.jpg)
ពិធីដាក់បិណ្ឌនៅវត្តមួយក្នុងរាជធានីភ្នំពេញ កាលពីចុងខែមុន។ ហេង ជីវ័ន
ភ្នំពេញៈ លោកស្រី ឱ វណ្ណឌី អ្នកនាំពាក្យក្រសួងសុខាភិបាលនិងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក-១៩) បានថ្លែងនៅថ្ងៃទី ១២ ខែតុលាថា ការវាយតម្លៃពីស្ថានភាពនៃការឆ្លងកូវីដ ក្រោយពិធីបុណ្យភ្ជុំបិណ្ឌអាចដឹងនៅក្នុងរយៈពេលពី ៧ ទៅ ១៤ ថ្ងៃ បន្ទាប់ពីបញ្ចប់នៃពិធីនេះ។
លោកស្រីបានមានប្រសាសន៍ក្នុងពិធីបិទបញ្ចប់យុទ្ធនាការចាក់វ៉ាក់សាំងកូវីដ ១៩ ក្នុងភូមិសាស្ត្រខេត្តកំពង់ឆ្នាំងថា៖ «ក្រោយពេលចប់ពិធីបុណ្យនេះ រយៈពេលយ៉ាងហោចណាស់ចន្លោះពី ៧ ទៅ ១៤ ថ្ងៃ ទើបយើងអាចវាយតម្លៃបាន ដោយសារប្រសិនបើមានការឆ្លងនៃវីរុសកូវីដ ១៩ ក៏វាត្រូវទៅតាមស្ថានភាពរបស់វាចាប់ពីថ្ងៃឆ្លងក្នុងពិធីបុណ្យរហូតដល់ពេលយើងដឹង។ ដូចនេះយើងនឹងដឹងថាតើករណីឆ្លងមានការកើនឡើងឬថយចុះ»។
ការវាយតម្លៃពីសភាពការណ៍នៃការឆ្លងវីរុសកូវីដ ១៩ នេះ មិនអាចធ្វើទៅម្នាក់ឯងបានទេ ដូចនេះត្រូវរង់ចាំនូវការវាយតម្លៃរបស់គណៈប្រចាំការ គណៈប្រតិបត្តិ ក្នុងនោះក៏មានគណៈកម្មការអន្តរក្រសួងប្រយុទ្ធនឹងជំងឺកូវីដ ១៩ ផងដែរ។ ក្រោយពីមានការវាយតម្លៃនិងពិភាក្សាគ្នាហើយនឹងត្រូវគោរពជម្រាបជូនដល់លោកនាយករដ្ឋមន្ត្រី ដើម្បីលោកសម្រេចថាតើស្ថានការណ៍យ៉ាងណា ហើយនឹងត្រូវធ្វើយ៉ាងណាបន្តទៀត។ នេះបើតាមលោកស្រី ឱ វណ្ណឌីន។
ជាមួយគ្នានេះ លោកស្រីក៏នៅតែបន្តអំពាវនាវឱ្យមានការប្រុងប្រយ័ត្នដដែលទោះបីជាភាគច្រើនទទួលបានការចាក់វ៉ាក់សាំងកូវីដ ១៩ រួចហើយក្តី ពីព្រោះនៅពេលដែលឆ្លង ស្ថានភាពរបស់ពួកគាត់ធម្មតាដោយមិនមានរោគសញ្ញា ឬមានរោគសញ្ញាដែរតែគាត់មិនចាប់អារម្មណ៍ថាពួកគាត់បានឆ្លងវីរុសកូវីដ ១៩ ដែរ។
លោកស្រីបញ្ជាក់ថា៖ «សុំឱ្យបងប្អូនយើងបន្តចូលរួមជាមួយនឹងរាជរដ្ឋាភិបាល ដើម្បីប្រុងប្រយ័ត្នថែមទៀត ហើយសំខាន់នៅពេលដែលមានអារម្មណ៍ថា មិនស្រួលខ្លួនហើយគិតថាអាចឆ្លងវីរុសកូវីដ ១៩ គឺត្រូវតែដាក់ខ្លួនឱ្យនៅដាច់ដោយឡែក ដើម្បីចៀសវាងការចម្លងទៅអ្នកដទៃ ពិសេសក្រុមគ្រួសារ»។
ទន្ទឹមនឹងនេះដែរ (គ.វ.ក-១៩) កំពុងសិក្សាក្នុងការផ្តល់កាតចាក់វ៉ាក់សាំងដល់អ្នកដែលបានបាត់កាតនេះ ហើយក៏កំពុងតែចាត់ចែងរៀបចំក្នុងការសរសេរនូវការណែនាំឱ្យបានច្បាស់លាស់ ជាពិសេសកំពុងតែពិចារណាក្នុងការឱ្យមានការចូលរួមចំណែក (បង់លុយ) ពីបុគ្គលដែលបានបាត់កាតចាក់វ៉ាក់សាំង។
លោកស្រី ឱ វណ្ណឌីន បានលើកឡើថា លោកស្រីធ្លាប់បានអំពាវនាវច្រើនដងហើយទាក់ទងនឹងការរក្សានូវកាតចាក់វ៉ាក់សាំងនេះឱ្យបានល្អដូចឯកសារឬបណ្ណផ្សេង។
សម្រាប់អ្នកដែលបានចាក់វ៉ាក់សាំងហើយពិតជាបានបាត់កាតនេះមែន ត្រូវទៅទាក់ទងជាមួយនឹងក្រុមការងារដែលពួកគាត់បានចាក់ជាមួយ ដើម្បីក្រុមការងារឆែកមើលក្នុងប្រព័ន្ធដើម្បីរៀបចំដល់ពួកគាត់។
លោកស្រីមានប្រសាសន៍ថា ៖ «តាមព័ត៌មានដែលខ្ញុំទទួលបានច្រើន ក៏មានបងប្អូនយើងបានបាត់កាតពិតប្រាកដមែន។ ប៉ុន្តែយើងក៏បានធ្វើការស្រាវជ្រាវផងដែរដោយរកឃើញថា មានបងប្អូនមួយចំនួនមិនបានបាត់កាតទេ តែគាត់ចង់បានកាតថ្មី ហើយក៏មានអ្នកខ្លះមិនបានចាក់វ៉ាក់សាំងសោះ ក៏បានយកលេសថាគាត់បាត់កាតចាក់វ៉ាក់សាំងដែរ។ ដូចនេះហើយបានជាយើងត្រូវឆែកឱ្យបានត្រឹមត្រូវលើរឿងនេះ»។
ទាក់ទងនឹងការផ្តល់កាតចាក់វ៉ាក់សាំងកូវីដ ១៩ នេះដែរ (គ.វ.ក-១៩) កំពុងតែចាត់ចែងរៀបចំក្នុងការសរសេរនូវសេចក្តីណែនាំហើយអាចនឹងដាក់សំណើនេះជូនទៅតាមគណៈប្រចាំការដើម្បីមូលមតិគ្នាថា តើត្រូវធ្វើយ៉ាងណានៅពេលដែលមានការបាត់កាតចាក់វ៉ាក់សាំងនេះ។
លោកស្រី ឱ វណ្ណឌីន បានថ្លែងថា៖ «ខ្ញុំក៏សុំបញ្ជាក់ផងដែរថា នៅពេលដែលបានកាតនេះដោយមិនមានការយកចិត្តទុកដាក់ អ៊ីចឹងការបាត់នេះក៏អាចនឹងមានច្រើនដែរ មានន័យថា បានដោយស្រួល បាត់ក៏ស្រួល ដោយសារពួកគាត់បានកាតដោយមិនមានអស់ថវិកានោះទេ ដែលជាហេតុមិនមានការទុកដាក់ឱ្យបានល្អ»។
បើតាមលោកស្រី វណ្ឌីឌីន កាតចាក់វ៉ាក់សាំងនេះ រដ្ឋត្រូវចំណាយថវិកាទិញ និងមានសម្ភារមួយចំនួនដូចជាម៉ាស៊ីនសម្រាប់ព្រីន ទឹកថ្នាំសម្រាប់ព្រីន និងការប្រើប្រាស់កម្លាំងមនុស្សសម្រាប់រៀបចំផងដែរ។
លោកស្រីថា៖ «ឧទាហរណ៍ថា មនុស្សចំនួន ១ លាននាក់ ស្រាប់តែអ្នកបាត់កាតកន្លះលាននាក់ហើយ។ ដូចនេះយើងក៏ត្រូវការថវិកាក្នុងការរៀបចំដែរ អ៊ីចឹង! ថា តើការចូលរួមចំណែករបស់បុគ្គលនៅពេលដែលខ្លួនបាត់កាតនេះ តើអាចធ្វើទៅបានទេ។យើងមិនមែនយកមកដើម្បីធ្វើមានបាននោះទេ តែដើម្បីធ្វើការចំណាយទូទាត់ទៅលើការរៀបចំការធ្វើកាតនេះឡើងវិញ»៕
វីដេអូ៖
