.jpg)
យុវជនជាជនសង្ស័យក្រោយឃាត់ខ្លួនពីថ្ងៃ ៩ តុលា។ រូបថត កងរាជអាវុធហត្ថ
កំពង់ចាមៈ កងរាជអាវុធហត្ថខេត្តកំពង់ចាម បានបញ្ជូនយុវជនម្នាក់ទៅតុលាការខេត្តនៅថ្ងៃទី ១១ តុលា ពាក់ព័ន្ធការល្បួងក្មេងស្រីអាយុ ១២ ឆ្នាំ ទៅរួមភេទប្រព្រឹត្តនៅសណ្ឋាគារមួយក្នុងសង្កាត់វាលវង់ ក្រុង-ខេត្តកំពង់ចាម។
លោក សែម ឃាង ប្រធានមន្ទីរយុត្តិធម៌នៃបញ្ជាការដ្ឋាន កងរាជអាវុធហត្ថខេត្ត ប្រាប់ ភ្នំពេញ ប៉ុស្តិ៍ នៅថ្ងៃទី ១១ តុលាថា ជនសង្ស័យម្នាក់ត្រូវបានសមត្ថកិច្ចបញ្ជូនទៅសាលាដំបូងខេត្តកំពង់ចាម នៅថ្ងៃទី ១១ តុលា។ ជនសង្ស័យត្រូវបានឪពុកក្មេងរងគ្រោះប្តឹងថា បានល្បួងកូនស្រីគាត់យកទៅរួមភេទ។
លោកបានថ្លែងថា៖ «ជនសង្ស័យម្នាក់នេះខាងខ្ញុំបញ្ជូនទៅតុលាការ ជាប់ពាក់ព័ន្ធរួមភេទជាមួយអនីតិជនក្រោមអាយុ ១៥ ឆ្នាំ»។
បើតាមលោក សែម ឃាង ការឃាត់ខ្លួនយុវជនសង្ស័យម្នាក់នេះ គឺដោយសារឪពុករបស់ជនរងគ្រោះឈ្មោះ ម. ស. ហ. ទ ភេទស្រី អាយុ ១២ ឆ្នាំ (កូនខ្មែរអ៊ិស្លាម) បានដាក់ពាក្យបណ្តឹងនៅការិយាល័យប្រឆាំងការជួញដូរមនុស្ស និងការពារអនីតិជននៃកងរាជអាវុធហត្ថខេត្តកំពង់ចាមកាលពីថ្ងៃទី ៩ ខែ តុលា ឆ្នាំ ២០២១។
នៅក្នុងពាក្យបណ្តឹងនោះបានចោទប្រកាន់ឈ្មោះ សួង អរុណ ភេទប្រុស អាយុ ១៨ ឆ្នាំ រស់នៅភូមិចំការដូង សង្កាត់-ខណ្ឌដង្កោ រាជធានីភ្នំពេញថា បានប្រព្រឹត្តសកម្មភាពលួងលោមយកកូនស្រីរបស់គាត់អាយុ ១២ ឆ្នាំទៅរួមភេទ។
នៅថ្ងៃទី ៨ ខែ តុលា ឆ្នាំ ២០២១ ជនសង្ស័យបាននាំក្មេងរងគ្រោះទៅដេកនៅសណ្ឋាគារដែលមានយីហោ ហេង ហេង ស្ថិតនៅសង្កាត់វាលវង់ ក្រុងកំពង់ចាម និងរំលោភសេពសន្ថវៈបានសម្រេច។
ក្រោយទទួលបានពាក្យបណ្តឹងពីឪពុករបស់ក្មេងស្រីរងគ្រោះមកកម្លាំងសមត្ថកិច្ចជំនាញនៃមន្ទីរស្រាវជ្រាវ និងបង្ក្រាបបទល្មើសកងរាជអាវុធហត្ថខេត្តកំពង់ចាមបានសហការជាមួយកម្លាំងមូលដ្ឋានកងរាជអាវុធហត្ថក្រុងកំពង់ចាម ដោយមានការសម្របសម្រួលផ្លូវច្បាប់ពីលោក វង្ស ប៊ុនវិសុទ្ធ ព្រះរាជអាជ្ញាអមសាលាដំបូងខេត្តកំពង់ចាមផង។
បើតាមលោក សែម ឃាង សមត្ថកិច្ចបានឃាត់ខ្លួនជនសង្ស័យបាននៅក្នុងសណ្ឋាគារខាងលើនៅថ្ងៃទី ៩ តុលា ហើយបានធ្វើតេស្តរកមេរោគកូវីដឃើញថា អវិជ្ជមានទើបសម្រេចកសាងសំណុំរឿងបញ្ជូនទៅតុលាការតែម្តង៕
