.jpg)
សពបុរសរងគ្រោះ និងស្ត្រីសង្ស័យក្រោយឃាត់ខ្លួនកាលពីថ្ងៃទី៩ តុលា ។ រូបថត ហ្វេសប៊ុក
ភ្នំពេញៈ នគរបាលខណ្ឌសែនសុខនឹងបញ្ជូនស្ត្រីជាប្រពន្ធម្នាក់ទៅតុលាការនៅថ្ងៃទី ១២ តុលា ករណីចាក់ប្តីរបស់ខ្លួនស្លាប់នៅពេលមានជម្លោះក្នុងគ្រួសារ ប្រព្រឹត្តនៅភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញកាលពីយប់ថ្ងៃទី ៩ ខែតុលា។
លោក ហួរ ម៉េងវ៉ាង អធិការនគរបាលខណ្ឌសែនសុខបានប្រាប់ ភ្នំពេញ ប៉ុស្តិ៍ នៅថ្ងៃទី ១១ តុលាថា ស្ត្រីសង្ស័យឈ្មោះ ហុន សាហេន ជាកម្មកររោងចក្រកាត់ដេរនឹងត្រូវបញ្ជូនទៅសាលាដំបូងរាជធានីភ្នំពេញនៅថ្ងៃទី ១២ តុលា។
លោកប្រាប់ថា៖ «ស្ត្រីសង្ស័យបានប្រព្រឹត្តបទឧក្រិដ្ឋដូច្នេះគាត់នឹងត្រូវប្រឈមមុខចំពោះច្បាប់»។
លោកអធិការរំឭកប្រាប់ថា ហេតុការណ៍នេះ បានកើតឡើងកាលពីយប់ថ្ងៃទី ៩ ខែ តុលា ឆ្នាំ ២០២១ ដោយស្ត្រីសង្ស័យបានប្រើកាំបិតចុងស្រួចចាក់សម្លាប់ប្តីរបស់ខ្លួនឈ្មោះ ហឹម សុភក្ត្រា អាយុ៣៣ឆ្នាំ មុខរបរ រត់ម៉ូតូឌុបស្លាប់នៅកន្លែងកើតហេតុ។ ទាំង ២ នាក់ ប្តីប្រពន្ធរស់នៅភូមិថ្នា ឃុំក្រួស ស្រុកស្វាយជ្រំ ខេត្តស្វាយរៀង។
មន្ត្រីនគរបាលសង្កាត់អូរបែកក្អមម្នាក់សុំមិនបញ្ចេញឈ្មោះប្រាប់នៅរសៀលថ្ងៃទី ១១ តុលា តាមសម្តីសាក្សីថា ទាំង ២ នាក់ ប្តីប្រពន្ធខាងលើបានមកជួលបន្ទប់ស្នាក់នៅកន្លែងកើតហេតុបានយូរខែមកហើយ។នៅមុនពេលកើតហេតុគេបានឮសំឡេងពួកគេជជែកគ្នាខ្លាំងៗ ប៉ុន្តែគេមិនបានដឹងថា មានបញ្ហាអ្វីទេ។
លោកបានបន្តថា បន្ទាប់មកអ្នកជិតខាងបាននាំគ្នាផ្អើលឆោឡោស្រែកថា មានគេសម្លាប់មនុស្ស។ នៅពេលនោះ ប្រជាពលរដ្ឋបានរាយការណ៍ទៅប៉ុស្តិ៍នគរបាលសង្កាត់អូរបែកក្អម ហើយកម្លាំងនគរបាលបានចុះមកឃាត់ខ្លួនស្ត្រីសង្ស័យតែម្តង។
ពាក់ព័ន្ធនឹងការចាក់សម្លាប់នេះស្ត្រីសង្ស័យមិនបាននិយាយលម្អិតប្រាប់ដល់សមត្ថកិច្ចទេ ដោយគ្រាន់តែនិយាយថា ពួកគាត់មានទំនាស់នឹងគ្នា។
មន្ត្រីនគរបាលដដែលបន្តថា បើតាមការធ្វើកោសល្យវិច័យពីសមត្ថកិច្ចជំនាញរបស់ស្នងការដ្ឋាននគរបាលរាជធានីភ្នំពេញ និងនគរបាលជំនាញខណ្ឌសែនសុខបង្ហាញថា បុរសរងគ្រោះមានស្នាមមុតនៅលើដើមទ្រូងខាងឆ្វេងជ្រៅ។ ចំណែកវត្ថុតាងដែលសមត្ថកិច្ចដកហូតបានពីជនសង្ស័យមានកាំបិតចិតបន្លែចុងស្រួច ១ ដើម៕
