.jpg)
កិច្ចប្រជុំក្រុមការងារសម្របសម្រួលការដឹកជញ្ជូនអាស៊ានពីថ្ងៃទី ១១ តុលា។ រូបថត ក្រសួងសាធារណការ
ភ្នំពេញៈ កម្ពុជាធ្វើជាម្ចាស់ផ្ទះ និងបានបើកកិច្ចប្រជុំក្រុមការងារសម្របសម្រួលការដឹកជញ្ជូនអាស៊ានលើកទី៤១ និងកិច្ចប្រជុំក្រុមប្រឹក្សាភិបាលសម្របសម្រួលការដឹកជញ្ជូនឆ្លងកាត់អាស៊ានលើកទី១៣ រយៈពេល ៣ ថ្ងៃ ដើម្បីពិភាក្សារួមគ្នាក្នុងការគ្រប់គ្រងការដឹកជញ្ជូននៅក្នុងតំបន់។
តាមទំព័រហ្វេសប៊ុករបស់ក្រសួងសាធារណការ និងដឹកជញ្ចូនបានឲ្យដឹងនៅថ្ងៃទី ១២ តុលាថា កិច្ចប្រជុំនេះគឺបានធ្វើឡើងតាមរយៈប្រព័ន្ធវីដេរអូពីចម្ងាយដែលបានចាប់ផ្តើមពីថ្ងៃទី ១១ តុលា ដល់ថ្ងៃទី ១៣ តុលា ដោយកម្ពុជាធ្វើជាម្ចាស់ផ្ទះ សហការជាមួយលេខាធិការដ្ឋានអាស៊ាន។
ក្រសួងបញ្ជាក់ថា «កិច្ចប្រជុំនេះមានការអញ្ជើញចូលរួមដោយផ្ទាល់ពីថ្នាក់ដឹកនាំក្រសួង និងមន្ត្រីជំនាញពាក់ព័ន្ធក្រោមឱវាទក្រសួងសាធារណការនិងការចូលរួមពីចម្ងាយពីតំណាងក្រសួង-ស្ថាប័នពាក់ព័ន្ធកម្ពុជា តំណាងប្រទេសនៃរដ្ឋជាសមាជិកអាស៊ាន និងដៃគូអភិវឌ្ឍន៍នានាផងដែរ»។
លោក គង់ សុផល អគ្គនាយករងនៃអគ្គនាយកដ្ឋានដឹកជញ្ជូនផ្លូវគោកនៃក្រសួងសាធារណការ និងជាប្រធានប្តូរវេននៃក្រុមការងារសម្របសម្រួលការដឹកជញ្ជូនអាស៊ានដែលបានដឹកនាំកិច្ចប្រជុំនេះបានថ្លែងថា អង្គប្រជុំពិភាក្សាបានផ្តោតជាសំខាន់លើការអនុវត្តវិធានការទាក់ទងនឹងកិច្ចសម្របសម្រួលការដឹកជញ្ជូនក្រោមផែនការយុទ្ធសាស្ត្រដឹកជញ្ជូនគូឡាឡាំពួ (KLTSP)។
បន្ថែមពីនេះលោកថា៖ «កិច្ចប្រជុំក៏បានពិភាក្សាពីការអនុវត្តវិធានការទាក់ទងនឹងការដឹកជញ្ជូនប្រកបដោយចីរភាពក្រោមផែនការយុទ្ធសាស្ត្រដឹកជញ្ជូនគូឡាឡាំពួ (KLTSP) ផែនការការងាររបស់ក្រុមការងារ TFWG ឆ្នាំ ២០២០-២០២១ និង ២០២២-២០២៣»។ ក្រៅពីនេះមានការសម្របសម្រួលជាមួយគណៈកម្មាធិការប្រឹក្សាយោបល់រួមសម្រួលពាណិជ្ជកម្មអាស៊ាន (ATF-JCC) កិច្ចសហការប្រតិបត្តិការដឹកជញ្ជូនជាមួយភាគីដៃគូពិភាក្សា និងអង្គការអន្តរជាតិ និងកិច្ចសហការប្រតិបត្តិការជាមួយវិស័យឯកជនផងដែរ។
លោកបន្ថែមថា អង្គប្រជុំក៏ពិភាក្សាផងដែរ លើការអនុវត្តកិច្ចព្រមព្រៀងសម្របសម្រួលដឹកជញ្ជូនអាស៊ាន របាយការណ៍នៃកិច្ចប្រជុំក្រុមការងារសម្របសម្រួលការដឹកជញ្ជូនអាស៊ានលើកទី៤១ (TFWG) ស្ថានភាពអនុវត្តផែនការការងារទូទៅនៃក្រុមប្រឹក្សាសម្របសម្រួលការដឹកជញ្ជូនឆ្លងកាត់របាយការណ៍វឌ្ឍនភាពនៃបញ្ហាទាក់ទងនឹងការដឹកជញ្ជូន របាយការណ៍វឌ្ឍនភាពនៃបញ្ហាទាក់ទងនឹងគយ របាយការណ៍វឌ្ឍនភាពនៃបញ្ហាទាក់ទងនឹងការធានារ៉ាប់រង របាយការណ៍វឌ្ឍនភាពនៃបញ្ហាអនាម័យ និងភូតគាមអនាម័យ និងរបាយការណ៍វឌ្ឍនភាពស្តីពីការផ្លាស់ប្តូរទំនិញដែលមានគ្រោះថ្នាក់ក្នុងការដឹកជញ្ជូនឆ្លងកាត់។
កាលពីដើមឆ្នាំ ២០២១ កិច្ចព្រមព្រៀងដឹកជញ្ជូនចំនួន ៤ ត្រូវបានបង្កើតឡើង និងចុះហត្ថលេខានៅក្នុងតំបន់អាស៊ានដើម្បីជួយសម្រួលដល់ការដឹកជញ្ជូនឆ្លងកាត់ព្រំដែនដោយកិច្ចព្រមព្រៀងទាំងនេះ រួមមានកិច្ចព្រមព្រៀងក្របខ័ណ្ឌស្តីពីការសម្របសម្រួលទំនិញនិងការឆ្លងកាត់កិច្ចព្រមព្រៀងការដឹកជញ្ជូនអន្តររដ្ឋ កិច្ចព្រមព្រៀងការដឹកជញ្ជូនពហុមធ្យោបាយ និងការដឹកជញ្ជូនអ្នកដំណើរតាមផ្លូវគោក។
លោក គង់ រតនៈ ប្រធានវិទ្យាស្ថានជាតិសុវត្ថិភាពចរាចរណ៍ផ្លូវគោកបានលើកឡើងថា កិច្ចប្រជុំនេះគឺជាការបើកចំហជើងមេឃដែលមានប្រយោជន៍សម្រាប់កំណើនសេដ្ឋកិច្ចជាតិ ដែលផ្តល់ច្រកដឹកជញ្ចូនទំនិញ និងការផ្តល់សេវាងាយស្រួលក្នុងតំបន់។លោកបន្តថា ការរួមគ្នាធ្វើឲ្យមានការឆ្លងកាត់និងការដឹកជញ្ចូនទំនិញក្នុងតំបន់អាស៊ានកាន់តែមានការងាយស្រួលនិងនាំឲ្យមានភាពប្រសើរឡើងនូវលំហូរទំនិញជាពិសេសផ្នែកពាណិជ្ជកម្ម។
ប៉ុន្តែទោះយ៉ាងណា លោកបារម្ភថា នៅពេលដែលផ្លូវអាស៊ាន ត្រូវបានបើកចំហទូលាយនឹងកើតមានបញ្ហាមួយចំនួន ដែលទាក់ទងនឹងសុវត្ថិភាពសម្រាប់អ្នកបើកបរដែលជំរុញឲ្យមានការអប់រំនិងពង្រីងបន្ថែមទៀតខណៈដែលពលរដ្ឋកម្ពុជាមួយចំនួនទទួលបានបណ្ណបើកបរមិនស្របទៅតាមច្បាប់ដែលធ្វើឲ្យពួកគេខ្វះខាតចំណេះដឹងក្នុងការបើកបរ។
លោក គង់ រតនៈ បានបញ្ជាក់ថា៖ «ប្រសិនបើអ្នកបើកបរដែលជាអ្នកកាន់ចង្គូតឡានឆ្លងកាត់ផ្លូវអាស៊ាននេះ គាត់មិនចេះច្បាប់ចរាចរណ៍ច្បាស់លាស់ឬមិនដឹងពីវិធានសុវត្ថិភាពនោះទេក៏ងាយនឹងបង្កគ្រោះថ្នាក់ដែរ។ចំណុចចុងក្រោយ គឺជាការបារម្ភចំពោះចំណេះដឹងរបស់ប្រជាពលរដ្ឋកម្ពុជាជាពិសេសបងប្អូនដែលរស់នៅតាមដងផ្លូវអាស៊ាន»៕
