.jpg)
លោក ងួន រតនៈ អភិបាលខេត្តបាត់ដំបង។ រូបថត រដ្ឋបាលខេត្ត
អភិបាលខេត្តបាត់ដំបងលោក ងួន រតនៈ បានណែនាំដល់អភិបាលក្រុង-ស្រុក ត្រូវពង្រឹងវិធានការចាំបាច់នានា ជាពិសេសរឹតបន្តឹងការអនុវត្តវិធានការសុវត្ថិភាពទេសចរណ៍ និងនីតិវិធីប្រតិបត្តិស្តង់ដាអប្បបរមាសម្រាប់អាជីវកម្មសេវាកម្មទេសចរណ៍ក្នុងអំឡុងពេលបុណ្យភ្ជុំបិណ្ឌ។
ក្នុងលិខិតរបស់លោក ងួន រតនៈ ដែលបានជម្រាបជូនគណៈអភិបាលក្រុង-ស្រុក និងជាប្រធានគណៈបញ្ជាការឯកភាពរដ្ឋបាលក្រុង-ស្រុកក្នុងខេត្ត ចុះថ្ងៃទី ៤ ខែតុលា បានឱ្យដឹងថា ដើម្បីចូលរួមអនុវត្តសារាចរស្តីពីការពង្រឹងវិធានការគ្រប់គ្រងការឆ្លងរាលដាលនៃជំងឺកូវីដ ១៩ សម្រាប់អំឡុងពេល និងក្រោយពេលឈប់សម្រាកក្នុងពិធីបុណ្យភ្ជុំបិណ្ឌ ក្នុងគោលបំណងទប់ស្កាត់ការឆ្លងរាលដាលនៃជំងឺនេះ គ្រប់ភាគីត្រូវយកចិត្តទុកដាក់ខ្ពស់ត្រួតពិនិត្យឱ្យបានម៉ឺងម៉ាត់ និងប្រកបដោយស្មារតីទទួលខុសត្រូវខ្ពស់។
លិខិតបន្តថា ត្រូវពង្រឹងការអនុវត្តវិធានការសុខាភិបាល ជាពិសេសវិធានការ ៣ កុំ ៣ ការពារ ព្រមទាំងវិធានការរដ្ឋបាល និងវិធានការច្បាប់ដែលចាំបាច់នានា សំដៅពង្រឹងទប់ស្កាត់ការឆ្លងរាលដាលនៃជំងឺកូវីដ១៩ ជាពិសេសក្នុងអំឡុងពេលធ្វើដំណើរដោយប្រើប្រាស់មធ្យោបាយធ្វើដំណើររួម និងក្នុងអំឡុងពេលនៃការជួបជុំ ឬការប្រមូលផ្តុំមនុស្ស ដែលអាចបង្កហានិភ័យខ្ពស់នៃការចម្លងមេរោគកូវីដ ១៩។
លោក ងួន រតនៈ បានបន្តថា៖ «ទន្ទឹមនេះ ត្រូវរឹតបន្តឹងការអនុវត្តវិធានការ សុវត្ថិភាពទេសចរណ៍ និងនីតិវិធីប្រតិបត្តិស្តង់ដាអប្បបរមាសម្រាប់អាជីវកម្មសេវាកម្មទេសចរណ៍ ដែលត្រូវបានដាក់ចេញ ដោយក្រសួងទេសចរណ៍ នៅតាមមូលដ្ឋានអាជីវកម្មសេវាកម្មទេសចរណ៍ជាអាទិ៍ រមណីយដ្ឋាន ភោជនីយដ្ឋាន និងអាហារដ្ឋានទេសចរណ៍»។
រដ្ឋបាលខេត្ត នឹងពិនិត្យលទ្ធភាពផ្តល់ជូននូវឧបករណ៍តេស្ករហ័ស តាមតម្រូវការជាក់ស្តែង ជូនដល់រដ្ឋបាលក្រុង-ស្រុក ដើម្បីធ្វើតេស្តចំពោះមន្ត្រីរាជការមុនបន្តធ្វើការ ក្រោយថ្ងៃឈប់សម្រាកពិធីបុណ្យភ្ជុំបិណ្ឌ ក្នុងគោលបំណងដើម្បីចូលរួមធានាសុវត្ថិភាព ក៏ដូចជាទប់ស្កាត់ការឆ្លងរាលដាលនៃជំងឺកូវីដ ១៩៕
