ភ្នំពេញៈ ក្រសួងសេដ្ឋកិច្ច និងហិរញ្ញវត្ថុ ដឹកនាំប្រជុំជាមួយគណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម.) និងក្រសួងកសិកម្ម រុក្ខាប្រមាញ់ និងនេសាទ ដើម្បីត្រៀមអន្តរាគមន៍ផ្ដល់គ្រាប់ពូជស្រូវដល់ពលរដ្ឋក្រីក្រ និងរងគ្រោះ ដោយគ្រោះមហន្តរាយ ដើម្បីស្ដារឡើងវិញក្នុងឆ្នាំ ២០២១ នេះ ខណៈស្ថានភាពទឹកជំនន់មានការស្រកចុះច្រើន។ នេះបើតាមមន្ដ្រីនាំពាក្យ គ.ជ.គ.ម.។
លោក ឃុន សុខា មន្ត្រីនាំពាក្យ គ.ជ.គ.ម. ថ្លែងប្រាប់ភ្នំពេញប៉ុស្ដិ៍នៅថ្ងៃទី ៩ តុលានេះថា កាលពីថ្ងៃទី ៨ ខែតុលា ឆ្នាំ ២០២១ លោក ឡាំ ហេងហួត អនុប្រធាន គ.ជ.គ.ម. បានដឹកនាំមន្ត្រី ចូលរួមកិច្ចប្រជុំ ស្ដីពីការត្រៀមអន្តរាគមន៍ផ្ដល់គ្រាប់ពូជស្រូវដល់ពលរដ្ឋក្រីក្រ និងរងគ្រោះដោយគ្រោះមហន្តរាយ ដើម្បីស្ដារឡើងវិញ តាមប្រព័ន្ធអនឡាញ (Zoom) ដែលរៀបចំដោយក្រសួងសេដ្ឋកិច្ច និងហិរញ្ញវត្ថុ និងមានការចូលរួមពីតំណាងក្រសួងកសិកម្ម រុក្ខាប្រមាញ់ និងនេសាទ។
លោកថ្លែងថា៖ «ធម្មតារៀងរាល់ឆ្នាំក្រោយពេលទឹកជំនន់ស្រកចុះ ក្រសួងសេដ្ឋកិច្ច និងហិរញ្ញវត្ថុ បានសហការជាមួយ គ.ជ.គ.ម. និងក្រសួងពាក់ព័ន្ធ ដើម្បីត្រៀមកញ្ចប់ថវិកា អន្តរាគមន៍ផ្ដល់គ្រាប់ពូជស្រូវ ពូជដំណាំដល់ពលរដ្ឋក្រីក្រ និងរងគ្រោះដោយគ្រោះមហន្តរាយ ដើម្បីស្ដារឡើងវិញ»។
លោកបន្តថា៖ «កិច្ចការងារនេះ គឺយើងធ្វើជារៀងរាល់ឆ្នាំ ហើយពេលនេះ គឺយើងរៀបចំផែនការ ពិនិត្យមើលថា តើប្រជាពលរដ្ឋនៅខេត្ដណាមានផលប៉ះពាល់ ស្ថិតនៅខេត្ដណាខ្លះ យ៉ាងណាខ្លះ ដើម្បីត្រៀមចែកពូជស្រូវពូជដំណាំ»។
ចាប់តាំងពីខែកញ្ញា ឆ្នាំ ២០២១ នេះមក ជំនន់ទឹកភ្លៀងបានបង្កការជន់លិចខេត្ដមួយចំនួនដែលស្ថិតនៅភាគពាយ័ព្យនៃប្រទេសកម្ពុជា ក្នុងនោះខេត្ដបន្ទាយមានជ័យមានការជន់លិចធ្ងន់ធ្ងរជាងគេ។
យោងតាមរបាយការណ៍របស់ គ.ជ.គ.ម. ដោយគិតត្រឹមយប់ថ្ងៃទី ២៨ ខែកញ្ញា ឆ្នាំ ២០២១ ផលប៉ះពាល់សរុប ដែលបង្កដោយជំនន់ទឹកភ្លៀងក្នុងខេត្តបន្ទាយមានជ័យ ប៉ះពាល់ ៦ ក្រុង-ស្រុក ស្មើ ៣៨ ឃុំ-សង្កាត់។ ប៉ះពាល់ប្រជាជនប្រមាណ ១៨ ៧១៥ គ្រួសារ និងជម្លៀសទៅទួលសុវត្ថិភាពប្រមាណ ១១៥០ គ្រួសារ។ លិចស្រូវប្រមាណ ២៥ ២២៣ ហិកតា និងដំណាំរួមផ្សំ ប្រមាណ ៣០១ ហិកតា។ ប៉ះពាល់សាលារៀន ២៦ កន្លែង, វត្ត ៩ វត្ដ និងមណ្ឌលសុខភាព ២ កន្លែង។
ថ្ងៃសៅរទី ៩ ខែតុលា ឆ្នាំ ២០២១ នេះ លោក អ៊ុ រាត្រី អភិបាលខេត្តបន្ទាយមានជ័យបានចុះពិនិត្យមើលស្ថានភាពទឹកជំនន់ទឹកភ្លៀង និងពិនិត្យស្ថានភាពរស់នៅរបស់ប្រជាពលរដ្ឋនៅលើទីទួលសុវត្ថិភាព។ តាមរយៈការចុះអង្កេតនេះរដ្ឋបាលខេត្ដបញ្ជាក់ ស្ថានភាពទឹកមានការស្រកចុះច្រើន មានសភាពធូរស្រាល ទឹកបន្តហូរទៅផ្នែកខាងក្រោម គិតត្រឹមថ្ងៃទី ៩ តុលា ឆ្នាំ ២០២១ នេះ។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទលោក វេង សាខុន បានអះអាងកាលពីថ្ងៃទី ៧ ខែ កញ្ញា ឆ្នាំ ២០២១ ថា ក្រសួងបានត្រៀមបម្រុងរួចជាស្រេចនូវគ្រាប់ពូជស្រូវចំនួន ២ ០០០ តោន និងពូជដំណាំរួមផ្សំ ២៥ តោនសម្រាប់អន្តរាគមន៍ជួយសង្គ្រោះប្រជាកសិករ ដែលរងផលប៉ះពាល់ និងខូចខាតដោយគ្រោះធម្មជាតិ។
លោក សាខុន បានបញ្ជាក់ថា ប៉ុន្មានទសវត្សរ៍ចុងក្រោយនេះ វិស័យកសិកម្មមានការរីកចម្រើនគួរឱ្យកត់សម្គាល់។ តែវិស័យនេះក៏កំពុងជួបបញ្ហាមួយចំនួនផងដែរ ជាពិសេសគ្រោះមហន្តរាយធម្មជាតិរួមមានគ្រោះទឹកជំនន់ គ្រោះរាំងស្ងួត ខ្យល់កន្ត្រាក់ ជំងឺឆ្លង និងសមាសភាពសត្វល្អិតចង្រៃ តែងតែបំផ្លាញផលដំណាំរបស់បងប្អូនប្រជាកសិកររៀងរាល់ឆ្នាំ។
លោកបានបន្តថា ដោយពិនិត្យឃើញពីបញ្ហានេះ លោកនាយករដ្ឋមន្ត្រី ហ៊ុន សែន បានជំរុញ និងគាំទ្រលើការបង្កើនសមត្ថភាពត្រៀមបម្រុងស្បៀង និងគ្រាប់ពូជដំណាំសម្រាប់ទុកបង្ការ និងធ្វើអន្តរាគមន៍ជួយដល់កសិករក្រីក្រដែលងាយរងគ្រោះពីគ្រោះធម្មជាតិឱ្យបានទាន់ពេល និងមានប្រសិទ្ធភាព។
លោក សាខុន បានបញ្ជាក់ទៀតថា៖ «សម្រាប់ឆ្នាំ ២០២១ រាជរដ្ឋាភិបាល តាមរយៈប្រព័ន្ធស្បៀងបម្រុងកម្ពុជា (ប.ស.ប.ក) បានត្រៀមបម្រុងគ្រាប់ពូជស្រូវស្រាលមិនប្រកាន់រដូវជារូបវន្តចំនួន ២ ០០០ តោន និងគ្រាប់ពូជបន្លែ និងដំណាំរួមផ្សំផ្សេងៗទៀតចំនួន ២៥ តោនសម្រាប់អន្តរាគមន៍ជួយសង្គ្រោះប្រជាកសិករ ដែលរងផលប៉ះពាល់ និងខូចខាតដោយគ្រោះធម្មជាតិ»៕