ភ្នំពេញៈ បុរសជនជាតិនីហ្សេរីយ៉ាម្នាក់ពាក់ព័ន្ធនឹងការជួញដូរគ្រឿងញៀនមេតំហ្វេតាមីនជិតកន្លះគីឡូក្រាម ត្រូវបានកម្លាំងនគរបាលប្រឆាំងគ្រឿងញៀនបញ្ជូនទៅសាលាដំបូងរាជធានីភ្នំពេញនាថ្ងៃនេះ ក្រោយពីសមត្ថកិច្ចបង្ក្រាបបាន នៅភូមិសាស្ត្រសង្កាត់បឹងទំពុន ខណ្ឌមានជ័យ រាជធានីភ្នំពេញ។
លោកឧត្តមសេនីយ៍ទោ អ៊ិន សុង នាយករងមន្ទីរប្រឆាំងគ្រឿងញៀន នៃក្រសួងមហាផ្ទៃ ប្រាប់ ភ្នំពេញ ប៉ុស្តិ៍ នៅរសៀលថ្ងៃទី ១២ តុលាថា ជនសង្ស័យឈ្មោះ Lebechi Charles kelichi ភេទប្រុស អាយុ ៣៣ ឆ្នាំ ជាជនជាតិនីហ្សេរីយ៉ា ត្រូវបានសមត្ថកិច្ចមន្ទីរប្រឆាំងគ្រឿងញៀនបញ្ជូនទៅសាលាដំបូងរាជធានីភ្នំពេញនៅថ្ងៃទី ១២ តុលាហើយ។
លោកថ្លែងថា៖ «ខាងមន្ទីរខ្ញុំបានបញ្ជូនជននោះទៅតុលាការព្រឹកមិញ (ថ្ងៃទី ១២ តុលា)»។
លោកឱ្យដឹងថា ជនសង្ស័យខាងលើត្រូវបានឃាត់ខ្លួន ដោយលោកវរសេនីយ៍ទោ វ័រ វុទ្ធា នាយករងមន្ទីរប្រឆាំងគ្រឿងញៀន និងសម្របសម្រួលផ្លូវច្បាប់ពីលោកព្រះរាជអាជ្ញារង ស៊ិត វណ្ណៈ នៃអយ្យការអមសាលាដំបូងរាជធានីភ្នំពេញ។ ករណីឃាត់ខ្លួននេះ បន្ទាប់ពីសមត្ថកិច្ចជំនាញធ្វើការស្រាវជ្រាវ និងបង្ក្រាបនៅចំណុចក្រោយវត្តសន្សំកុសល ផ្លូវបេតុង សង្កាត់បឹងទំពុន ខណ្ឌមានជ័យ រាជធានីភ្នំពេញ កាលពីថ្ងៃទី ៩ តុលា ឆ្នាំ ២០២១។
បើតាមលោក អ៊ិន សុង ចំពោះវត្ថុតាង ដែលសមត្ថកិច្ចរឹបអូសបានពីជនសង្ស័យ មានគ្រឿងញៀនប្រភេទមេតំហ្វេតាមីន (ICE) ទម្ងន់សុទ្ធ ៤៩៩.៤០ ក្រាម។
ពាក់ព័ន្ធការចោទប្រកាន់ពីសំណាក់តំណាងអយ្យការយ៉ាងណានោះ ភ្នំពេញ ប៉ុស្តិ៍ បានទាក់ទងលោក ប្លង់ សុផល អ្នកនាំពាក្យតំណាងអយ្យការអមសាលាដំបូងរាជធានីភ្នំពេញនៅរសៀលថ្ងៃទី ១២ តុលាដែរ តែលោកមិនទាន់ឆ្លើយតប។
ចំពោះលទ្ធផលបង្ក្រាបគ្រឿងញៀននៅទូទាំងប្រទេស ដែលគេហទំព័ររបស់អគ្គស្នងការដ្ឋាននគរបាលជាតិចុះផ្សាយកាលពីថ្ងៃទី ១១ តុលា ក្រោយពីបង្ក្រាបបាននោះបង្ហាញថា មានជនសង្ស័យចំនួន ៣៨ នាក់ (ស្រី ២ នាក់) ត្រូវបានសមត្ថកិច្ចឃាត់ខ្លួនក្នុងប្រតិបត្តិការបង្ក្រាបបទល្មើសគ្រឿងញៀនចំនួន ១៨ ករណីនៅទូទាំងប្រទេស។
ក្នុងចំណោមជនសង្ស័យទាំង ៣៨ នាក់ រួមមានជួញដូរគ្រឿងញៀនចំនួន ១៦ ករណី ដោយឃាត់មនុស្សបាន ២៩ នាក់ និងប្រើប្រាស់គ្រឿងញៀន ២ ករណី ឃាត់មនុស្ស ៩ នាក់។
គេហទំព័របន្តថា ចំពោះវត្ថុតាង ដែលសមត្ថកិច្ចចាប់យក មានគ្រឿងញៀនប្រភេទមេតំហ្វេតាមីន (ICE) ទម្ងន់ ៥៦០,២៩ ក្រាម និង ១៥ កញ្ចប់តូច៕