.jpg)
ពលរដ្ឋដែលចូលទៅលេងកម្សាន្តតំបន់រមណីយដ្ឋានអន្លង់ជ្រៃដ៏ច្រើនកុះករនាថ្ងៃសម្រាកភ្ជុំបិណ្ឌកន្លងមកនេះ ពុំបានចូលរួមអនុវត្តនូវវិធានការសុខាភិបាល ៣ ការពារ និង ៣ កុំ ក្នុងការទប់ស្កាត់ការឆ្លងរាលដាលនៃជំងឺកូវីដ ១៩។
ត្បូងឃ្មុំៈ រដ្ឋបាលស្រុកពញាក្រែកនៃខេត្ដត្បូងឃ្មុំសម្រេចផ្អាកការចូលកម្សាន្តក្នុងតំបន់រមណីយដ្ឋានអន្លង់ជ្រៃនៅថ្ងៃទី ៧ ខែតុលានេះ ក្រោយពីអាជីវករ និងពលរដ្ឋដែលចូលទៅលេងកម្សាន្តច្រើនកុះករនាថ្ងៃសម្រាកភ្ជុំបិណ្ឌកន្លងមកនេះ ពុំបានចូលរួមអនុវត្តនូវវិធានការសុខាភិបាល ៣ ការពារ និង ៣ កុំ ក្នុងការទប់ស្កាត់ការឆ្លងរាលដាលនៃជំងឺកូវីដ ១៩។
យោងតាមសេចក្ដីជូនដំណឹងរបស់រដ្ឋបាលស្រុកពញាក្រែក ស្ដីពីការផ្អាកការចូលកម្សាន្តក្នុងតំបន់រមណីយដ្ឋានអន្លង់ជ្រៃនេះ រដ្ឋបាលស្រុកបានជម្រាបជូនបងប្អូនប្រជាពលរដ្ឋក្នុងស្រុក និងសាធារណៈមតិទាំងអស់ថា រដ្ឋបាលស្រុកពញាក្រែក សម្រេចផ្អាកការចូលលេងកម្សាន្ដក្នុងតំបន់រមណីយដ្ឋានអន្លង់ជ្រៃស្ថិតនៅភូមិអន្លង់ជ្រៃ ឃុំកក់ ស្រុកពញាក្រែក ខេត្តត្បូងឃ្មុំ ចំនួន ១ ថ្ងៃ គឺថ្ងៃទី ៧ ខែតុលា ឆ្នាំ ២០២១ នេះ។
រដ្ឋបាលស្រុកបញ្ជាក់ថា ការផ្អាកនេះ ដោយហេតុអាជីវករលក់ដូរ និងបងប្អូនប្រជាពលរដ្ឋដែលទៅកម្សាន្ដនៅរមណីយដ្ឋានខាងលើនេះ ពុំចូលរួមអនុវត្តនូវវិធានការ ៣ ការពារ និង ៣ កុំ ក្នុងការចូលរួមទប់ស្កាត់ការឆ្លងរាលដាលនៃជំងឺកូវីដ ១៩។
បើតាមរដ្ឋបាលស្រុកការផ្អាកនេះ គឺដោយទទួលបានគោលការណ៍ឯកភាពពី លោក ជាម ច័ន្ទ សោភ័ណ អភិបាលខេត្តត្បូងឃ្មុំ។ អាស្រ័យហេតុនេះ រដ្ឋបាលស្រុក ស្នើសុំអាជីវករ និងប្រជាពលរដ្ឋទាំងអស់ សហការអនុវត្តឱ្យបានល្អប្រសើរ៕
វីដេអូ៖
