.jpg)
ជំនួបរវាង លោក លី ធុជ ជាមួយភារធារីស្ថានទូតនៃប្រទេសហុងគ្រីប្រចាំកម្ពុជានៅថ្ងៃទី ១២ តុលា។ រូបថត សហការី
ភ្នំពេញៈ ក្នុងនាមរាជរដ្ឋាភិបាលកម្ពុជាលោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីនបានស្នើរដ្ឋាភិបាលនៃប្រទេសហុងគ្រី បន្តជួយគាំទ្រដល់ការអនុវត្តយន្តការភូមិអស់ការគំរាមដោយសារមីននៅភូមិចំនួន ២ ទៀត ក្នុងស្រុកដំណាក់ចង្អើរ ខេត្តកែប ដែលមានចម្ការមីនចំនួន ១០ លើផ្ទៃដីចំនួន ៦២៥ ៣១៩ ម៉ែត្រការ៉េ ដើម្បីឱ្យខេត្តកែបជាខេត្តអស់ការគំរាមដោយសារមីនដំបូងគេបង្អស់នៅកម្ពុជា។
លោក លី ធុជ បានស្នើសុំបែបនេះ ក្នុងជំនួប ពិភាក្សាការងារស្តីពីកិច្ចសហប្រតិបត្តិការពាក់ព័ន្ធនឹងវិស័យសកម្មភាពមីននៅកម្ពុជាជាមួយលោក Istvan BAKOS ភារធារីស្ថានទូតនៃប្រទេសហុងគ្រីប្រចាំនៅកម្ពុជា នៅទីស្តីការអាជ្ញាធរមីន នាព្រឹកថ្ងៃទី ១២ តុលា។
លោក លី ធុជ បានថ្លែងអំណរគុណចំពោះ ទឹកចិត្តដ៏សប្បុរសរបស់ រដ្ឋាភិបាលនិងប្រជាជននៃប្រទេសហុងគ្រី ដែលបានផ្តល់ហិរញ្ញប្បទានឥតសំណងចូលរួមជួយដល់វិស័យសកម្មភាពមីននៅកម្ពុជាតាមរយៈក្រសួងការបរទេសនូវទឹកប្រាក់ចំនួន ២៨ ៥៧០ ដុល្លារអាមេរិក កាលពីដំណើទស្សនកិច្ចរបស់រដ្ឋមន្ត្រីការបរទេសហុងគ្រីក្នុងខែវិច្ឆិកា ឆ្នាំ ២០២០។
លោកទេសរដ្ឋមន្ត្រី បានជម្រាបលោកភារធារីថា អាជ្ញាធរមីនបានប្រើប្រាស់ហិរញ្ញប្បទានឥតសំណងនេះ សម្រាប់អនុវត្តគម្រោងចំនួន២រួមមានទី១ គម្រោងសាកល្បងភូមិអស់ការគំរាមដោយសារមីននៅភូមិដំណាក់ចង្អើរ សង្កាត់ព្រៃធំ ក្រុងកែប លើផ្ទៃដី ៤៦ ០០៩ ម៉ែត្រការ៉េ និងទី២ គម្រោងការផ្ទៀងផ្ទាត់ផ្ទៃដីចម្ការមីននៅលើដីជាក់ស្តែងក្នុងខេត្តកែប និងខេត្តកោះកុង។
លោក លី ធុជ បានបន្តថា៖ «អាជ្ញាធរមីនបានទទួលការអនុញ្ញាតដ៏ខ្ពង់ខ្ពស់ ពីសម្តេចតេជោនាយករដ្ឋមន្ត្រីនាថ្ងៃ ទី ៦ ខែ កញ្ញា ឆ្នាំ ២០២១ ជ្រើសយកខេត្តកែប ជាខេត្តដំបូងអស់ការគំរាមដោយសារគ្រាប់មីន ដើម្បីអនុវត្តខេត្តដំបូងគេបង្អស់អស់ការគំរាម ក្រោមការគាំទ្ររបស់រដ្ឋាភិបាលប្រទេសហុងគ្រី និងជ្រើសរើសយកប្រតិបត្តិករជាតិ CMAC ជាអ្នកអនុវត្តក្នុងការផ្តល់ដីសុវត្ថិភាព ជូនប្រជាពលរដ្ឋ នៅខេត្តកែប»។
កាលពីថ្ងៃទី ១ ខែ តុលា ឆ្នាំ ២០២១ លោក លី ធុជ បានដឹកនាំក្រុមការងារបច្ចេកទេស ចុះពិនិត្យសកម្មភាពបោសសម្អាតមីនរបស់ប្រតិបត្តិករជាតិ CMAC លើគម្រោងជំនួយឥតសំណងរបស់ប្រទេសហុងគ្រី ដែលជាលទ្ធផលបានរកគ្រាប់មីនចំនួន ៦ គ្រាប់ សំណល់ជាតិផ្ទុះពីសង្គ្រាមរាប់សិបគ្រាប់ និងអំបែងអាវុធយុទ្ធភណ្ឌជាង ៣ ពាន់បំណែក។
ក្នុងនាមរាជរដ្ឋាភិបាលកម្ពុជា លោកទេសរដ្ឋមន្ត្រីបានស្នើសុំឱ្យរដ្ឋាភិបាលនៃប្រទេសហុងគ្រី បន្តជួយគាំទ្រដល់ការអនុវត្តយន្តការភូមិអស់ការគំរាមដោយសារមីន លើភូមិចំនួន ២ ទៀត ស្ថិតក្នុងស្រុកដំណាក់ចង្អើរ ខេត្តកែប រួមមានភូមិចម្ការ ៣ និងភូមិចម្ការចេក ដែលមានចម្ការមីនចំនួន ១០ លើផ្ទៃដីគំរាមកំហែងដោយសារមីនចំនួន ៦២៥ ៣១៩ ម៉ែត្រការ៉េ ដើម្បីឱ្យខេត្តកែបជាខេត្តអស់ការគំរាមដោយសារមីន ដំបូងគេបង្អស់នៅកម្ពុជា ។
លោក Istvan BAKOS ភារធារីស្ថានទូប្រទេសហុងគ្រី បានលើកឡើងថា រដ្ឋាភិបាលហុងគ្រី គឺជាមិត្តដ៏យូរលង់របស់កម្ពុជាព្រមទាំងបានកសាងនូវទំនាក់ទំនងយ៉ាងល្អជាប្រវត្តិសាស្ត្រជាមួយកម្ពុជា ដែលក្នុងនោះបានផ្តល់អាហារូបករណ៍ឱ្យនិស្សិតកម្ពុជាទៅសិក្សានៅប្រទេសហុងគ្រីផងដែរ។
លោក ភារធារី បានបង្ហាញពីទឹកចិត្តសប្បាយរីករាយដែលបានចូលរួមជាលើកដំបូងជាមួយរាជរដ្ឋាភិបាលកម្ពុជា ក្នុងការងារសកម្មភាពមីន ហើយលោកបានបញ្ជាក់ថា នេះជាជំនួបលើកទី១ រវាងរូបលោកតំណាងរដ្ឋាភិបាលហុងគ្រី និងថ្នាក់ដឹកនាំអាជ្ញាធរមីន ហើយលោកគ្រោងនឹងទៅបំពេញទស្សនកិច្ចនៅខេត្តកែប ដើម្បីពិនិត្យលទ្ធផលបោសសម្អាតមីននៅទីនោះ។
លោក នូ សំណាត មន្ដ្រីសកម្មភាពមីនខេត្ដកែបឱ្យដឹងនៅថ្ងៃទី ១២ តុលាថា គម្រោងសាកល្បងភូមិអស់ការគំរាមដោយសារមីននៅភូមិដំណាក់ចង្អើរ ក្រុងកែប លើផ្ទៃដី ៤៦ ០០៩ ម៉ែត្រការ៉េ ក្រុមការងារបោសសម្អាតមីនស៊ីម៉ាក់ បានចំណាយពេលប្រមាណជាង ១ ខែ ដើម្បីបោសសម្អាតមីនឱ្យអស់ទាំងស្រុងក្នុងភូមិសាស្ដ្រនេះ៕
