.jpg)
រដ្ឋបាលខេត្តព្រះសីហនុដាក់ចេញវិធានការរដ្ឋបាលរយៈពេល ៣ ថ្ងៃ ក្នុងអំឡុងពេលឈប់សម្រាកនៃពិធីបុណ្យភ្ជុំបិណ្ឌ ខណៈប្រជាពលរដ្ឋបានធ្វើដំណើរកម្សាន្តនៅរមណីយដ្ឋានតាមបណ្តាខេត្តនានា។
រដ្ឋបាលខេត្តព្រះសីហនុដាក់ចេញវិធានការរដ្ឋបាលរយៈពេល ៣ ថ្ងៃ ក្នុងអំឡុងពេលឈប់សម្រាកនៃពិធីបុណ្យភ្ជុំបិណ្ឌ ខណៈប្រជាពលរដ្ឋបានធ្វើដំណើរកម្សាន្តនៅរមណីយដ្ឋានតាមបណ្តាខេត្តនានា ក៏ដូចជានៅតំបន់ឆ្នេរដែលជាគោលដៅទេសចរណ៍ និងមានការប្រមូលផ្តុំមនុស្សច្រើន។
សេចក្តីណែនាំរបស់អភិបាលខេត្តព្រះសីហនុលោក គួច ចំរើន ចុះថ្ងៃទី ៤ ខែតុលានេះ បានឱ្យដឹងថា ក្នុងអំឡុងពេលនេះ ប្រជាជនបានធ្វើដំណើរចល័តពីកន្លែងមួយទៅកន្លែងមួយទៀត ទៅជួបជុំឪពុកម្តាយ និងក្រុមគ្រួសារនៅស្រុកកំណើត និងទៅកម្សាន្តនៅតាមរមណីយដ្ឋាននានាទូទាំងប្រទេស ក៏ដូចជានៅតាមតំបន់ឆ្នេរ និងរមណីយដ្ឋាននានានៅក្នុងខេត្តព្រះសីហនុ ដែលអាចធ្វើឱ្យខេត្ត ជួបប្រទះនូវហានិភ័យនៃការឆ្លងរាលដាលទ្រង់ទ្រាយធំនៃជំងឺកូវីដ ១៩ ក្នុងសហគមន៍ ជាពិសេសមេរោគបំប្លែងខ្លួនថ្មីប្រភេទដែលតា (Delta) ដែលមានកម្រិតនៃការឆ្លងរាលដាលយ៉ាងឆាប់រហ័ស។
សេចក្តីណែនាំបន្តថា ក្នុងន័យនេះ ដើម្បីបង្ការ និងទប់ស្កាត់ ការឆ្លងរាលដាលនៃជំងឺដ៏កាចសាហាវនេះ និងដើម្បីការពារអាយុជីវិត និងសុខភាពរបស់ប្រជាពលរដ្ឋស្របពេលដែលកម្ពុជាក៏ដូចជាខេត្តព្រះសីហនុ កំពុងឈានទៅបើកដំណើរការពេញលេញឡើងវិញលើគ្រប់វិស័យផងនោះ រដ្ឋបាលខេត្តព្រះសីហនុ សម្រេចដាក់ចេញនូវវិធានការរយៈពេល ៣ ថ្ងៃ ចាប់ពីថ្ងៃទី ០៥ ដល់ថ្ងៃទី ០៧ ខែតុលា ឆ្នាំ ២០២១។
រដ្ឋបាលខេត្តក៏បានណែនាំដល់មន្ទីរការងារ និងបណ្តុះបណ្តាលវិជ្ជាជីវៈខេត្ត មន្ទីរទេសចរណ៍ខេត្ត និងមន្ទីរ អង្គភាពពាក់ព័ន្ធរួមសហការ ជាមួយកងកម្លាំងមានសមត្ថកិច្ច និងគណៈអភិបាលក្រុង ស្រុក ព្រមទាំងក្រុមការងារដែលមានការពាក់ព័ន្ធត្រូវយកចិត្តទុកដាក់ត្រួតពិនិត្យឱ្យបានម៉ឺងម៉ាត់ និងប្រកបដោយស្មារតីទទួលខុសត្រូវខ្ពស់ក្នុងការពង្រឹងអនុវត្ត វិធានការសុខាភិបាលនានា ជាពិសេសត្រូវអនុវត្តនូវវិធានការ«៣ការពារ និង៣កុំ» និងវិធានការរដ្ឋបាល។
ស្ថាប័នពាក់ព័ន្ធត្រូវចុះពិនិត្យរឹតបន្តឹងការអនុវត្តវិធានសុវត្ថិភាពទេសចរណ៍ និងនីតិវិធីប្រតិបត្តិស្តង់ដាអប្បបរមាសម្រាប់អាជីវកម្ម ទេសចរណ៍ ដែលបានដាក់ចេញដោយក្រសួងទេសចរណ៍ នៅតាមមូលដ្ឋានអាជីវកម្ម សេវាកម្មទេសចរណ៍ជាអាទិ៍ រមណីយដ្ឋាន ភោជនីយដ្ឋាន អាហារដ្ឋាននានានៅក្នុងខេត្ត។
សេចក្តីណែនាំបានគូសបញ្ជាក់ថា៖ «នៅក្រោយពេលពិធីបុណ្យភ្ជុំបិណ្ឌត្រូវបានបញ្ចប់ មន្ទីរការងារ និង បណ្តុះបណ្តាលវិជ្ជាជីវៈខេត្ត មន្ទីរទេសចរណ៍ខេត្ត ព្រមទាំងគណៈអភិបាលក្រុង ស្រុក ត្រូវសហការជាមួយវិស័យឯកជន ម្ចាស់រោងចក្រ សហគ្រាស ក្រុមហ៊ុន និងទីតាំងអាជីវកម្មនានា ត្រូវលើកទឹកចិត្តឱ្យធ្វើតេស្តរហ័សចំពោះបងប្អូនកម្មករ និយោជិត និងបុគ្គលិកបម្រើការងារ មុនពេលអនុញ្ញាតចូលបម្រើការងារ ដើម្បីការពារសុវត្ថិភាព៕
