.jpg)
ប៉ូលិសពិនិត្យសាកសពស្ត្រីរងគ្រោះដែលត្រូវបានបុរសម្នាក់សម្លាប់ កាលពីថ្ងៃទី៩ តុលា នៅខេត្តពោធិ៍សាត់។ រូបថត ហ្វេសប៊ុក
ភ្នំពេញៈ នគរបាលព្រហ្មទណ្ឌខេត្តពោធិ៍សាត់កំពុងតាមចាប់បុរសម្នាក់ បន្ទាប់ពីសម្លាប់ស្រីម្នាក់ ហើយខ្ចប់នឹងកម្រាលពូកបម្រុងយកទៅបោះចោលកាលពីថ្ងៃទី៩ តុលា ប្រព្រឹត្តនៅភូមិថ្នល់បំបែក សង្កាត់រលាប ក្រុង-ខេត្តពោធិ៍សាត់។
លោកម៉ូ លីដា ស្នងការរងទទួលផែននគរបាលព្រហ្មទណ្ឌខេត្តពោធិ៍សាត់ឱ្យដឹងនៅថ្ងៃទី១០ តុលា ថា ស្រ្តីដែលត្រូវបានសម្លាប់ ឈ្មោះជន ស្រីណូ អាយុ៣៩ឆ្នាំ មានកូនប្រុសអាយុ៥ឆ្នាំម្នាក់ រស់នៅជាមួយជីដូន និងមានទីលំនៅ ភូមិទួលគ្រួស សង្កាត់ចំរើនផល ក្រុង-ខេត្តពោធិ៍សាត់។ ចំណែកជនសង្ស័យ សមត្ថកិច្ចរបស់លោកកំពុងស្រាវជ្រាវ និងកំណត់អត្តសញ្ញាណដើម្បីស្វែងរកចាប់ខ្លួន។
លោកបញ្ជាក់ថា៖«ដោយសារយើងមិនទាន់កំណត់អត្តសញ្ញាណរបស់ជនសង្ស័យបាន ដូច្នេះខាងនគរបាលជំនាញកំពុងដំណើរការស្រាវជ្រាវហើយ»។
លោកបានប្រាប់តាមសាក្សីថា កាលពីថ្ងៃទី៩ តុលា គេបានឃើញស្រ្តីរងគ្រោះមកជួលបន្ទប់១នៃផ្ទះសំណាក់ នៅភូមិថ្នល់បំបែក សង្កាត់រលាប សម្រាកបណ្តោះអាសន្ន។ ក្រោយមកគេបានឃើញបុរសម្នាក់ជិះម៉ូតូ១គ្រឿងម៉ាកហុងដាឌ្រីមសេ១២៥ស៊េរីឆ្នាំ២០១៧ពណ៌ខ្មៅ ហើយដើរចូលទៅក្នុងបន្ទប់ដែលស្រ្តីរងគ្រោះជួល។
លោកបន្តថា មួយសន្ទុះក្រោយមក គេបានឃើញបុរសម្នាក់នោះលីបង្វិចមួយដែលមានទម្ងន់ធ្ងន់ រុំដោយក្រណាត់កម្រាលពូកយកទៅដាក់នៅលើរានផ្នែកខាងមុខកែបម៉ូតូ។ គ្រានោះដោយមានការសង្ស័យ អ្នកយាមផ្ទះសំណាក់ រត់ទៅសួរ ហើយជនសង្ស័យបានរត់ចោលម៉ូតូតែម្តង។ ពេលនោះគេបាននាំគ្នាទៅឆែកបង្វិចមើលក៏ឃើញសាកសពស្រ្តីរងគ្រោះ។
លោកយឹម ស៊ាងហៃ អធិការនគរបាលក្រុងពោធិ៍សាត់ប្រាប់ភ្នំពេញប៉ុស្តិ៍ នៅរសៀលថ្ងៃទី១០ តុលាថា ក្រោយកើតហេតុ មិនឃើញមានប្តីមកមើលសពទេ គេឃើញតែម្តាយនាង និងក្មេងប្រុស អាយុ ៥ឆ្នាំម្នាក់ប៉ុណ្ណោះ។ ប៉ុន្តែម្តាយស្រ្តីរងគ្រោះប្រាប់សមត្ថកិច្ចថា ស្រ្តីរងគ្រោះដើររកស៊ីធ្វើការមិនសូវនៅផ្ទះទេ។ ចំពោះតម្រុយនៃបទល្មើសនេះ គឺពិបាកក្នុងការស្រាវជ្រាវ។
លោកថា៖«បើស្រ្តីរងគ្រោះប្រើទូរស័ព្ទទៅ គឺយើងអាចស្រាវជ្រាវតាមទូរស័ព្ទ តែគាត់អត់ប្រើទូរស័ព្ទសោះ។ វាដូចជាងងឹតបន្តិចដែរក្នុងការស្រាវជ្រាវ តែយើងមមាញឹករឿងនេះ»៕
វីដេអូ៖
