យ៉ាងហោចណាស់មានមនុស្សប្រុសស្រីចំនួន ៥ នាក់ស្លាប់ និងរបួសជិត ២០ នាក់ក្នុងហេតុការណ៍គ្រោះថ្នាក់ចរាចរណ៍ដែលកើតឡើងនៅទូទាំងប្រទេសនៅថ្ងៃទី ០៥ ខែតុលា ឆ្នាំ ២០២១។
យោងតាមទិន្នន័យគ្រោះថ្នាក់ចរាចរណ៍ផ្លូវគោកទូទាំងប្រទេសចេញដោយនាយកដ្ឋាននគរបាលចរាចរណ៍ និងសណ្តាប់សាធារណៈនៃអគ្គស្នងការដ្ឋាននគរបាលជាតិ នៅថ្ងៃទី ០៥ ខែតុលានេះបានបញ្ជាក់ថា គ្រោះថ្នាក់ដែលបង្កឱ្យមានមនុស្សស្លាប់ និងរបួសសរុបចំនួន ២៣ នាក់ក្នុងនោះស្លាប់ ៥ នាក់ (ស្រី ១ នាក់) និងរងរបួសធ្ងន់ស្រាលចំនួន ១៨ នាក់ (ស្រី ៨ នាក់)។
របាយការណ៍ដដែលបន្តថា មូលហេតុបណ្តាលឱ្យស្លាប់ដោយសារបើកបរលើសល្បឿនចំនួន ៣ ករណី និង ២ ករណីទៀត បើកបរប្រជែងគ្នា។ ចំណែកអ្នករងរបួសធ្ងន់ស្រាល ដោយសារការបើកបរប៉ះទង្គិចគ្នា មិនគោរពសិទ្ធិ ការបត់មិនមើលមុខក្រោយ និងករណីបើកបរក្នុងស្ថានភាពស្រវឹងជាដើម។
ដោយឡែកទាក់ទងលទ្ធផលត្រួតពិនិត្យការអនុវត្តច្បាប់ចរាចរណ៍ផ្លូវគោក នៅថ្ងៃដដែលនេះ សមត្ថកិច្ចរកឃើញមធ្យោបាយល្មើសចំនួន ២៤៦ គ្រឿង ក្នុងនោះមានម៉ូតូចំនួន ១៨២ គ្រឿង និងត្រូវបានផាកពិន័យតាមអនុក្រឹត្យលេខ ៣៩.អនក្រ.បក នៅទូទាំងប្រទេស៕