ក្រសួងសាធារណការ និងដឹកជញ្ជូន ធ្វើការណែនាំដល់ក្រុមហ៊ុនដឹកជញ្ជូនអ្នកដំណើរ និងអ្នកដំណើរទាំងអស់ឱ្យបន្តការយកចិត្តទុកដាក់អនុវត្តវិធានការបង្ការ និងទប់ស្កាត់ការរីករាលដាលនៃជំងឺកូវីដ ១៩ ដោយត្រូវរក្សាគម្លាតសុវត្ថិភាព ពាក់ម៉ាស់ និងបាញ់អាល់កុលសម្លាប់មេរោគជាប្រចាំ។
សេចក្តីណែនាំរបស់ក្រសួងសាធារណការ និងដឹកជញ្ជូន ចុះថ្ងៃទី ៤ ខែតុលានេះ បានណែនាំវិធានការមួយចំនួនចំពោះអ្នកធ្វើដំណើរ និងម្ចាស់ក្រុមហ៊ុនដឹកជញ្ជូនអ្នកដំណើរដូចជា ត្រូវរក្សាគម្លាតសុវត្ថិភាពយ៉ាងតិច ១,៥ ម៉ែត្រ និងកាត់បន្ថយចំនួនផ្ទុកអ្នកដំណើរឱ្យបានជាអប្បបរមា ព្រមទាំងសម្អាតកន្លែងផ្តល់សេវាដល់អតិថិជនឱ្យបានស្អាតជានិច្ច ជាពិសេសនៅកន្លែងលក់សំបុត្រ កន្លែងរង់ចាំ កន្លែងទទួលទានអាហារ និងបង្គន់អនាម័យ។ល។
សេចក្តីណែនាំបន្តថា ត្រូវត្រួតពិនិត្យសុខភាពអ្នកបើកបរ និងបុគ្គលិកបម្រើសេវាជាប្រចាំ និងត្រូវឱ្យពួកគាត់ពាក់ម៉ាស់ក្នុងពេលបំពេញការងារ ហើយបើមានការសង្ស័យលើសុខភាព ត្រូវឱ្យពួកគាត់ឈប់សម្រាកជាបណ្តោះអាសន្ន ដើម្បីតាមដានសុខភាព។ ត្រូវវាស់កំដៅអ្នកដំណើរ និងប្រើទឹកអាល់កុលសម្រាប់លាងដៃ និងតម្រូវឱ្យពាក់ម៉ាស់មុននឹងអនុញ្ញាតឱ្យឡើងលើរថយន្ត។ សេចក្តីណែនាំថា៖ « ប្រសិនបើពិនិត្យឃើញអ្នកដំណើរមានអាការៈដូចជា ក្តៅខ្លួនលើសពី ៣៧,២ អង្សាសេ មានក្អក ឬឈឺបំពង់ក ឬមានបញ្ហាក្នុងការដកដង្ហើម មិនត្រូវអនុញ្ញាតឱ្យឡើងជិះរថយន្តឡើយ និងត្រូវណែនាំ ឱ្យគាត់ទៅមណ្ឌលសុខភាពដែលនៅជិតបំផុតជាបន្ទាន់ ឬទូរស័ព្ទទៅបណ្តាញទំនាក់ទំនងទាន់ហេតុការណ៍ លេខ ១១៥ របស់ក្រសួងសុខាភិបាល»។
សេចក្តីណែនាំដដែលបន្តទៀតថា ចំពោះអ្នកគ្រប់គ្រងរថយន្តដឹកជញ្ជូនអ្នកដំណើរ ត្រូវប្រើប្រាស់អាល់កុល ឬសារធាតុសម្លាប់មេរោគ ដើម្បីជូតសម្អាតរាល់វត្ថុទាំងឡាយនៃរថយន្ត ដែលអ្នកធ្វើដំណើរតែងប៉ះពាល់ជាប្រចាំ មានដូចជា របារតោង ភ្នាក់ដៃ និងកៅអី។ល។ ឱ្យបានញឹកញាប់តាមលទ្ធភាពដែលអាចធ្វើទៅបាន៕
វីដេអូ៖