.jpg)
គ្រូពេទ្យកំពុងចាក់វ៉ាក់សាំងឱ្យកុមារអាយុចាប់ពី ៦ ឆ្នាំ ដល់ ៨ ឆ្នាំ នៅមន្ទីរពេទ្យបង្អែកពោធិ៍ចិនតុង ថ្ងៃទី ១៧ ខែកញ្ញា។ ហេង ជីវ័ន
ភ្នំពេញៈ រដ្ឋបាលរាជធានីភ្នំពេញ ក្រើនរំឭកដល់មាតាបិតា អាណាព្យាបាល និងអ្នកគ្រប់គ្រងមណ្ឌលថែទាំកុមារឱ្យនាំយកកុមារដែលមានអាយុចាប់ពី ៦ ឆ្នាំ ដល់ក្រោម ១២ ឆ្នាំ ទៅទទួលវ៉ាក់សាំងបង្ការជំងឺកូវីដ ១៩ ឱ្យបានមុនពេលបិទបញ្ចប់យុទ្ធនាការនៅតាមទីតាំងចំនួន ៨ ទីតាំង ដែលរដ្ឋបាលរាជធានីភ្នំពេញជូនដំណឺង។
យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញនៅថ្ងៃទី ៨ ខែតុលានេះ រដ្ឋបាលរាជធានីភ្នំពេញសង្កេតឃើញថា កុមារភាគច្រើនបានមកទទួលវ៉ាក់សាំងបង្ការជំងឺកូវីដ១៩ ប៉ុន្តែក៏នៅមានមួយចំនួនខកខានមិនទាន់បានអញ្ជើញមកទទួលវ៉ាក់សាំងបង្ការជំងឺកូវីដ ១៩ នៅឡើយ ដោយសារមូលហេតុផ្សេងៗ រួមមាន ជាប់អនុវត្តវិធានចត្តាឡីស័ក, មានបញ្ហាសុខភាព, មានធុរៈចាំបាច់ ឬទើបគ្រប់អាយុទទួលវ៉ាក់សាំង។
រដ្ឋបាលរាជធានីភ្នំពេញបញ្ជាក់ថា ក្នុងន័យនេះអនុគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងរាជធានីភ្នំពេញ សម្រេចបន្តផ្តល់វ៉ាក់សាំងបង្ការជំងឺកូវីដ ១៩ ដូសទី១ ជូនកុមារដែលខកខានមិនបានមកទទួលវ៉ាក់សាំងដោយមូលហេតុខាងលើ ចាប់ពីថ្ងៃជូនដំណឹងនេះរហូតដល់មានការជូនដំណឹងជាថ្មីនៅតាមទីតាំងមន្ទីរពេទ្យបង្អែក ចំនួន ៨ ទីតាំង រៀងរាល់ម៉ោង ៨ ព្រឹក ដល់ម៉ោង ១៧ រសៀល។
ទីតាំងទាំង ៨ នោះរួមមាន មន្ទីរពេទ្យបង្អែករាជធានីភ្នំពេញ មន្ទីរពេទ្យបង្អែកចតុមុខ មន្ទីរពេទ្យបង្អែកដង្កោ មន្ទីរពេទ្យបង្អែកមិត្តភាពកម្ពុជា-ចិនសែនសុខ មន្ទីរពេទ្យបង្អែកច្បារអំពៅ មន្ទីរពេទ្យបង្អែកពោធិ៍ចិនតុង មន្ទីរពេទ្យបង្អែកព្រែកព្នៅ និងមន្ទីរពេទ្យបង្អែកសម្ដេចឪ-សម្តេចម៉ែ។
រដ្ឋបាលរាជធានីភ្នំពេញបានឱ្យដឹងថា រដ្ឋបាលរាជធានីភ្នំពេញបានដំណើរការយុទ្ធនាការចាក់វ៉ាក់សាំងបង្ការជំងឺកូវីដ ១៩ ជូនកុមារដែលមានអាយុចាប់ពី ៦ ឆ្នាំ ដល់ក្រោម ១២ ឆ្នាំ ហើយបានបញ្ចប់ការចាក់ដូសទី១ នៅថ្ងៃទី ៣ ខែ តុលា ឆ្នាំ ២០២១ កន្លងទៅនេះ។ ដូច្នេះ សម្រាប់ការចាក់វ៉ាក់សាំងដូសទី២ ដល់កុមារដែលបានចាក់ដូសទី១ រួចហើយ រដ្ឋបាលរាជធានីភ្នំពេញនឹងចាប់ផ្តើមចាក់ពីថ្ងៃទី ៨ ដល់ថ្ងៃទី ២៤ ខែ តុលា ឆ្នាំ ២០២១ រៀងរាល់ម៉ោង ៨ ព្រឹក ដល់ម៉ោង ១៧ រសៀល នៅទីតាំងចំនួន ៤២ ទីតាំង ដែលបានកំណត់នៅក្នុងឧបសម្ព័ន្ធនៃសេចក្ដីជូនដំណឹងលេខ ០៧៧ សជណ ចុះថ្ងៃទី ១៦ ខែ កញ្ញា ឆ្នាំ ២០២១ នាពេលកន្លងទៅ។
រដ្ឋបាលរាជធានីភ្នំពេញ បានក្រើនរំឭក និងអំពាវនាវ ចំពោះមាតាបិតា-អាណាព្យាបាលដែលត្រូវនាំបុត្រធីតា ឬសាច់ញាតិ មកទទួលវ៉ាក់សាំងបង្ការជំងឺកូវីដ ១៩ ត្រូវប្រកាន់ខ្ជាប់ឱ្យបានជាដាច់ខាតនូវការរក្សាគម្លាតសុវត្ថិភាពសង្គម ពាក់ម៉ាស់ តម្រង់ជួរ ចៀសវាងការឈរប្រជ្រៀតគ្នា ណែនណាន់តាន់តាប់ ហើយត្រូវប្រកាន់ខ្ជាប់ការចូលរួមអនុវត្តនូវវិធានការសុខាភិបាល និងវិធានការ «៣ ការពារ និង ៣ កុំ» ដោយឈរលើស្មារតីស្រឡាញ់ជាតិ សហគមន៍ គ្រួសារ និងអាយុជីវិតផ្ទាល់ខ្លួនក្នុងឆន្ទៈរួមគ្នាជាធ្លុងមួយ ដើម្បីឈានទៅកាត់ផ្តាច់ និងលុបបំបាត់ការឆ្លងរាលដាលជំងឺកូវីដ ១៩ ក្នុង ព្រឹត្តិការណ៍សហគមន៍ ២០ កុម្ភៈ ២០២១ ឱ្យបានឆាប់នាពេលខាងមុខនេះ៕
វីដេអូ៖
