ភ្នំពេញៈ ក្រុមប្រឹក្សាធម្មនុញ្ញនឹងបើកកិច្ចប្រជុំរៀបចំសេចក្តីទូលថ្វាយមតិថ្វាយព្រះករុណាជាអម្ចាស់ជីវិតលើត្បូង លើសេចក្តីព្រាងច្បាប់ ធម្មនុញ្ញស្តីពី ការកំណត់ «សញ្ជាតិខ្មែរតែមួយ» ចំពោះថ្នាក់ដឹកនាំស្ថាប័នកំពូលរបស់ជាតិនៅថ្ងៃទី ១១ ខែតុលា ឆ្នាំ ២០២១។ នេះបើតាមសេចក្តីប្រកាសព័ត៌មានរបស់អគ្គលេខាធិការនៃក្រុមប្រឹក្សាធម្មនុញ្ញនៅថ្ងៃទី ៩ ខែតុលានេះ។
តាមរយៈសេចក្ដីប្រកាសព័ត៌មាន អគ្គលេខាធិការនៃក្រុមប្រឹក្សាធម្មនុញ្ញបានជម្រាបជូនសាធារណជនជ្រាបថា នៅថ្ងៃ ទី ១១ ខែតុលា ឆ្នាំ ២០២១ ចាប់ពីម៉ោង ០៩ : ០០ នាទី នៅអគារ ស វិមានរដ្ឋចំការមន។
សេចក្ដីប្រកាសព័ត៌មានបញ្ជាក់ថា៖ «ក្រុមប្រឹក្សាធម្មនុញ្ញក្រោមអធិបតីភាព លោក អ៊ឹម ឈុនលឹម ប្រធានក្រុមប្រឹក្សាធម្មនុញ្ញនឹងបើកកិច្ចប្រជុំពេញអង្គ ដើម្បីពិនិត្យ និងរៀបចំសេចក្តីទូលថ្វាយមតិរបស់ក្រុមប្រឹក្សាធម្មនុញ្ញ ថ្វាយ ព្រះករុណាជាអម្ចាស់ជីវិតលើត្បូងជាទីគោរពសក្ការៈដ៏ខ្ពង់ខ្ពស់បំផុត ទ្រង់ពិគ្រោះមតិក្រុមប្រឹក្សាធម្មនុញ្ញតាមរយៈព្រះរាជសារចុះថ្ងៃទី ៨ ខែតុលា ឆ្នាំ ២០២១ ចំពោះសេចក្តីព្រាងច្បាប់ធម្មនុញ្ញស្តីពីវិសោធនកម្មមាត្រា ១៩ ថ្មី មាត្រា ៨២ ថ្មី មាត្រា ១០៦ ថ្មី (មួយ) មាត្រា ១១៩ ថ្មី និងមាត្រា ១៣៧ ថ្មីនៃរដ្ឋធម្មនុញ្ញ នៃព្រះរាជាណាចក្រកម្ពុជា និងមាត្រា ៣ និងមាត្រា ៤ នៃច្បាប់ធម្មនុញ្ញបន្ថែមសំដៅធានានូវដំណើរការជាប្រក្រតីនៃស្ថាប័នជាតិ»៕