.jpg)
ឥណ្ឌាផ្តល់ជំនួយបង្កើតមជ្ឈមណ្ឌលព័ត៌មានវិទ្យា នៅពុទ្ធិកសាកលវិទ្យាល័យព្រះសីហនុរាជ។ រូបថត ក្រសួងព័ត៌មាន
រដ្ឋាភិបាលឥណ្ឌា សម្រេចផ្តល់ជំនួយដល់កម្ពុជាដូចជា កំព្យូទ័រ និងផ្តល់ការបណ្តុះបណ្តាលគ្រូព័ត៌មានវិទ្យា ដើម្បីបង្កើតមជ្ឈមណ្ឌលព័ត៌មានវិទ្យា (IT) នៅពុទ្ធិកសាកលវិទ្យាល័យព្រះសីហនុរាជ។
ការផ្តល់ជំនួយនេះត្រូវបានធ្វើឡើងតាមរយៈ ការចុះហត្ថលេខាលើអនុស្សរណៈនៃការយោគយល់ ស្តីពីការបង្កើតមជ្ឈមណ្ឌលព័ត៌មានវិទ្យា នៅពុទ្ធិកសាកលវិទ្យាល័យព្រះសីហនុរាជ នាថ្ងៃទី ០៤ ខែ តុលា ឆ្នាំ ២០២១ រវាង
សម្តេចព្រះមហាអរិយវង្ស បណ្ឌិត ឃី សុវណ្ណរតនា សាកលវិទ្យាធិការរងទទួលបន្ទុកដឹកនាំគ្រប់គ្រងរួម នៃពុទ្ធិកសាកលវិទ្យាល័យព្រះសីហនុរាជ និងលោកស្រី ទេវ្យានី ខូប្រាហ្គាដេ (Devyani Khobragade) ឯកអគ្គរដ្ឋទូតឥណ្ឌា ប្រចាំកម្ពុជា។
មជ្ឈមណ្ឌលព័ត៌មានវិទ្យានេះ នឹងផ្តល់វគ្គសិក្សាផ្នែកព័ត៌មានវិទ្យាដល់សមណនិស្សិត និងនិស្សិតទាំងអស់នៃពុទ្ធិកសាកលវិទ្យាល័យព្រះសីហនុរាជ។
យោងតាមសេចក្តីប្រកាសព័ត៌មានរបស់ស្ថានទូតឥណ្ឌា កាលពីថ្ងៃទី ៥ ខែ តុលា ឆ្នាំ ២០២១ បានឱ្យដឹងថា ការផ្តួចផ្តើមនេះស្ថិតនៅក្រោមគម្រោងផលប៉ះពាល់រហ័ស (Quick Impact Project: QIP) របស់រដ្ឋាភិបាលឥណ្ឌា ក្រោមក្របខ័ណ្ឌកិច្ចសហប្រតិបត្តិការមេគង្គ-គង្គា (MGC)។
ប្រភពដដែលបានបន្តថា ក្រោមគម្រោង QIP រដ្ឋាភិបាលឥណ្ឌាគាំទ្រគម្រោងចំនួន ១០ នៅកម្ពុជា ជារៀងរាល់ឆ្នាំ ដោយផ្តល់ថវិការហូតដល់ ៥ ម៉ឺនដុល្លារអាមេរិកក្នុងមួយគម្រោង៕
