.jpg)
រដ្ឋបាលខេត្តត្បូងឃ្មុំ សម្រេចអនុញ្ញាតឱ្យបើកដំណើរការឡើងវិញទីតាំងក្នុងភូមិទី ២ ឃុំរកាខ្នុរ ស្រុកក្រូចឆ្នារ ចាប់ពីថ្ងៃទី ៥ តុលា។ រូបថត រដ្ឋបាលខេត្តត្បូងឃ្មុំ
រដ្ឋបាលខេត្តត្បូងឃ្មុំ សម្រេចអនុញ្ញាតឱ្យបើកដំណើរការឡើងវិញនូវទីតាំងក្នុងភូមិទី ២ ឃុំរកាខ្នុរ ស្រុកក្រូចឆ្នារ ចាប់ពីថ្ងៃទី ៥ ខែតុលា តទៅ បន្ទាប់ពីបានបិទខ្ទប់មួយរយៈ ប៉ុន្តែអ្នករស់នៅក្នុងភូមិនេះ ត្រូវតែបន្តអនុវត្តវិធានការរដ្ឋបាល និងវិធានការសុខាភិបាលឱ្យបានតឹងរ៉ឹង។
សេចក្តីសម្រេចរបស់អភិបាលខេត្តត្បូងឃ្មុំលោក ជាម ច័ន្ទសោភ័ណ្ឌ ចុះថ្ងៃទី ៥ ខែតុលានេះ បានឱ្យដឹងថា ទន្ទឹមនឹងការបើកភូមិឡើងវិញនេះ អាជ្ញាធរមានសមត្ថកិច្ចត្រូវអនុវត្តឱ្យបានហ្មត់ចត់តាមអនុសាសន៍របស់លោកនាយករដ្ឋមន្ត្រី ហ៊ុន សែន ៣ ការពារ ៣ កុំ និងវិធានការសុខាភិបាល ដើម្បីទប់ស្កាត់ការរីករាលដាលនៃជំងឺកូវីដ ១៩ ក្នុងសហគមន៍។
សេចក្តីសម្រេចបន្តថា ចំពោះបុគ្គលទាំងឡាយណា ដែលល្មើសវិធានការច្បាប់នានាពាក់ព័ន្ធការគ្រប់គ្រងជំងឺកូវីដ ១៩ នឹងត្រូវប្រឈមមុខផ្លូវច្បាប់។
សូមជម្រាបថា ចំពោះទីតាំងក្នុងភូមិទី ២ ឃុំរកាខ្នុរ ស្រុកក្រូចឆ្នារ ខេត្តត្បូងឃ្មុំ ត្រូវបានរដ្ឋបាលខេត្ត សម្រេចបិទខ្ទប់ការចេញ-ចូល ជាបណ្តោះអាសន្ន កាលពីថ្ងៃទី ២៤ ខែ កញ្ញា ឆ្នាំ ២០២១៕
