.jpg)
លោក ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ថ្លែងពេលធ្វើជាអធិបតីប្រកាសផ្លាស់ប្ដូរអភិបាលខេត្តស្ទឹងត្រែង ដោយលោក ស្វាយ សំអ៊ាង ជំនួសលោក ម៉ុម សារឿន ថ្ងៃទី៤ ខែតុលា ឆ្នាំ២០២១ នៅសាលាខេត្តស្ទឹងត្រែង។ រូបថត សហការី
ស្ទឹងត្រែងៈ លោក ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានណែនាំដល់ក្រុមប្រឹក្សានិងគណៈអភិបាលខេត្ដត្រូវខិតខំសម្របសម្រួលពិភាក្សានិងពិគ្រោះយោបល់គ្នា ដើម្បីលើកនូវគំនិតផ្ដួចផ្ដើម និងដំណោះស្រាយលើបញ្ហាសំខាន់ៗដាក់ចូលក្នុងរបៀបវារៈប្រជុំក្រុមប្រឹក្សាអនុម័តហើយកុំភ្លើតភ្លើននឹងតួនាទីឬមុខតំណែងរួចធ្វើជាមន្រ្ដីឱកាសនិយម។
លោក ស ខេង ថ្លែងបែបនេះពេលធ្វើជាអធិបតីប្រកាសផ្លាស់ប្ដូរអភិបាលខេត្តស្ទឹងត្រែង ដោយលោក ស្វាយ សំអ៊ាង ជំនួសលោក ម៉ុម សារឿន ថ្ងៃទី៤ ខែតុលា ឆ្នាំ២០២១ នៅសាលាខេត្តស្ទឹងត្រែង។
លោកបានថ្លែងថា៖«មន្រ្ដីយើង សូមបើករង្វង់ក្រចកបន្តិច ពេលដែលទទួលបានការងារនេះ ការងារនោះ ការពិតទៅជាកិត្ដិយសរបស់យើង ដែលយើងមានឱកាសដើម្បីនឹងធ្វើការងារនោះ។ប៉ុន្ដែក៏យើងមិនត្រូវភ្លើតភ្លើន នឹងតួនាទី នឹងមុខតំណែងហើយថែមទាំងឱកាសនិយមថែមទៀត។ឱកាសនិយមនេះគ្រោះថ្នាក់ណាស់។ អញបានឡើងធ្វើចៅហ្វាយស្រុក អ៊ីចឹងអីៗ អញសម្រេចតាមចិត្ដ ទោះបីសម្រេចទៅប្រើអំណាចដោយរំលោភ»។
ជុំវិញពាក្យថាអ្វីទៅជាប្រើអំណាចដោយរំលោភនោះ លោក ស ខេង បានពន្យល់ថា គឺរឿងខ្លះមិនមែនមន្រ្ដីដែលមានតួនាទីនោះជាអ្នកសម្រេចឬជាអ្នកអារកាត់ទេ គឺជារឿងដែលត្រូវស្ថាប័នណាមួយអារកាត់ ប៉ុន្ដែអាងតែខ្លួនធំជាងគេ គឺថាបានសម្រេចចិត្ដអារកាត់តែម្ដង ដែលការអនុវត្ដបែបនេះហើយដែលនាំឱ្យមានបញ្ហា។
លោកបានបញ្ជាក់ថា៖«អ៊ីចឹងហើយ ឱកាសនិយមនេះ គឺថាពេលនឹងបានសិទ្ធិ បានអំណាចហើយ ធ្វើអីតាមចិត្ត អ៊ីចឹងរកផលប្រយោជន៍នេះ ផលប្រយោជន៍នោះ អាហ្នឹងហើយជាបញ្ហា ដែលនាំឱ្យផ្ទៃក្នុងរបស់យើងមិនរឹងមាំ។
អីចឹងរបៀបរបបធ្វើការងារនេះ ខ្ញុំស្នើថា សូមឱ្យយកចិត្ដទុកដាក់មែនទែន…»។
លោក ស ខេង បានបន្តថា ក្រុមប្រឹក្សា និងគណៈអភិបាលខេត្ដ ត្រូវបន្តអនុវត្ដឱ្យបានត្រឹមត្រូវ លើសិទ្ធិអំណាច តួនាទី និងភារកិច្ចរបស់ខ្លួន ដោយផ្ដោតតាមគោលការណ៍ដែលបានកំណត់ និងច្បាប់លិខិតបទដ្ឋានជាធរមាន។ រាល់ការប្រាស្រ័យទាក់ទងរវាងក្រុមប្រឹក្សា និងគណៈអភិបាលនៅក្នុងការគ្រប់គ្រងជាទូទៅរបស់រដ្ឋបាលខេត្ដ រាប់បញ្ចូលទាំងការរៀបចំគោលនយោបាយអភិវឌ្ឍន៍មូលដ្ឋាន ការរៀបចំ និងប្រើប្រាស់ថវិកា គ្រប់គ្រងបុគ្គលិក ការប្រើប្រាស់ត្រា ចាំបាច់ត្រូវគិតគូរអំពីផលប្រយោជន៍សាធារណៈជាសំខាន់ ដោយគ្មានប្រកាន់បក្ខពួក គ្រួសារនិយម និងផលប្រយោជន៍ ផ្ទាល់ខ្លួន។
លោកបានបន្តទៀតថា ក្រុមប្រឹក្សា និងគណៈអភិបាល ជាពិសេសប្រធានក្រុមប្រឹក្សា និងអភិបាលត្រូវខិតខំសម្របសម្រួលពិភាក្សាគ្នា និងពិគ្រោះយោបល់គ្នា ដើម្បីលើកឡើងនូវគំនិតផ្ដួចផ្ដើម និងដំណោះស្រាយលើបញ្ហាសំខាន់ៗ ដែលបញ្ហាទាំងនោះអាចដាក់ចូលក្នុងរបៀបវារៈកិច្ចប្រជុំក្រុមប្រឹក្សាដើម្បីអនុម័តជាមុនឬបញ្ហាដែលអាចសម្រេច និងអនុវត្ដដោយគណៈអភិបាលខេត្ដផ្ទាល់។
លោកបញ្ជាក់ថា៖«ចង់និយាយថាប្រធានក្រុមប្រឹក្សា និងគណៈអភិបាលអាចនឹងយកបញ្ហាណាមួយ ដែលវារស៊ើបហ្នឹងទៅជជែកគ្នាមុនសិន។ គេទុកលទ្ធភាពជជែកក្រោមតុជាមួយគ្នាសិន ឯកភាពជាមួយគ្នាហើយយកមកដាក់នៅក្រុមប្រឹក្សា...»។
លោក ស ខេង បញ្ជាក់បន្ថែមថា៖«យើងធ្វើអីក៏ដោយមិនមែនសម្រាប់តែផលប្រយោជន៍យើងថ្ងៃនេះទេ យើងធ្វើសម្រាប់មនុស្សជំនាន់យើង សម្រាប់យើងនៅថ្ងៃនេះ ប៉ុន្ដែយើងត្រូវគិតថា ត្រូវបន្សល់ទុក សម្រាប់កូនចៅយើង តើអនាគតកូនចៅយើងយ៉ាងម៉េច ជាកេរដំណែល។ អ៊ីចឹងហើយ សូមយកចិត្ដទុកដាក់ក្នុងការពង្រឹងរៀបរបបធ្វើការងារនេះ»៕
