បន្ទាយមានជ័យៈ រដ្ឋបាលខេត្ដបន្ទាយមានជ័យសម្រេចបន្តអនុវត្តវិធានការរដ្ឋបាលជាបណ្ដោះអាសន្ន ដើម្បីទប់ស្កាត់ការរីករាលដាលជំងឺកូវីដ ១៩ នៅក្នុងភូមិសាស្ត្រខេត្តបន្ទាយមានជ័យរយៈពេល ១ សប្តាហ៍ទៀតចាប់ពីថ្ងៃទី ៧ ខែតុលា ដល់ថ្ងៃទី ១៣ ខែតុលា ឆ្នាំ ២០២១ សំដៅទប់ស្កាត់ការឆ្លងរាលដាលក្នុងសហគមន៍ ដែលបណ្តាលមកពីមេរោគកូវីដ ១៩ ប្រភេទដែលតា (Delta)។
យោងតាមសេចក្ដីសម្រេចរបស់រដ្ឋបាលខេត្ដនៅថ្ងៃទី ៦ ខែតុលានេះបានបញ្ជាក់ថាការបន្តដាក់ចេញនូវវិធានការរដ្ឋបាលជាបណ្តោះអាសន្ននេះ ដើម្បីទប់ស្កាត់ការឆ្លងរាលដាលជំងឺកូវីដ ១៩ នៅក្នុងភូមិសាស្ត្រខេត្តបន្ទាយមានជ័យ សំដៅទប់ស្កាត់ការឆ្លងរាលដាលក្នុងសហគមន៍ ដែលបណ្តាលមកពីមេរោគកូវីដ ១៩ ប្រភេទដែលតា (Delta)។
រដ្ឋបាលខេត្ដបញ្ជាក់ថា តាមរយៈវិធានការនេះត្រូវបានបន្តផ្អាកជាបណ្ដោះអាសន្ននូវសកម្មភាពការធ្វើចរាចរណ៍ឆ្លងកាត់ផ្លូវក្នុងភូមិសាស្ត្រទូទាំងខេត្តចាប់ពីម៉ោង ២១ យប់ ដល់ម៉ោង ៣ ព្រឹក ជាកំហិត។
លើកលែងតែចំពោះករណីដូចជា ការធ្វើដំណើររបស់មន្ត្រីរាជការ និងកងកម្លាំងប្រដាប់អាវុធគ្រប់ប្រភេទ។ ការធ្វើដំណើរដោយមូលហេតុសុខភាពបន្ទាន់។ ការដឹកជញ្ជូនទំនិញ និងគ្រឿងឧបភោគបរិភោគ។ ការដឹកជញ្ជូនទំនិញយុទ្ធសាស្ត្ររបស់រដ្ឋ។ សេវាសង្គ្រោះបន្ទាន់ និងសេវាសុខាភិបាលទាំងរដ្ឋ និងឯកជន ឱសថស្ថាន សេវាពន្លត់អគ្គិភ័យ សេវាផ្គត់ផ្គង់អគ្គិសនី និងទឹកស្អាត សេវាប្រតិបត្តិការផ្នែកទូរគមនាគមន៍ ទីតាំងផលិតគ្រឿងឧបភោគ បរិភោគ និងទំនិញយុទ្ធសាស្ត្រដែលបម្រើឱ្យការប្រយុទ្ធនិងទប់ស្កាត់ជំងឺកូវីដ ១៩ ទីតាំងផលិត និងផ្គត់ផ្គង់ឱសថ អាល់កុល អុកស៊ីហ្ស៊ែន និងសម្ភារបរិក្ខារវេជ្ជសាស្ត្រផ្សេងទៀត ស្ថានីយប្រេង ឥន្ធនៈ-ហ្គាស សេវាសណ្ឋាគារ និងផ្ទះសំណាក់ ការបំពេញកាតព្វកិច្ចដែលបម្រើផលប្រយោជន៍សាធារណៈ និងករណីចាំបាច់ ឬសេវាសាធារណៈចាំបាច់ដទៃទៀត។
រដ្ឋបាលខេត្ដបញ្ជាក់ថា រាល់សកម្មភាពនៃការជួបជុំ ឬការប្រមូលផ្តុំមនុស្សសកម្មភាពការងារ មុខរបរ និងអាជីវកម្មដែលត្រូវបានអនុញ្ញាតត្រូវអនុវត្តវិធានការសុវត្ថិភាពផ្នែកសុខាភិបាលឱ្យបានម៉ឺងម៉ាត់ ជាអាទិ៍ កាតព្វកិច្ច ពាក់ម៉ាស់ និងកាតព្វកិច្ចរក្សាគម្លាតសុវត្ថិភាពបុគ្គល និងត្រូវប្រកាន់ខ្ជាប់នូវការធ្វើអនាម័យ ដើម្បីសម្លាប់មេរោគ ការវាស់កម្ដៅ និងការអនុវត្តវិធានការសុវត្ថិភាពផ្នែកសុខាភិបាលផ្សេងទៀត និងការធ្វើដំណើរចាំបាច់ផ្សេងៗទៀត ដែលមានការអនុញ្ញាតពីអាជ្ញាធរមានសមត្ថកិច្ច។
«បុគ្គល ឬនីតិបុគ្គលទាំងឡាយណា ដែលមិនអនុវត្តតាមខ្លឹមសារខាងលើ នឹងត្រូវទទួលទោសដូចមានកំណត់ក្នុងច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត និងលិខិតបទដ្ឋានគតិយុត្តពាក់ព័ន្ធជាធរមាន»។ នេះបើតាមរដ្ឋបាលខេត្ដបញ្ជាក់ក្នុងសេចក្ដីសម្រេចនេះ៕