កណ្តាលៈ បុរសជាម្ចាស់ភោជនីយដ្ឋានម្នាក់ត្រូវបានតុលាការបង្គាប់ឱ្យឃុំខ្លួនក្នុងពន្ធនាគារកាលពីថ្ងៃទី ៩ តុលា ពាក់ព័ន្ធករណីចាប់ស្ត្រីម្នាក់រំលោភសេពសន្ថវៈនៅសង្កាត់កំពង់សំណាញ់ ក្រុងតាខ្មៅ ខេត្តកណ្តាល។
លោក រស់ សាវិន នាយការិយាល័យប្រឆាំងការជួញដូរមនុស្ស និងការពារអនីតិជនខេត្តកណ្តាលបានប្រាប់នៅថ្ងៃទី ១០ តុលាថា បុរសឈ្មោះ ស្វាយ ស៊ីសុថា អាយុ ៤៦ ឆ្នាំ មានរបរជាម្ចាស់ហាងយីហោ (រង់ចាំ) និងរស់នៅក្នុងទឹកដីសង្កាត់កំពង់សំណាញ់ ក្រុងតាខ្មៅ ខេត្តកណ្តាល។
លោកថ្លែងថា៖ «ជនត្រូវចោទត្រូវបានចៅក្រមស៊ើបសួរចេញដីកាឃុំខ្លួនបណ្តោះអាសន្នក្នុងពន្ធនាគារហើយ។ គាត់ត្រូវឃុំពីម្សិលមិញ [ថ្ងៃទី ៩ តុលា] ដែលតំណាងអយ្យការចោទបទរំលោភសេពសន្ថវៈមាត្រា ២៣៩ នៃក្រមព្រហ្មទណ្ឌ»។
យោងតាមមាត្រា ២៣៩ នៃក្រមព្រហ្មទណ្ឌនេះ ប្រសិនបើតុលាការរកឃើញថា ជនត្រូវចោទពិតជាបានប្រព្រឹត្តមែននោះនឹងត្រូវប្រឈមការផ្តន្ទាទោសដាក់ពន្ធនាគារពី ៥ ទៅ ១០ ឆ្នាំ។
លោក យី វណ្ណដា អធិការនគរបាលក្រុងតាខ្មៅប្រាប់នៅថ្ងៃទី ១០ តុលា ថា ស្ត្រីរងគ្រោះ ឈ្មោះ រ.ច. អាយុ ២៦ ឆ្នាំ និងមានទីលំនៅ សង្កាត់កំពង់សំណាញ់ ក្រុងតាខ្មៅ ខេត្តកណ្តាល។ លោកប្រាប់តាមសម្តីនារីរងគ្រោះថា ស្ត្រីរងគ្រោះ និងជនសង្ស័យជាមនុស្សស្គាល់គ្នា រាប់អានគ្នាជាច្រើនឆ្នាំហើយ។ នៅថ្ងៃទី ៤ តុលា ឆ្នាំ ២០២១ ជនសង្ស័យបានទូរស័ព្ទណាត់ជួបស្ត្រីរងគ្រោះ។ ពួកគេបានជួបគ្នាក្នុងហាងរបស់ជនសង្ស័យ។ នៅពេលនោះពួកគេអង្គុយផឹកស្រាជាមួយគ្នាទាល់តែស្រវឹងរៀងៗខ្លួន។ លុះដល់ម៉ោងប្រមាណជា ១១ យប់ជនសង្ស័យបានចាប់រំលោភនារីរងគ្រោះបានសម្រេច។
បើតាមលោកអធិការយោងសម្តីរបស់ស្ត្រីរងគ្រោះថា រហូតដល់ម៉ោងប្រមាណ ១ រំលងអធ្រាត្រឈានចូលថ្ងៃទី ៥ តុលា ស្ត្រីរងគ្រោះបានយកទូរស័ព្ទម៉ាក OPPO របស់ជនសង្ស័យត្រឡប់មកផ្ទះវិញ។ បន្ទាប់មកនៅថ្ងៃទី ៧ តុលា ទើបស្ត្រីរងគ្រោះប្តឹងនគរបាលប៉ុស្តិ៍ សង្កាត់កំពង់សំណាញ់ដើម្បីឱ្យសមត្ថកិច្ចចាប់ខ្លួនជនសង្ស័យ។
លោកថ្លែងថា៖ «ជនរងគ្រោះគាត់ប្រាប់សមត្ថកិច្ចថា គាត់យកទូរស័ព្ទរបស់ជនសង្ស័យ ដើម្បីទុក ជាភ័ស្តុតាងប្តឹងប៉ូលិស។ ស្ត្រីរងគ្រោះខ្លួនគាត់ផ្ទាល់ជាអ្នកប្តឹង»។
លោកថា ក្រោយទទួលបណ្តឹងពីស្ត្រីរងគ្រោះ សមត្ថកិច្ចក៏បានចុះដល់ទីតាំងរបស់ជនសង្ស័យនៅថ្ងៃទី ៨ តុលា ដើម្បីសាកសួរ។ នៅចំពោះមុខជនសង្ស័យបានឆ្លើយថា រវាងខ្លួន និងស្ត្រីរងគ្រោះបានស្គាល់គ្នាមានស្នេហាជាមួយគ្នា និង ធ្លាប់រួមរ័កគ្នាជាច្រើនដងទៀតផង ប៉ុន្តែក្រោយមកបានផ្តាច់ទំនាក់ទំនងជាមួយគ្នាមួយរយៈ។
លោកបន្ថែមថា ជនសង្ស័យក៏សារភាពដែរថា ពិតជាបានហៅស្ត្រីរងគ្រោះផឹកស្រាបៀរជាមួយគ្នា ហើយនាងក៏បានយកទូរស័ព្ទ ម៉ាក OPPO របស់គាត់ផងដែរ៕