សាលាដំបូងខេត្តកោះកុង សម្រេច ឃុំខ្លួនក្មេងជំទង់ ៩ នាក់ក្នុងពន្ធនាគារជាបណ្ដោះអាសន្ន ដោយត្រូវបានចោទប្រកាន់ពីបទហិង្សាដោយចេតនាមានស្ថានទម្ងន់ទោសអាចនឹងជាប់គុកពី ២ ទៅ ៥ ឆ្នាំ បើសិនជាតុលាការរកឃើញទោសតាមបទចោទប្រកាន់។
យុវជនប្រុសស្រី ៩ នាក់ បានព្រួតគ្នាវាយលើសិស្សស្រីម្នាក់ប្រព្រឹត្តនៅភូមិ១ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង កាលពីថ្ងៃទី ៣០ ខែកញ្ញា។
លោក វ៉ៃ ភីរម្យ អ្នកនាំពាក្យអយ្យការអមសាលាដំបូងខេត្តកោះកុងប្រាប់ភ្នំពេញប៉ុស្តិ៍នៅថ្ងៃទី ៤ តុលានេះថាយុវជនត្រូវចោទប្រុសស្រីចំនួន ៩ នាក់ត្រូវបានចៅក្រមស៊ើបសួរសម្រេចចេញដីកាឃុំខ្លួនបណ្តោះអាសន្នក្នុងពន្ធនាគារខេត្តហើយពីថ្ងៃទី ៣ តុលា។
លោកបន្តថាលោកចៅក្រមស៊ើបសួរចេញដីកាឃុំនេះយោងតាមការចោទប្រកាន់របស់តំណាងអយ្យការអមសាលាដំបូងខេត្តកោះកុងគឺលោកព្រះរាជអាជ្ញារង អេង ចាន់ភារ៉ា។
លោក ភីរម្យ ថ្លែងថា៖ «លោកតំណាងអយ្យការបានចោទប្រកាន់ពួកគាត់ពីបទហិង្សាដោយចេតនាមានស្ថានទម្ងន់ទោសតាមមាត្រា ២១៨ នៃក្រមព្រហ្មទណ្ឌ»។ យោងតាមមាត្រា ២១៨ នៃក្រមខាងលើបានកំណត់ទោសពី ២ ឆ្នាំទៅ ៥ ឆ្នាំ និងពិន័យជាប្រាក់ចូលថវិការដ្ឋពី ៤ លានទៅ ១០ លានរៀល។
ជុំវិញអង្គហេតុនៃរឿងនេះត្រូវបានលោក ជា សុភាព នាយការិយាល័យនគរបាលព្រហ្មទណ្ឌកម្រិតស្រាលខេត្តកោះកុងឱ្យដឹងនៅថ្ងៃទី ៤ តុលានេះថាក្រុមជនត្រូវចោទមានគ្នា ៩ នាក់ (ស្រី ៧ នាក់) និងមានអាយុចន្លោះពី ១៥ ដល់ ១៧ ឆ្នាំ។ ពួកគេជាសិស្ស និងខ្លះឈប់រៀនបានបង្កវាយក្មេងរងគ្រោះកាលពីថ្ងៃទី ៣០ កញ្ញា។ ចំពោះក្មេងស្រីរងគ្រោះ ឈ្មោះ មាស ស្រីមុំហៅ សា អាយុ ១៦ ឆ្នាំជាសិស្ស។
លោកបន្តថា៖ «បើយើងពិនិត្យលើរបួសស្នាមក្មេងរងគ្រោះមានហើមមុខ និងមានស្នាមជាំខ្លះលើខ្លួនប្រាណ»៕
វីដេអូ៖