.jpg)
រដ្ឋបាលខេត្ដសៀមរាបអនុញ្ញាតឱ្យភោជនីយដ្ឋាន និងអាហារដ្ឋានចំនួន ៩ កន្លែងក្នុងក្រុងសៀមរាប បើកបម្រើសេវាកម្មចំណីអាហារនៅនឹងកន្លែងដល់ផ្ញៀវទេសចរឡើងវិញក្នុងថ្ងៃឈប់សម្រាកពិធីបុណ្យភ្ជុំបិណ្ឌ។ រូបថត ក្រសួងព័ត៌មាន
សៀមរាបៈ រដ្ឋបាលខេត្ដសៀមរាបអនុញ្ញាតឱ្យភោជនីយដ្ឋាន និងអាហារដ្ឋានចំនួន ៩ កន្លែងក្នុងក្រុងសៀមរាប បើកបម្រើសេវាកម្មចំណីអាហារនៅនឹងកន្លែងដល់ផ្ញៀវទេសចរឡើងវិញក្នុងថ្ងៃឈប់សម្រាកពិធីបុណ្យភ្ជុំបិណ្ឌ ខណៈថ្ងៃភ្ជុំបិណ្ឌ ២ ថ្ងៃកន្លងមកនេះមានភ្ញៀវទេសចរជិត ២ ម៉ឺននាក់បានធ្វើដំណើរកម្សាន្តនៅតាមរមណីយដ្ឋាននានាក្នុងខេត្ដនេះ។
លោក ង៉ូវ សេងកាក់ ប្រធានមន្ទីរទេសចរណ៍ខេត្តបានថ្លែងកាលពីថ្ងៃទី ៦ ខែតុលា ឆ្នាំ ២០២១ ថា បន្ទាប់ពីមានការបើកតំបន់ក្រហម និងតំបន់លឿងទុំក្នុងភូមិសាស្ត្រខេត្តសៀមរាប ក្រុមការងារចម្រុះរដ្ឋបាលខេត្ត និងក្រុមការងារជំនាញរបស់មន្ទីរទេសចរណ៍ខេត្តបានចុះមកពិនិត្យ និងវាយតម្លៃទីតាំងអាជីវកម្ម ភោជនីយដ្ឋាន និងអាហារដ្ឋានជាបន្តបន្ទាប់ ដើម្បីសម្រួលដល់ការបើកអាជីវកម្មឡើងវិញ បម្រើសេវាកម្មដល់ភ្ញៀវទេសចរក្នុងថ្ងៃសម្រាបភ្ជុំបិណ្ឌ។
លោកថ្លែងថា៖ «ក្រុមការងារក៏បានជំរុញដល់ម្ចាស់ទីតាំងអាជីវកម្មនានា ណែនាំដល់បុគ្គលិកពាក់បណ្ណទទួលការចាក់សាំង និងផ្ដល់ការបញ្ចុះតម្លៃដល់អតិថិជនណាដែលទទួលបានការចាក់វ៉ាក់សាំងផងដែរ ដើម្បីបង្ហាញពីទំនុកចិត្ត និងកាត់បន្ថយហានិភ័យដល់សុខភាពភាគីទាំងសងខាង»។
បើតាម លោក ធឹម សេរីវុឌ្ឍ ប្រធានការិយាល័យគ្រប់គ្រងឧស្សាហកម្មទេសចរណ៍នៃមន្ទីរទេសចរណ៍ខេត្តសៀមរាប បញ្ជាក់ថា ការស្នើលិខិតអនុញ្ញាតបម្រើសេវាកម្មនៅនឹងកន្លែងរបស់អាហារដ្ឋាន និងភោជនីយដ្ឋានទេសចរណ៍នេះពុំមានការបង់ប្រាក់ឡើយ។ ចំណែក ការវាយតម្លៃចែកចេញជា ៣ ប្រភេទ គឺអាហារដ្ឋាន និងភោជនីយដ្ឋានទេសចរណ៍ កម្រិតខ្ពស់ មធ្យម និងទាប។
តាមរបាយការណ៍របស់មន្ទីរទេសចរណ៍ខេត្តសៀមរាបបានឱ្យដឹងថា នៅថ្ងៃទី ៦ ខែតុលា ឆ្នាំ ២០២១ នេះ ដែលជាថ្ងៃភ្ជុំបិណ្ឌនោះមានភ្ញៀវទេសចរចំនួនជាង ១២ ០០០ នាក់បានធ្វើដំណើរកម្សាន្តនៅតាមរមណីយដ្ឋាននានាក្នុងខេត្តសៀមរាបជាលក្ខណៈគ្រួសារ។ ក្នុងនោះទេសចរបានទៅទស្សនារមណីយដ្ឋានអង្គរមានចំនួនប្រមាណ ៧ ០០០ នាក់ , រមណីយដ្ឋានឧទ្យានជាតិភ្នំគូលែនមានចំនួនប្រមាណ ២ ៨០០ នាក់ និងទៅសហគមន៍ទេសចរណ៍-អេកូទេសចរណ៍ចំនួនប្រមាណ ២ ២០០ នាក់ក្នុងចំណោមភ្ញៀវទេសចរនេះ ក៏មានទេសចរបរទេសចំនួន ៩៦ នាក់ផងដែរ។
បើសរុបរយៈពេល ២ ថ្ងៃនៃថ្ងៃភ្ជុំបិណ្ឌ គឺថ្ងៃទី ៥ និង ថ្ងៃទី ៦ ខែតុលា ឆ្នាំ ២០២១ នេះ មានភ្ញៀវទេសចរចំនួនជាង ១៩ ០០០ នាក់បានធ្វើដំណើរកម្សាន្តនៅតាមរមណីយដ្ឋាននានាក្នុងខេត្តសៀមរាប។ នេះបើតាមរបាយការណ៍បញ្ជាក់៕
