.jpg)
ដាក់កម្លាំងប្រចាំការ ២៤ ម៉ោង ជួយអន្តរាគមន៍ពន្លត់អគ្គិភ័យ ក្នុងអំឡុងពេលបុណ្យភ្ជុំបិណ្ឌ។ រូបថត ការិយាល័យនគរបាលបង្ការពន្លត់អគ្គិភ័យ និងសង្គ្រោះ
កម្លាំងនគរបាលបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញ បានដាក់កម្លាំងប្រចាំការ ២៤ ម៉ោង ក្នុងការជួយអន្តរាគមន៍សង្គ្រោះប្រជាពលរដ្ឋនៅពេលដែលមានគ្រោះអគ្គិភ័យណាមួយកើតឡើង ខណៈពលរដ្ឋដែលរស់នៅរាជធានី បានសម្រុកទៅស្រុកកំណើតក្នុងអំឡុងពេលបុណ្យភ្ជុំបិណ្ឌ។
លោក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ នៅថ្ងៃទី ០៤ ខែ តុលា ឆ្នាំ ២០២១ បានដឹកនាំលោកនាយរងការិយាល័យ និងមន្ត្រីជំនាញទាំងអស់ចំណុះឱ្យការិយាល័យនគរបាលបង្ការពន្លត់អគ្គិភ័យ ធ្វើការត្រៀមខ្លួនក្នុងការជួយអន្តរាគមន៍សង្គ្រោះប្រជាពលរដ្ឋនៅពេលដែលមានគ្រោះអគ្គិភ័យណាមួយកើតឡើង។
លោកក៏បានណែនាំដល់មន្ត្រីពន្លត់អគ្គិភ័យទាំងអស់ត្រូវតែយកចិត្តទុកដាក់ខ្ពស់ក្នុងប្រតិបត្តិការជួយសង្គ្រោះពន្លត់អគ្គិភ័យជូនបងប្អូនប្រជាពលរដ្ឋនៅរដូវបុណ្យភ្ជុំបិណ្ឌនេះ ដោយសារប្រជាពលរដ្ឋបាននាំគ្នាចាកចេញពីលំនៅឋានរបស់ពួគាត់ ដោយធ្វើដំណើរទៅលេងនៅស្រុកកំណើត។ ដូច្នេះមន្ត្រីជំនាញពន្លត់អគ្គិភ័យរបស់យើងទាំងអស់ ត្រូវតែត្រៀមលក្ខណសម្បត្តិ ដើម្បីចេញប្រតិបត្តិការជួយសង្គ្រោះ នៅពេលដែលមានហេតុការណ៍គ្រោះអគិ្គភ័យកើតឡើងដោយប្រការណាមួយ។
លោក ព្រហ្ម យ៉ន បានគូសបញ្ជាក់ថា ៖«ក្នុងរដូវបុណ្យភ្ជុំបិណ្ឌនេះ កម្លាំងជំនាញការិយាល័យនគរបាលបង្ការពន្លត់អគ្គិភ័យ និងសង្គ្រោះ បានត្រៀមលក្ខណសម្បត្តិរួចជាស្រេច ដោយនៅក្នុងនោះតាមបណ្ដាគោលដៅក្នុងរាជធានីភ្នំពេញទាំងអស់ និងបានបែងចែកដល់នាយរងការិយាល័យ ក៏ដូចជាប្រធានគោលដៅទាំងអស់ ត្រូវយកចិត្តទុកដាក់ខ្ពស់»។ «ជាពិសេស ត្រូវតែប្រចាំការ ២៤ ម៉ោងលើ ២៤ ម៉ោង ដើម្បីត្រៀមទប់ស្កាត់នៅពេលដែលមានហេតុការណ៍ចាំបាច់បំផុត»។
ទន្ទឹមនេះដែរ លោក ព្រហ្ម យ៉ន ក៏បានក្រឿនរំឭកដល់ប្រជាពលរដ្ឋទាំងអស់ដែលរស់នៅក្នុងរាជធានីភ្នំពេញ នៅពេលដែលជួបហេតុការណ៍គ្រោះអគ្គិភ័យកើតឡើងដោយប្រការណាមួយ សូមធ្វើការរាយការណ៍មកកាន់លេខទូរស័ព្ទ ៦៦៦ ដើម្បីឱ្យកម្លាំងជំនាញអាចចេញប្រតិបត្តិការជួយសង្គ្រោះឱ្យបានទាន់ពេលវេលា៕
វីដេអូ៖
