.jpg)
មន្ត្រី គ.ជ.ប. ប្រជុំតាមអនឡាញពីថ្ងៃ ១១ តុលា។ រូបថត គ.ជ.ប
ភ្នំពេញៈ គណៈកម្មាធិការជាតិរៀបចំការបោះឆ្នោត (គ.ជ.ប ) បានចែកលិខិតអញ្ជើញប្រជាពលរដ្ឋឱ្យទៅពិនិត្យបញ្ជីឈ្មោះបោះឆ្នោតចាប់ពីថ្ងៃទី ១២ ខែ តុលា ឆ្នាំ ២០២១ ទៅ ដោយសម្រេចបានចំនួន ៧ ៩១៦ ៧៤៥ នាក់ ស្មើនឹង ៨៩,៦៤% នៃប្រជាពលរដ្ឋដែលមានឈ្មោះនៅក្នុងបញ្ជីបោះឆ្នោត ខណៈការចុះឈ្មោះអ្នកបោះឆ្នោតថ្មី ក៏ចាប់ផ្តើមជាមួយគ្នានេះដែរ។
លោក មាន សទិ សមាជិក គ.ជ.ប ថ្លែងនៅក្នុងកិច្ចប្រជុំផ្សព្វផ្សាយជាមួយភាគីពាក់ព័ន្ធកាលពីថ្ងៃទី ១១ ខែ តុលា ឆ្នាំ ២០២១ ថា ការចែកលិខិតអញ្ជើញប្រជាពលរដ្ឋ ត្រូវបានបញ្ចប់នៅថ្ងៃទី ១១ ខែតុលា ប៉ុន្តែប្រជាពលរដ្ឋដែលមិនទាន់បានទទួលលិខិតអញ្ជើញអាចទៅស្នើសុំនៅសាលា ឃុំ សង្កាត់ដែលប្រជាពលរដ្ឋមានឈ្មោះនៅក្នុងបញ្ជីបោះឆ្នោតនៃឃុំ សង្កាត់នោះ។
លោក សោម សូរីដា អគ្គលេខាធិការរង គជប ពន្យល់ថា មូលហេតុដែល គ.ជ.ប ចែកលិខិតអញ្ជើញមិនគ្រប់ចំនួនប្រជាពលរដ្ឋនៅពេលនេះ ដោយសារ តែមានបញ្ហាមួយចំនួន ដូចជាអាកាសធាតុដែលមានភ្លៀងធ្លាក់ច្រើន ប្រជាពលរដ្ឋដែលធ្វើចំណាកស្រុក ទទួលមរណភាព ប្រជាពលរដ្ឋ ចំណូលថ្មីដែលធ្វើឱ្យក្រុមប្រឹក្សាឃុំ សង្កាត់មិនស្គាល់អត្តសញ្ញាណ។
ករណីមួយទៀត គឺដោយសារតែបញ្ហាជំងឺកូវីដ ១៩ ដែលតម្រូវឱ្យមានការបិទខ្ទប់ភូមិ និងឃុំមួយចំនួន និងប្រជាពលរដ្ឋមួយចំនួនទៀតជាប់ធ្វើចត្តាឡីស័ក។ ទោះជាយ៉ាងណាលិខិតអញ្ជើញដែលមិនត្រូវបានចែកដល់ដៃប្រជាពលរដ្ឋនេះ ត្រូវបានរក្សាទុកនៅឃុំ សង្កាត់ ដើម្បីចែកជូនដល់ប្រជាពលរដ្ឋបន្តទៀត។
លោក សូរីដា ថ្លែងថា៖ «មធ្យោបាយដែលឱ្យប្រជាពលរដ្ឋដឹងថា មានឈ្មោះនៅក្នុងបញ្ជីបោះឆ្នោត មានការផ្សាយពីបញ្ជីបោះឆ្នោត នៅតាមគេហទំព័ររបស់ គ.ជ.ប មាននៅក្នុង App និងការចែកលិខិតអញ្ជើញ ហើយខ្លឹមសារនៃលិខិតអញ្ជើញនេះគឺជាខ្លឹមសារដែលផ្ទេរចេញពីទិនុ្នន័យផ្លូវការរបស់ គ.ជ.ប។ នៅពេលពលរដ្ឋទទួលបានលិខិតអញ្ជើញនេះ មិនចាំបាច់ទៅពិនិត្យនៅតាមឃុំ-សង្កាត់ក៏បានដែរ»។
បើតាមលោក សោម សូរីដា ពលរដ្ឋដែលមិនទទួលបានលិខិតឱ្យទៅពិនិត្យបញ្ជីឈ្មោះបោះឆ្នោតមានជាង ១០ %។
លោក ទេព នីថា អគ្គលេខាធិការ គ.ជ.ប ឱ្យដឹងដែរថា ការត្រៀមរៀបចំការបោះឆ្នោតបានប្រព្រឹត្តទៅដោយរលូនតាមនីតិវិធី បទបញ្ជា និងផែនការ។ ទោះជាយ៉ាងណា ក៏ គ.ជ.ប បានជួបបញ្ហាខ្វះខាតខ្លះ ប៉ុន្តែត្រូវបានកែសម្រួលទាន់ពេលផងដែរ។
បើតាមលោក មាន សទិ សមាជិក គ.ជ.ប ការពិនិត្យបញ្ជីឈ្មោះ និងការចុះឈ្មោះបោះឆ្នោតមានរយៈពេល ៥០ ថ្ងៃ គឺចាប់ពីថ្ងៃទី ១២ ខែតុលា ឆ្នាំនេះដល់ថ្ងៃទី ៣០ វិច្ឆិកា ឆ្នាំ ២០២១ រៀងរាល់ថ្ងៃរួមទាំងថ្ងៃសៅរ៍ និងថ្ងៃអាទិត្យនៅតាមសាលាឃុំ សង្កាត់ និងទីតាំងមួយចំនួនក្នុងឃុំ-សង្កាត់។
ក្នុងរយៈពេលនៃការពិនិត្យបញ្ជីឈ្មោះ និងចុះឈ្មោះបោះឆ្នោតនេះ ក្រុមប្រឹក្សាឃុំ-សង្កាត់ត្រូវបិទការិយាល័យចុះឈ្មោះរៀងរាល់ ១៥ ថ្ងៃម្តង ដើម្បីប្រជុំជាមួយក្រុមចុះឈ្មោះ ពិភាក្សាលើការងារអនុវត្តកន្លងមក និងរៀបចំការងារបន្តទៅទៀត។
លោកថ្លែងថា៖ «តាមប្រតិទិនការងារការបិទការិយាល័យនេះត្រូវធ្វើនៅថ្ងៃទី ២៦ ខែ តុលា ឆ្នាំ ២០២១ ថ្ងៃទី ១០ ខែ វិច្ឆិកា ឆ្នាំ ២០២១ និងថ្ងៃទី ២៥ ខែ វិច្ឆិកា ឆ្នាំ ២០២១»៕
