ភ្នំពេញៈ តុលាការកំពូលបានបើកសវនាការ រឿងក្តីស្រ្តីជាប់ចោទម្នាក់នៅថ្ងៃទី ១២ តុលា ករណីជួលមនុស្សឱ្យសម្លាប់សង្សា ហើយត្រូវបានតុលាការថ្នាក់ក្រោមផ្តន្ទាទោសស្រ្តីជាប់ចោទដាក់ពន្ធនាគារ ១ ជីវិត និងត្រូវបានសាលាឧទ្ធារណ៍បន្ថយទោសមកនៅត្រឹម ៣០ ឆ្នាំ ខណៈគូកន ៤ នាក់ទៀត ត្រូវបានសាលាដំបូងផ្តន្ទាទោសដាក់ពន្ធនាគារម្នាក់ៗ ៣០ ឆ្នាំ។
តាមរយៈលោកចៅក្រម និល ណុន ប្រធានក្រុមប្រឹក្សាជំនុំជម្រះ និងតាមអង្គហេតុរបស់តុលាការកំពូលបង្ហាញថា នៅអំឡុងឆ្នាំ ២០១៥ ស្រ្តីជាប់ចោទឈ្មោះ សុខ គីមលី អាយុ ៤៥ ឆ្នាំ មានទំនាក់ទំនងស្នេហាជាមួយបុរសឈ្មោះ អៀ លីហួរ។ ប៉ុន្តែដោយសារបុរសរូបនេះចេះតែដើរលេងពេលយប់ និងមានស្រី ធ្វើឱ្យស្រ្តីជាប់ចោទខឹង ក៏ទិញកាំភ្លើងខ្លី ម៉ាក K59 ១ ដើម ជួលឈ្មោះ លី ស័រប៉ិញ ភេទប្រុសអាយុ ៣៦ ឆ្នាំ ឈ្មោះ ឡេ យាំងយ៉ុង ភេទប្រុសអាយុ ៤២ ឆ្នាំ និងស្រ្តីឈ្មោះ ចាំង ជីវ៉េ អាយុ ៤៦ ឆ្នាំ (ពួកគេជាជនជាតិវៀតណាម) ឱ្យបាញ់សម្លាប់បុរសជាសង្សានោះចោល។ តែអ្នកទាំង ៣ នាក់ មិនហ៊ានសម្លាប់មនុស្សក៏យកកាំភ្លើងប្រគល់ឱ្យស្រ្តីជាប់ចោទ សុខ គីមលី វិញ។
អង្គហេតុបានបង្ហាញបន្តថា លុះនៅអំឡុងឆ្នាំ ២០១៦ ស្រ្តីជាប់ចោទដដែលបានជួលបុរសជាប់ចោទឈ្មោះ សាក់ ម៉ាប់ អាយុ ៣៦ ឆ្នាំ បុរសជាប់ចោទឈ្មោះ នូ សំបាន អាយុ ៣៣ ឆ្នាំ ឈ្មោះ ប៊ុន ភក្តី អាយុ ៣២ ឆ្នាំ និងស្រ្តីជាប់ចោទឈ្មោះ ប៊ូ សុភាព អាយុ ២៥ ឆ្នាំ ឱ្យទៅវាយធ្វើបាបបុរសជាសង្សានោះម្តងទៀត។
បន្ទាប់ពីបានទទួលលុយជួលពីស្រ្តីឈ្មោះ សុខ គីមលី ពួកគេបានទៅទិញគ្រាប់បែក ដើម្បីយកទៅបោកសម្លាប់ឈ្មោះ អៀ លីហួរ ប៉ុន្តែពេលកំពុងជិះម៉ូតូ ស្រាប់តែជ្រុះគ្រាប់បែកផ្ទុះបណ្តាលឱ្យរបួសអ្នកដំណើរ ៤-៥ នាក់។ ក្រោយមកសមត្ថកិច្ចបានចាប់ខ្លួនអ្នកស៊ីឈ្នួល និងអ្នកជួលបានទាំងអស់។
អង្គហេតុឱ្យដឹងថា សំណុំរឿងនេះ ត្រូវបានសាលាដំបូងរាជធានីភ្នំពេញបើកសវនាការ និងប្រកាសសាលក្រម នៅថ្ងៃទី ១៥ កញ្ញា ឆ្នាំ ២០១៧ ដោយផ្តន្ទាទោសស្រ្តីជាប់ចោទឈ្មោះ សុខ គីមលី ដាក់ពន្ធនាគារ ១ ជីវិត និងបទល្មើស ១ ករណីទៀតត្រូវជាប់គុក ១០ ឆ្នាំ ពីបទផ្តើមគំនិតក្នុងអំពើឃាតកម្មគិតទុកជាមុន មាត្រា ១៩៩ នៃក្រមព្រហ្មទណ្ឌ។ ចំណែកគូកន ៤ នាក់ទៀតម្នាក់ៗ ៣០ ឆ្នាំ ពីបទសមគំនិតក្នុងអំពើឃាតកម្ម។
ប៉ុន្តែពួកគេមិនសុខចិត្តបានប្តឹងមកសាលាឧទ្ធរណ៍ ហើយត្រូវបានឧទ្ធរណ៍តម្កល់សាលក្រមសម្រេចរបស់សាលាដំបូងលើជនជាប់ចោទ ៤ នាក់ ម្នាក់ៗ ៣០ ឆ្នាំដដែល។ ប៉ុន្តែស្ត្រីជាប់ចោទឈ្មោះ សុខ គឹមលី ត្រូវបានឧទ្ធរណ៍បន្ថយពីទោស ១ ជីវិត មកនៅត្រឹម ៣០ ឆ្នាំដែរ។ ករណីនេះ មានតែស្រ្តីជាប់ចោទម្នាក់ប៉ុណ្ណោះដែលប្តឹងមកតុលាការកំពូលទៀត។
លោក អ៊ុក គឹមសិទ្ធិ តំណាងមហាអយ្យការ ថ្លែងដោយសន្និដ្ឋានថា តាមអង្គហេតុ ស្រ្តីជាប់ចោទពិតជាបានប្រព្រឹត្តដូចការចោទប្រកាន់មែន។ លោកស្នើសុំឱ្យក្រុមប្រឹក្សាជំនុំជម្រះតម្កល់សាលដីកាសាលាឧទ្ធរណ៍។
ក្នុងបន្ទប់សវនាការនៅថ្ងៃទី ១២ តុលា លោក យ៉ុន ប៊ុនណា ជាមេធាវីស្ត្រីជាប់ចោទបានថ្លែងថា កូនក្តីលោកគ្រាន់តែជួលមនុស្ស ៤ នាក់នោះ ឱ្យប្រើហិង្សាដើម្បីគំរាមសង្សាគាត់ទេ។
លោកថ្លែងថា៖ «កូនក្តីខ្ញុំជួលពួកគេឱ្យវាយគំរាមទេ មិនបានឱ្យពួកគេទៅសម្លាប់បុរសនោះឡើយ។ ខ្ញុំសូមតុលាការបង្វិលសំណុំរឿងទៅសាលាឧទ្ធរណ៍វិញ»។
ចំពោះស្រ្តីជាប់ចោទក៏បានប្រាប់ចៅក្រមប្រឹក្សាជំនុំជម្រះថា គាត់គ្រាន់តែជួលគេវាយគំរាមសង្សាមិនបានឱ្យទៅសម្លាប់ទេ។
ស្រ្តីជាប់ចោទនិយាយថា៖ «ខ្ញុំសូមតុលាការដោះលែងខ្ញុំ ដើម្បីបានចេញទៅថៃរក្សាកូនខ្ញុំ៣នាក់ផង»។
ក្រោយជំនុំជម្រះលោកប្រធានក្រុមប្រឹក្សាជំនុំជម្រះ និល ណុន ថ្លែងថា សាលដីកានេះនឹងប្រកាសនៅថ្ងៃទី ១៩ តុលា៕