.jpg)
ក្មេងប្រុសរងគ្រោះ ដែលត្រូវរថភ្លើងកិនរបួសធ្ងន់ កំពុងប្រកាសស្វែងរកសាច់ញាតិ។ រូបថត ហ្វេសប៊ុក
ភ្នំពេញៈ មន្ទីរពេទ្យគន្ធបុប្ផាភ្នំពេញ និងសមត្ថកិច្ចបានប្រកាសរកសាច់ញាតិក្មេងប្រុសម្នាក់ឈ្មោះ ឈើម អាយុ ១៥ ឆ្នាំដែលកំពុងស្ថិតក្នុងការជួយសង្គ្រោះ ដោយសាររថភ្លើងកិនកាលពីម៉ោង ៤ ទៀបភ្លឺ ថ្ងៃទី ១០ ខែតុលានៅចំណុចផ្លូវរថភ្លើង (ខ្សែភ្នំពេញ-កំពត) ជិតផ្លូវជាតិលេខ ៤ ក្នុងភូមិអង្គ សង្កាត់ចោមចៅទី ៣ ខណ្ឌពោធិ៍សែនជ័យ បណ្ដាលឱ្យដាច់ដៃឆ្វេង និងជើងទាំងសងខាងព្រមទាំងរបួសក្បាលហូរឈាមធ្ងន់ធ្ងរ។
មន្ទីរពេទ្យគន្ធបុប្ផាភ្នំពេញនៅព្រឹកថ្ងៃទី ១០ តុលា បានជូនដំណឹងបន្ទាន់តាមហ្វេសប៊ុក ដើម្បីស្វែងរកអាណាព្យាបាលក្មេងប្រុសរូបនេះ ខណៈក្រុមគ្រូពេទ្យកំពុងជួយសង្គ្រោះជីវិតក្នុងបន្ទប់វះកាត់នៅឡើយ។
មន្ទីរពេទ្យគន្ធបុប្ផាភ្នំពេញបញ្ជាក់ថា៖ «សូមប្រកាសរកអាណាព្យាបាលកុមារាអាយុ ១៥ ឆ្នាំឈ្មោះ ឈើម [ភិនភាគដូចក្នុងរូបថត] ដែលត្រូវបានរថភ្លើងកិនដាច់ដៃឆ្វេងដាច់ជើងទាំងសងខាង និងរបួសក្បាលហូរឈាមយ៉ាងធ្ងន់ធ្ងរបំផុត។ កុមារារងគ្រោះនេះត្រូវបានរថយន្តសង្គ្រោះអង្គភាពលេខ ៧០ បញ្ជូនមកជាបន្ទាន់នាវេលាម៉ោង ៦:៤៥ នាទីព្រឹក ដោយពុំមានអាណាព្យាបាល។ ពេលនេះក្រុមគ្រូពេទ្យវះកាត់កំពុងខិតខំជួយសង្គ្រោះជីវិតក្មេងម្នាក់នេះនៅ...។
សូមទាក់ទងមកកាន់លេខទូរស័ព្ទ 012 812 248»។
គ្រូពេទ្យម្នាក់សុំមិនបញ្ចេញឈ្មោះនៅមន្ទីរពេទ្យនេះឱ្យដឹងថា គិតត្រឹមល្ងាចថ្ងៃទី ១០ តុលា មិនទាន់ឃើញសាច់ញាតិមកមើលកុមាររងគ្រោះទេ។
លោកថា៖ «មន្ទីរពេទ្យបានជួយកុមាររងគ្រោះសព្វគ្រប់បែបយ៉ាងហើយ ប៉ុន្ដែរហូតមកដល់ឥឡូវមិនទាន់មានសាច់ញាតិណាមកទេ ហើយកុមារកំពុងស្ថិតនៅក្នុងសភាពធ្ងន់ធ្ងរយើងដាក់ឈាមយើងបញ្ជូនគាត់ទៅសង្គ្រោះបន្ទាន់នៅកន្លែងវះកាត់ថែមទៀត»។
លោក ថេង កុសល នាយប៉ុស្ដិ៍នគរបាលរដ្ឋបាលចោមចៅទី ៣ ថ្លែងប្រាប់ភ្នំពេញប៉ុស្ដិ៍នៅថ្ងៃទី ១០ តុលាដែរថា ហេតុការណ៍នេះបានកើតនៅម៉ោងប្រមាណ ៤ ជិតភ្លឺថ្ងៃទី ១០ តុលា ជិតផ្លូវជាតិលេខ ៤ ក្នុងភូមិអង្គ សង្កាត់ចោមចៅទី ៣ ខណ្ឌពោធិ៍សែនជ័យ។
លោកបន្តថា ក្រោយកើតហេតុភ្លាម នគរបាលបាលប៉ុស្តិ៍ចោមចៅទី ៣ បានចុះទៅទីនោះរួចបានហៅរថយន្តសង្គ្រោះដឹកទៅពេទ្យគន្ធបុប្ផា។
លោក កុសល បញ្ជាក់ថា៖ «យើងមិនទាន់រកសាច់ញាតិក្មេងប្រុសនេះឃើញទេមិនដឹងគាត់ដើរមកពីណាចូលទៅដេកនៅលើផ្លូវរថភ្លើងនេះ។ ខ្ញុំបានទាក់ទងមេភូមិអង្គឱ្យជួយរកសាច់ញាតិក្មេងប្រុសនេះហើយថា តើរស់នៅឯណា?»៕
