រដ្ឋបាលរាជធានីភ្នំពេញ បានចេញវិធានការចាំបាច់ ដោយតម្រូវឱ្យពលរដ្ឋបង្ហាញបណ្ណចាក់វ៉ាក់សាំងកូវីដ ១៩ ឬលិខិតបញ្ជាក់ការចាក់វ៉ាក់សាំងបង្ការជំងឺកូវីដ ១៩ រាល់ពេលចេញ-ចូលគ្រឹះស្ថានសិក្សា ផ្សារ និងទីតាំងអាជីវកម្មដ្ឋាននានា ក្នុងភូមិសាស្ត្ររាជធានី ដើម្បីគ្រប់គ្រងការរីករាលដាលនៃជំងឺរាតត្បាតនេះ ឱ្យកាន់តែមានប្រសិទ្ធភាព។
សេចក្តីណែនាំរបស់អភិបាលរាជធានីភ្នំពេញលោក ឃួង ស្រេង ចុះថ្ងៃទី ៥ ខែតុលា បានឱ្យដឹងថា រាជធានីភ្នំពេញ ត្រូវបានគេទទួលស្គាល់ថាជាទីក្រុងដែលបានចាក់ស្រោចវ៉ាក់សាំងបង្ការជំងឺកូវីដ ១៩ ជូនដល់ប្រជាពលរដ្ឋច្រើនជាងគេក្នុងពិភពលោក ដែលមានអត្រាគ្របដណ្ដប់ស្ទើរតែ ១០០ ភាគរយ ទាំងការចាក់ជូនប្រជាពលរដ្ឋដែលមានអាយុពី ១៨ ឆ្នាំឡើងទៅ និងកុមារ-យុវជនដែលមានអាយុចាប់ពី ៦ ឆ្នាំ ដល់ក្រោម ១៨ ឆ្នាំ។
ក្នុងន័យនេះ ដើម្បីបង្កើនប្រសិទ្ធភាពឱ្យកាន់តែប្រសើរឡើងនូវការគ្រប់គ្រងការរីករាលដាលនៃជំងឺកូវីដ ១៩ សំដៅបង្កើតឱ្យបាន "ភាពស៊ាំសហគមន៍រឹងមាំពិតប្រាកដមួយទប់ទល់នឹងជំងឺរាតត្បាតសកលកូវីដ ១៩ ជាពិសេសមេរោគបំប្លែងថ្មី ប្រភេទដែលតា (Delta) ក៏ដូចជាដើម្បីត្រៀមលក្ខណៈសម្រាប់ការរស់នៅជាមួយជំងឺនេះ តាមគន្លងប្រក្រតីភាពថ្មី ឈានទៅរកការបើកដំណើរការឡើងវិញលើគ្រប់វិស័យ នាពេលឆាប់ៗខាងមុខនេះ រដ្ឋបាលរាជធានីភ្នំពេញ សូមធ្វើការណែនាំបន្ថែមនូវវិធានការចាំបាច់មួយចំនួន។
វិធានការទាំងនោះរួមមាន ១ បុគ្គលដែលមានអាយុពី ១៨ ឆ្នាំឡើងទៅ ត្រូវមានកាតព្វកិច្ចបង្ហាញបណ្ណចាក់វ៉ាក់សាំងកូវីដ ១៩ ចេញដោយក្រសួងសុខាភិបាល បណ្ណចាក់វាក់សាំងបង្ការជំងឺកូវីដ ១៩ ចេញដោយក្រសួងការពារជាតិ ឬលិខិតបញ្ជាក់ការចាក់វាក់សាំងរាល់ពេលចេញ-ចូលទីតាំង ឬទីកន្លែង ដូចជាគ្រឹះស្ថានសិក្សា ផ្សាររដ្ឋ ផ្សារឯកជន ផ្សារម៉ាត ភោជនីយដ្ឋាន អាហារដ្ឋាន ហាងកាហ្វេ និងទីតាំងផ្សេងទៀតដែលត្រូវបានអនុញ្ញាតឱ្យបើកដំណើរការ។
២ មាតាបិតា ឬ អាណាព្យាបាលរបស់កុមារ និងយុវវ័យដែលមានអាយុចាប់ពី ៦ ឆ្នាំ ដល់ក្រោម ១៨ ឆ្នាំ ត្រូវមានកាតព្វកិច្ចបង្ហាញបណ្ណចាក់វ៉ាក់សាំងកូវីដ ១៩។ ៣ ចំពោះកុមារដែលមានអាយុក្រោម ៦ ឆ្នាំ ដែលមិនទាន់ស្ថិតក្នុងក្រុមគោលដៅត្រូវទទួលបានវ៉ាក់សាំង មិនមានកាតព្វកិច្ចបង្ហាញបណ្ណចាក់វ៉ាក់សាំងនោះទេ។
៤ ចំពោះគ្រឹះស្ថានសិក្សា គណៈនាយកឬ គណៈគ្រប់គ្រងត្រូវរៀបចំយន្តការ ដើម្បីត្រួតពិនិត្យ បណ្ណចាក់វ៉ាក់សាំងរបស់សាស្ត្រាចារ្យ លោកគ្រូ-អ្នកគ្រូ បុគ្គលិកអប់រំ និងសិស្ស-និស្សិត ឱ្យបានត្រឹមត្រូវមុននឹងអនុញ្ញាតឱ្យចូលសិក្សាក្នុងគ្រឹះស្ថានសិក្សា (សម្រាប់តែមួយលើកគត់) និងត្រូវធ្វើការត្រួតពិនិត្យជាប្រចាំចំពោះភ្ញៀវដែលចេញ-ចូលមកទំនាក់ទំនងការងារផ្សេងៗ។
៥ គណៈកម្មការផ្សារ ម្ចាស់អាជីវកម្មដ្ឋាន ម្ចាស់ទីតាំង ម្ចាស់ផ្សារឯកជន ម្ចាស់ផ្សារម៉ាត ម្ចាស់ភោជនីយដ្ឋាន អាហារដ្ឋាន ហាងកាហ្វេ វិស័យឯកជន និងម្ចាស់ទីតាំងផ្សេងទៀតដែលត្រូវបានអនុញ្ញាតឱ្យបើកដំណើរការ ចាំបាច់ត្រូវមានកាតព្វកិច្ចចាត់តាំងបុគ្គលិកប្រចាំការនៅមុខច្រកចេញ ចូលទីតាំង ទីកន្លែងរបស់ខ្លួន ដើម្បីធ្វើការត្រួតពិនិត្យបណ្ណចាក់វ៉ាក់សាំង តាមគោលការណ៍ណែនាំខាងលើនេះ ហើយប្រសិនបើមានបុគ្គលណាម្នាក់មិនព្រមសហការបង្ហាញបណ្ណចាក់វ៉ាក់សាំង ដាច់ខាតមិនត្រូវអនុញ្ញាតឱ្យចូលក្នុងទីតាំង ឬទីកន្លែងរបស់ខ្លួនឡើយ និងត្រូវរាយការណ៍ទៅអាជ្ញាធរក្បែរនោះជាបន្ទាន់។
សេចក្តីណែនាំបន្តថា វិធានការទី ៦ ចំពោះគណៈគ្រប់គ្រងគ្រឹះស្ថានសិក្សា គណៈកម្មការផ្សារ ម្ចាស់អាជីវកម្មដ្ឋាន ម្ចាស់ទីតាំង ម្ចាស់ ផ្សារឯកជន ម្ចាស់ផ្សារម៉ាត ម្ចាស់ភោជនីយដ្ឋាន អាហារដ្ឋាន ហាងកាហ្វ វិស័យឯកជន និងម្ចាស់ទីតាំងផ្សេងទៀតដែលត្រូវបានអនុញ្ញាតឱ្យបើកដំណើរការ ប៉ុន្តែមិនបានអនុវត្តតាមគោលការណ៍ណែនាំខាងលើ ត្រូវប្រឈមមុខនឹងការដកហូតអាជ្ញាបណ្ណ ឬលិខិតអនុញ្ញាត និងអាចឈានទៅបិទទីតាំង ព្រមទាំងត្រូវចាត់វិធានការច្បាប់ផងដែរ៕
វីដេអូ៖