ភ្នំពេញៈ ពលរដ្ឋរងផលប៉ះពាល់គម្រោងអភិវឌ្ឍន៍ផ្លូវដែកនៅភូមិ ១៦ និង ១៧ ស្ថិតក្នុងខណ្ឌទួលគោក នៅតែប្រកាន់ជំហរ មិនទទួលយកសំណងដែលតម្រូវឱ្យពួកគេចាកចេញពីលំនៅបច្ចុប្បន្ន ទៅទទួលយកដីនៅ 7NG ខេត្តកណ្តាល និងនៅគោកខ្សាច់ក្នុងខណ្ឌកំបូល។
ការប្រកាសជំហរជាថ្មីនេះបានធ្វើឡើង បន្ទាប់ពីពលរដ្ឋ ៥ នាក់តំណាងឱ្យប្រជាពលរដ្ឋ ៣០ គ្រួសារបានជួបជាមួយអាជ្ញាធរខណ្ឌទួលគោកនៅថ្ងៃទី ១១ តុលា ដើម្បីពិភាក្សាពីសំណើរបស់ពួកគេ ដែលចង់បានសំណងជាដីនៅក្រោយវត្តទួលអស់លោក ឬដីក្នុងខណ្ឌទួលគោកក្រោយអាជ្ញាធរប្រកាសថា ផ្ទះរបស់ពួកគេនឹងត្រូវរុះរើ ដើម្បីធ្វើការបើកផ្លូវស្ថាបនាផ្លូវបេតុង និងអាងស្តុកទឹកក្នុងខណ្ឌទួលគោកនាពេលខាងមុខ។
អ្នកស្រី ហ៊ុយ សាធៀន ជាពលរដ្ឋរស់នៅក្នុងតំបន់រងផលប៉ះពាល់ជាង ៣០ ឆ្នាំដែលបានចូលជួបពិភាក្សាជាមួយអាជ្ញាធរខណ្ឌទួលគោក បានប្រាប់ភ្នំពេញប៉ុស្តិ៍នៅថ្ងៃទី ១១ តុលាថា ការជួបពិភាក្សានេះមិនទទួលបានដំណោះស្រាយអ្វីនោះទេ ព្រោះអាជ្ញាធរខណ្ឌ នៅតែទទូចឱ្យពលរដ្ឋទទួលយកសំណងជាដីនៅ 7NG ខេត្ត កណ្តាល និងនៅគោកខ្សាច់ក្នុងខណ្ឌកំបូលដដែល។
អ្នកស្រីបន្តថា ជំនួសឱ្យការបាត់បង់ផ្ទះសំបែង គឺប្រជាពលរដ្ឋទាំងអស់គ្នាស្នើសុំការដោះដូរជាដីនៅក្រោយវត្តទួលអស់លោក ឬដីក្នុងខណ្ឌទួលគោកតែ ១ គត់ ដែលពួកគេនិយាយថា វាងាយស្រួលដល់ការរស់នៅ និង ប្រកបរបរចិញ្ចឹមជីវិត ជាពិសេសគឺសម្រាប់កូនៗបន្តការសិក្សា។
អ្នកស្រីនិយាយថា៖ «ជាមួយនឹងការអភិវឌ្ឍនេះ ពួកយើងមិនជំទាស់នោះទេ ប៉ុន្តែពួកយើង ប្រកាន់ជំហរក្នុងការស្នើសុំសំណងជាការដោះដូរពីកន្លែងដែលយើងរស់នៅនេះ នៅក្នុងខណ្ឌទួលគោកដដែល ឬនៅជិតវត្តទួលអស់លោក ដែលស្ថិតនៅកន្លែងយើងចាស់ ទើបពួកយើងព្រមចាកចេញ»។
លោក កូវ សារុន ជាប្រជាពលរដ្ឋរងគ្រោះម្នាក់ដែរ បានអះអាងថា បើមិនទទួលបានដីនៅក្នុងតំបន់ដែលពួកគេ ចង់បាននោះទេ គឺពួកគេនឹងមិនចាកចេញពីលំនៅនោះទេ ព្រោះថាការចាកចេញទៅរស់នៅកន្លែងដែលអាជ្ញាធរផ្តល់ឱ្យនឹងធ្វើឱ្យជីវភាពរបស់ពួកគេ កាន់តែយ៉ាប់យ៉ឺន ខណៈតំបន់ថ្មី មិនមានហេដ្ឋារចនាសម្ព័ន្ធ សាលារៀន ហើយក៏ធ្វើឱ្យបាត់បង់មុខរបរទៀតផង។
លោកបានរៀបរាប់ថា៖ «ពួកខ្ញុំ បញ្ជាក់យ៉ាងច្បាស់ហើយ ថាមិនទទួលយកជាដាច់ខាត ហើយនឹងស្នើសុំទៅលើបន្តទៀត។ បើសិនជាមិនមានលទ្ធផលទេ នឹងដាក់សំណើជាកញ្ចប់ទៅសម្តេចនាយក ស្នើឱ្យធ្វើការដោះស្រាយតែម្តង ព្រោះសម្រាប់សាលាក្រុង និងខណ្ឌ អត់មានលទ្ធភាពក្នុងការដោះស្រាយឱ្យពួកយើងទេ។ ពួកខ្ញុំ តែ ៣០ គ្រួសារសោះ ក៏មិនផ្តល់ដំណោះស្រាយឱ្យពួកខ្ញុំ»។
លោក ជា ពិសី អភិបាលខណ្ឌទួលគោកកាលពីថ្ងៃទី ១១ តុលា មិនអាចសុំការអត្ថាធិប្បាយជុំវិញបញ្ហានេះបានទេ ដោយលោកមិនលើទូរស័ព្ទ។ ចំណែកលោក ហួរ ហួត នាយករដ្ឋបាលខណ្ឌទួលគោកកាលពីម្សិលមិញបានបដិសេធធ្វើការអត្ថាធិប្បាយដោយអះអាងថា លោកជាប់រវល់។
លោក សឿន សារ៉ន នាយកប្រតិបត្តិនៃសមាគមធាងត្នោត នៅតែទទូចឱ្យអាជ្ញាធរ ស្វែងរកដំណោះស្រាយណាមួយដែលឱ្យប្រជាពលរដ្ឋអាចទទួលយកពីគម្រោងអភិវឌ្ឍន៍នានា ខណៈដែលលោកមើលឃើញថា ជាទូទៅសំណង និងដំណោះស្រាយដែលអាជ្ញាធរបានផ្តល់ឱ្យប្រជាពលរដ្ឋរងគ្រោះហាក់មិនអាចទទួលយកបាននោះទេ។
លោករំពឹងថា៖ «នៅពេលមានការដោះស្រាយតាមយុទ្ធសាស្ត្រឈ្នះឈ្នះ នោះប្រជាពលរដ្ឋ ក៏គាត់សប្បាយពេញចិត្តនឹងទទួលយក ហើយបង្កើតសុខសន្តិភាពដល់ពលរដ្ឋ។ ចំពោះអាជ្ញាធរខ្លួនឯងផ្ទាល់ក៏ទទួលបាន ការកោតសរសើរទៅតាមនោះដែរ ក្នុងការដោះស្រាយផលប៉ះពាល់ដល់ពលរដ្ឋនៅក្នុងមូលដ្ឋានរបស់ខ្លួន»។
លោក សឿន សារ៉ន លើកឡើងថា ការផ្តល់ដំណោះស្រាយដែលមិនអាចទទួលយកបានគឺជាមូលហេតុដែលបណ្តាលឱ្យមានការតវ៉ា ហើយវាក៏បង្កទៅជាអយុត្តិធម៌ក្នុងសង្គម ដែលធ្វើឱ្យប្រជាពលរដ្ឋមានការឈឺចាប់៕
វីដេអូ៖