.jpg)
ករណីគ្រោះថ្នាក់កាលពីម្សិលមិញ។ រូបថត ប៉ូលីស
ភ្នំពេញៈ រយៈពេល ៣ថ្ងៃ គឺថ្ងៃទី ៥ ដល់ថ្ងៃទី៧ ខែតុលា នៃឱកាសសម្រាកភ្ជុំបិណ្ឌឆ្នាំនេះ គ្រោះថ្នាក់ចរាចណ៍នៅទូទាំងប្រទេស កើតឡើង ៣៥ លើក បណ្តាលឱ្យមនុស្សស្លាប់ ១៤ នាក់ និងរបួស ៦៤នាក់ ក្នុងនោះរបួសធ្ងន់ ៤៣នាក់។ ចំនួនអ្នករបួស និងស្លាប់ដោយគ្រោះថ្នាក់ចរាចរណ៍ឆ្នាំនេះ ប្រហាក់ប្រហែលនឹងឆ្នាំមុនដែរ។
យោងតាមរបាយការណ៍របស់នាយកដ្ឋាននគរបាលចរាចរណ៍ និងសណ្តាប់សាធារណៈ នៃអគ្គស្នងការដ្ឋាននគរបាលជាតិ បង្ហាញថា នៅថ្ងៃទី៥ ខែតុលា ត្រូវនឹងថ្ងៃទី១ នៃថ្ងៃឈប់សម្រាកបុណ្យភ្ជុំបិណ្ឌ នៅទូទាំងប្រទេស កើតមានគ្រោះថ្នាក់ចរាចរណ៍ផ្លូវគោក ចំនួន ៩ លើក បណ្តាលឱ្យស្លាប់ ៥នាក់ និងរបួស ១៨នាក់។ នៅថ្ងៃទី៦ ខែតុលា មានគ្រោះថ្នាក់ចរាចរណ៍ កើតឡើង ១១ លើក បណ្តាលឱ្យស្លាប់ ៣ នាក់ និងរបួស ២២ នាក់។ ចំណែកថ្ងៃទី៧ តុលានេះ គ្រោះថ្នាក់ចរាចរណ៍ កើតឡើង ១៥ លើក បណ្តាលឱ្យមានមនុស្សស្លាប់ ៦ នាក់ និងរបួស ២៤នាក់។
តាមរបាយការណ៍ដដែល មូលហេតុគ្រោះថ្នាក់ចរាចរណ៍កើតមាន ក្នុងពេលភ្ជុំបិណ្ឌនេះ បង្កឡើងច្រើនជាងគេ ដោយសារបើកបរលើសល្បឿនកំណត់ បើកបរមិនគោរពសិទ្ធិវ៉ាប្រជែងគ្រោះថ្នាក់ បត់គ្រោះថ្នាក់ និងដោយសារអ្នកបើកបរមានសារធាតុស្រវឹង។
កាលពីរដូវបុណ្យភ្ជុំបិណ្ឌ ៣ថ្ងៃ កាលពីឆ្នាំ២០២០ ត្រូវនឹងថ្ងៃទី១៦ ដល់ថ្ងៃទី១៨ ខែកញ្ញា ឆ្នាំ២០២០ គ្រោះថ្នាក់ចរាចរណ៍ នៅទូទាំងប្រទេសបណ្ដាលឱ្យមនុស្ស ១៥ នាក់ ស្លាប់ និងរបួស ៦២នាក់៕
