត្តប្ញក្សដ៏ឧត្តមនៃថ្ងៃឯកភាពលើកទី៣១ របស់ប្រទេសអាល្លឺម៉ង់ លោកសម្តែងក្ដីសោមនស្សរីករាយក្រៃលែងចូលរួមអបអរសាទរអស់ពីដួងចិត្តជូនលោក Christian Berger និងសហគមន៍អាល្លឺម៉ង់ដែលកំពុងរស់នៅព្រះរាជាណាចក្រកម្ពុជា។
លោក ប្រាក់ សុខុន បានសរសរថា៖ «ថ្ងៃនេះ ជាថ្ងៃដ៏អស្ចារ្យសម្រាប់ប្រជាជនអាល្លឺម៉ង់ដែលសម្រេចបាននូវសមិទ្ធផលដ៏មោទនភាពអស់រយៈពេលជាច្រើនឆ្នាំចាប់តាំងពីបង្រួបបង្រួមអាល្លឺម៉ង់»។
រីឯលោក ហ៊ុន ម៉ានី សមាជិករដ្ឋសភាក៏បានសរសេរក្នុងលិខិតរបស់លោកកាលពីថ្ងៃទី ២ ខែតុលាដែរថា ឆ្លៀតក្នុងឱកាសនេះ លោកសម្តែងការកោតសរសើរចំពោះការប្តេជ្ញាចិត្ត និងកិច្ចខិតខំរបស់ស្ថានទូតអាល្លឺម៉ងដែលបានពង្រឹងទំនាក់ទំនងរវាងប្រទេសកម្ពុជា និងអាល្លឺម៉ង់ នាពេលកន្លងមក។
លោក ហ៊ុន ម៉ានី បានបង្ហាញក្ដីរំពឹងថា ទំនាក់ទំនង និងកិច្ចសហប្រតិបត្តិការទ្វេភាគីដែលខ្លាំងរួចជាស្រេចនេះនឹងបន្តរឹងមាំ ហើយរីកចម្រើនបន្ថែមទៀត ដើម្បីនាំមកនូវផលប្រយោជន៍ទៅវិញទៅមកដល់ប្រជាជាតិ និងប្រជាជនទាំង ២។
តាមរយៈវីដេអូដើម្បីអបអរទិវាឯកភាពជាតិអាល្លឺម៉ង់ក្នុងឆ្នាំ ២០២១ ដែលបានបង្ហោះនៅលើគណនីហ្វេសប៊ុករបស់ស្ថានទូតអាល្លឺម៉ង់ប្រចាំកម្ពុជា កាលពីថ្ងៃទី ៣ ខែតុលា ឆ្នាំ ២០២១ លោក Christian Berger ឯកអគ្គរដ្ឋទូតអាល្លឺម៉ង់ប្រចាំកម្ពុជា ថ្លែងថាការបង្រួបបង្រួមជាតិអាល្លឺម៉ង់បានដើរតួយ៉ាងសំខាន់ក្នុងការដឹកនាំប្រទេសអាល្លឺម៉ង់ឱ្យក្លាយជាប្រទេសមួយដូចដែលយើងបានឃើញសព្វថ្ងៃនេះ។
លោកបន្តថា នេះក៏រួមបញ្ចូលគោលនយោបាយការបរទេស និងវត្តមានរបស់អាល្លឺម៉ង់នៅកម្ពុជាផងដែរ។ ទោះបីជាមានជំងឺរាតត្បាតក៏ដោយ ក៏កិច្ចសហប្រតិបត្តិការទ្វេភាគីរបស់អាល្លឺម៉ង់ លើការងារអភិវឌ្ឍ និងសកម្មភាពផ្សេងទៀតនៅតែបន្ត៕
